ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
គ្រប់គ្នាប្រហែលជាដឹងហើយថា ការទទួលទានអាហារបានគ្រប់គ្រាន់ និងទៀងពេល បានរួមចំណែកជួយទៅដល់សុខភាព, ប៉ុន្តែប្រសិនបើយើងទទួលទានអាហារដោយផ្អែកតាមអារម្មណ៍វិញ តើវាប៉ះពាល់អ្វីខ្លះទៅដល់សុខភាព? ចម្លើយខ្លីគឺវានឹងប៉ះពាល់។ តាមរយៈគេហទំព័រ Helpguide បានបង្ហាញគន្លឹះមួយចំនួន ដើម្បីជួយបញ្ឈប់ការញ៉ាំតាមអារម្មណ៍ស្ត្រេសមួយពេលៗ ដោយមានរៀបរាប់នៅខាងក្រោម ៖
និយមន័យនៃការបរិភោគតាមអារម្មណ៍ ៖ មនុស្សមួយចំនួនទទួលទានអាហារមិនមែនដើម្បីបំពេញតម្រូវការ នៃរាងកាយតែប៉ុណ្ណោះទេ ប៉ុន្តែជាការទទួលទានដើម្បីបំពេញអារម្មណ៍ ការប្រើប្រាស់អាហារជាឈ្នាន់ដើម្បីធ្វើឱ្យខ្លួនមានផាសុកភាព មានអារម្មណ៍ល្អ កាត់បន្ថយស្ត្រេស ឬការទទួលទានដើម្បីផ្តល់រង្វាន់ជូនទៅកាន់ខ្លួនឯងជាដើម គេហៅថា ការបរិភោគតាមអារម្មណ៍។ ហើយការមានទម្លាប់ទទួលទានបែបនេះ គឺគ្មានពេលក្នុងការគិតវិភាគថា តើអាហារប្រភេទណាដែលគួរទទួលទាននោះទេ តួយ៉ាងគេច្រើនបរិភោគអាហារងាយៗ អាហារកែច្នៃ ឬអាហារផ្អែមៗដើម្បីបំពេញចំណង់ដែលខ្លួនមានប៉ុណ្ណោះ។ ជាការពិត ការទទួលទានតាមអារម្មណ៍ធ្វើឱ្យអារម្មណ៍ល្អបានមួយពេលខ្លី! ប៉ុន្តែគួរចងចាំថា វាគ្រាន់តែជាការបំពេញអារម្មណ៍ ប៉ុន្តែមិនបានបំពេញតម្រូវការរាងកាយនោះទេ។ ហើយការបរិភោគតាមអារម្មណ៍ទៀតសោត ក៏ពុំបានដោះស្រាយបញ្ហាអារម្មណ៍ធ្លាក់ចុះបានក្នុងរយៈពេលវែងនោះដែរ វាថែមទាំងបង្កឱ្យលោកអ្នក កាន់តែមានអារម្មណ៍ថា មិនគប្បីចំពោះខ្លួនឯង។
ការកត់សម្គាល់ខ្លួនឯង ៖ ជាចំណុចដំបូងក្នុងការដោះស្រាយ គឺការស្វែងរកអំពីចំណុចខ្សោយ ឬកត្តាដែលជំរុញឱ្យខ្លួនចាប់ផ្តើមមានអារម្មណ៍ថា ត្រូវតែរកអាហារដើម្បីបំពេញសេចក្ដីសុខផ្លូវចិត្ត ជាពិសេសស្របពេលដែលក្រពះ ពោរពេញដោយអាហាររួចជាស្រេច។ តើការបរិភោគតាមអារម្មណ៍របស់អ្នក ភាគច្រើនកើតឡើងក្នុងស្ថានភាពបែបណា? អាចមិនមែនមកពីស្ថានភាពអាក្រក់ទាំងអស់នោះទេ ពេលខ្លះក៏អាចកើតមានដោយសារស្ថានភាពវិជ្ជមានដែរ ដូចជាការផ្តល់រង្វាន់នៅពេលទទួលបានលទ្ធផលវិជ្ជមានណាមួយ។
សរសេរកំណត់ហេតុអំពីការបរិភោគ ៖ ក្នុងការកាត់ផ្តាច់ពីទម្លាប់មិនល្អ ឬការទទួលទានមិនល្អ ត្រូវការរំលឹក ការតាមដាន និងផ្ទៀងផ្ទាត់ជាប្រចាំ ហើយការសរសេរចុះអំពីការបរិភោគ ដូចជា តើប្រភេទអាហារអ្វីខ្លះដែលបានទទួលទាន ហើយមានអារម្មណ៍បែបណាក្រោយពេលទទួលទាន? ប្រសិនបើរកឃើញថា លោកអ្នកមានអារម្មណ៍មិនល្អជាញឹកញាប់ក្រោយពេលទទួលទាន ដូច្នេះនៅពេលបន្ទាប់ គឺប្រើប្រាស់វិធីសាស្រ្តផ្សេងក្នុងការដោះស្រាយ ដើម្បីឱ្យអារម្មណ៍ល្អប្រសើរដូចជា ការនិយាយជាមួយមនុស្សក្បែរខ្លួន ការដើរ ឬធ្វើចលនា ការគូសគំនូរ ការបង្ហាញអារម្មណ៍ដោយការសរសេរ ពិសាទឹកបន្ថែម រៀនជំនាញថ្មី និងសម្រាកឱ្យបានគ្រប់គ្រាន់៕
