ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការជួយយកអាសា និងផ្ដល់ភាពកក់ក្ដៅឱ្យគ្នាទៅវិញទៅមក ជាប្រភពនៃសុភមង្គលសម្រាប់មនុស្សគ្រប់វ័យ, នេះបើយោងតាមការស្រាវជ្រាវចុងក្រោយបំផុត នៃ របាយការណ៍សុភមង្គលពិភពលោក។
ការស្រាវជ្រាវនេះ ផ្ដោតលើអត្ថប្រយោជន៍នៃការទទួលបានជំនួយ និងការជួយអ្នកដទៃ។ ជាលទ្ធផលរកឃើញថា ការយល់ទុក្ខធុរៈគ្នា និងជួយគ្នាទៅវិញទៅមក មានឥទ្ធិពលយ៉ាងខ្លាំង ទៅលើសុខុមាលភាពទូទៅរបស់មនុស្ស។
ចាប់តាំងពីឆ្នាំ២០១២ មក របាយការណ៍សុភមង្គលពិភពលោក បានចេញផ្សាយពី ការរកឃើញប្រចាំឆ្នាំស្ដីពីសុភមង្គលសកល ដោយរបាយការណ៍បានស្វែងយល់ពីទិដ្ឋភាពប្លែកៗនៃសុខុមាលភាព ដូចជា អាយុ ឬឥទ្ធិពលនៃជំងឺរាតត្បាតកូវីដ-១៩ ជាដើម។ នៅឆ្នាំនេះ អង្គការបានផ្ដោតលើការយកចិត្តទុកដាក់ និងរបៀបដែលលទ្ធផលនៃរបាយការណ៍នេះ អាចក្លាយជាផ្នែកសំខាន់ នៃការអភិវឌ្ឍសុភមង្គល បុគ្គល និងសង្គម។
ក្រឡេកមើលទិន្នន័យនៃការស្ទង់មតិ Gallup ឆ្នាំ២០២២ និង២០២៣ នៅក្នុងប្រទេសចំនួន ១៤២ ក្រុមអ្នកស្រាវជ្រាវនៃរបាយការណ៍សុភមង្គលពិភពលោក បានរកឃើញថា ការចែករំលែកអាហារឱ្យគ្នាទៅវិញទៅមក មានឥទ្ធិពលយ៉ាងខ្លាំងលើសុភមង្គលបុគ្គល។ យោងតាមរបាយការណ៍ បានឱ្យដឹងថា ការចែករំលែកអាហារជាមួយអ្នកដទៃ គឺមានឥទ្ធិពលវិជ្ជមានលើសុខុមាលភាពទូទៅ។
អ្នកដែលចែករំលែកអាហារច្រើនជាមួយអ្នកដទៃ បានរាយការណ៍ពីកម្រិតនៃការពេញចិត្តក្នុងជីវិតកាន់តែខ្ពស់ និងឥទ្ធិពលវិជ្ជមាន ហើយឥទ្ធិពលនេះ មានសម្រាប់ជនទូទៅ ទាំងអាយុ ភេទ ប្រទេស វប្បធម៌ និងតំបន់។
ក្នុងការស្រាវជ្រាវក៏បានបង្ហាញផងដែរថា ចំណងទំនាក់ទំនងល្អក្នុងគ្រួសារ និងទំនាក់ទំនងល្អក្នុងសង្គម ជាចំណែកមួយក្នុងការបង្កើនសុភមង្គល ប្រហាក់ប្រហែលគ្នាទៅនឹង ការចែករំលែកអាហារ ជាពិសេសសម្រាប់មនុស្សវ័យជំទង់។
មូលហេតុចម្បង ដែលនាំឱ្យទំនាក់ទំនងសង្គម ធ្វើឱ្យសុភមង្គល ក្នុងចំណោមមនុស្សវ័យជំទង់មានភាពប្រសើរឡើង ព្រោះទំនាក់ទំនងសង្គម មានឥទ្ធិពលយ៉ាងខ្លាំង ក្នុងការបន្ធូរភាពតានតឹង ហើយសកម្មភាពនេះ គឺជាផ្នែកមួយ ដែលជួយឱ្យមនុស្សរីកចម្រើនផងដែរ។
ក្រុមអ្នកស្រាវជ្រាវ បានលើកឡើងថា តាមរយៈការសិក្សាពីប្រវត្តិសាស្ត្រ នៅអំឡុងយុវភាព គឺជាដំណាក់កាល ដែលមនុស្សមានទំនាក់ទំនងសង្គមច្រើនបំផុត ដោយសារមនុស្សវ័យជំទង់មានទំនោរបង្កើតមិត្តភាព និងចំណាយពេលក្នុងសង្គមច្រើនជាងក្រុមមនុស្សផ្សេងទៀត។ លើសពីនេះ ទំនាក់ទំនងសង្គម ក៏ជាមូលដ្ឋានគ្រឹះ សម្រាប់ការលូតលាស់ផ្លូវចិត្ត និងបណ្ដាញក្នុងសង្គម នៅក្នុងដំណាក់កាលជីវិតក្រោយៗទៀតផងដែរ ដែលនេះជាផ្នែកមួយសំខាន់ធ្វើឱ្យមនុស្សម្នាក់ៗ មានភាពធន់ផ្លូវចិត្តនៅឆ្នាំខាងមុខ៕
