ការអភិវឌ្ឍខ្លួនឱ្យរីកចម្រើនទើបអាចបន្តភាពជោគជ័យ និងធ្វើឱ្យខ្លួនយើងកាន់តែ្រសើរឡើង។ ទន្ទឹមគ្នានេះ មនុស្សគ្រប់គ្នាតែងតែជួបបញ្ហាច្រើន ធ្វើអ្វីក៏មិនសម្រេចលទ្ធផលល្អ ឬធ្វើកិច្ចការអ្វីបានតែមួយភ្លែត។ អ្នកជំនាញមើលឃើញថា មូលហេតុទាំងនេះ គឺដោយសារមនុស្សភ្លេចអភិវឌ្ឍន៍ខ្លួនឯងបន្ថែមលើចំណេះដឹង ឬជំនាញដែលធ្លាប់ប្រើប្រាស់កន្លងមក។

លោក គីម ដារ៉ា ស្ថាបនិកសាលា Start Up Community មានប្រសាសន៍ថា នៅក្នុងវិស័យការងារ និងវិស័យជំនួញ ទាមទារការអភិវឌ្ឍខ្លួនឥតឈប់ឈរ។ លោកបន្តថា ទាល់តែយុវជនយល់ថា ការអភិវឌ្ឍខ្លួន ជាដំណើររស់នៅនៃជីវិត មិនមែនជាសម្ពាធ នោះទើបយើងអាចរីករាយបាន។

ស្ថាបនិកសាលា Start Up Community បញ្ជាក់បន្ថែមថា ជាទូទៅ មនុស្សដែលពិបាកក្នុងការអភិវឌ្ឍខ្លួនតែងតែគិតឱ្យនិយមន័យថា ការអភិវឌ្ឍខ្លួន គឺជាសម្ពាធមួយដ៏ធ្ងន់ធ្ងរ ដោយគិតថា មានការងារមួយល្អគ្រប់គ្រាន់ហើយ ឬអាជីវកម្មមានប្រាក់ចំណូលអាចឱ្យរស់នៅបានសមរម្យហើយ ក៏លែងចង់អភិវឌ្ឍន៍ខ្លួន។ លោកបន្តថា នៅក្នុងវិស័យការងារ ប្រសិនយើងមិនខិតខំអភិវឌ្ឍន៍សមត្ថភាពខ្លួនជាប្រចាំ នោះនៅពេលមានអ្នកចូលមកក្រោយ គេខិតខំអភិវឌ្ឍន៍ខ្លួនតែកន្លះឆ្នាំ នឹងអាចស្មើយើងដែលធ្វើការយូរឆ្នាំតែមិនបន្តអភិវឌ្ឍន៍ខ្លួន។

«ប្រសិនជាយើងមិនខិតខំអភិវឌ្ឍន៍ខ្លួនឯងឱ្យទៅមុខ នោះយើងនឹងមិនអាចដើរតាមទាន់ការផ្លាស់ប្ដូរ និងការរីកចម្រើននៃសង្គមឡើយ។»

លោក គីម ដារ៉ា ស្ថាបនិកសាលា Start Up Community

លោក គីម ដារ៉ា បន្ថែមថា ការពិត​ជីវិតមនុស្សត្រូវការរីកចម្រើនឥតឈប់ បើមិនដូច្នោះទេ យើងមិនអាចរីករាយជាមួយជីវិតបានពេញលេញនោះឡើយ ព្រោះយើងដឹងហើយថា ចំណេះដឹង បច្ចេកវិទ្យា គឺរីកចម្រើនទៅមុខឥតឈប់ឈរ របៀបគិតសុទ្ធតែមានការផ្លាស់ប្ដូររហូត។ លោកបន្តថា យើងចាំបាច់ត្រូវមានផ្នត់គំនិតមួយបន្តរៀនសូត្រជានិច្ច តាមរយៈការឆ្លៀតដោយបង្កើតទម្លាប់ជាក់លាក់មួយ ចំណាយពេលវេលាកន្លះម៉ោង ឬមួយម៉ោងដើម្បីរៀនលើចំណេះដឹងទាក់ទងនឹងជំនាញ និងចំណេះដឹងទូទៅដែលយើងចង់អភិវឌ្ឍន៍សមត្ថភាពបន្ថែម។ ឧទាហរណ៍ ប្រសិនបើយើងជាបុគ្គលិកផ្នែកអ្វី យើងត្រូវទិញសៀវភៅទាក់ទងនឹងជំនាញនោះមករៀន ឬចូលរួមវគ្គសិក្សាអនឡាញទាក់ទងនឹងជំនាញនោះ។

ស្ថាបនិកសាលា Start Up Community បញ្ជាក់ថា នៅពេលយើងមានចំណេះដឹងលើជំនាញរួចហើយ យើងក៏ត្រូវរៀនអំពីចំណេះដឹងទូទៅបន្ថែមទៀត ដើម្បីដើរឱ្យទាន់ភាពរីកចម្រើននៃពិភពលោក ដោយបច្ចុប្បន្ននេះ បច្ចេកវិទ្យាបញ្ញាសិប្បនិម្មិត្ត (AI) កំពុងប្រើប្រាស់យ៉ាងទូលំទូលាយ នឹងអាចជំនួសការងារមនុស្សជាច្រើន​។ ដូច្នេះ ប្រសិនបើយើងមិនអភិវឌ្ឍន៍ខ្លួន គឺមិនអាចតាមទាន់បច្ចេកវិទ្យាទាំងនេះទេ។

លោក គីម ដារ៉ា ក៏បានលើកទឹកចិត្តឱ្យយុវជនជានិស្សិត ឬជាបុគ្គលិក ត្រូវមានផ្នត់គំនិតអភិវឌ្ឍន៍ខ្លួនជាប្រចាំ។ ចាប់ពីថ្ងៃនេះទៅត្រូវផ្លាស់ប្ដូរផ្នត់គំនិត ទម្លាក់ភាពខ្ជិលចេញ ធ្វើអ្វីជារឿងត្រឹមត្រូវ ដែលនាំឱ្យយើងរីកចម្រើន។ ជាពិសេស ត្រូវដឹងថា ភាពរីកចម្រើនជាដំណើរជីវិត ជាភាពរីករាយនៃជីវិត ជាបង្អែមនៃជីវិត ដែលត្រូវទទួលយក និងមិនត្រូវគេចវេស។ ប្រសិនបើយើងគេចវេសយកអ្វីដែលស្រួលៗងាយៗ ថ្ងៃក្រោយជីវិតនឹងជួបការលំបាក ហើយយើងនឹងមានអារម្មណ៍ថាស្ដាយពេលវេលាកន្លងទៅដែលយើងមិនបានខិតខំ៕