ផែនការប្រចាំសប្តាហ៍មានប្រសិទ្ធភាព បង្កើនឱកាសជោគជ័យចំពោះក្ដីស្រមៃផ្ទាល់ខ្លួន ថែមទាំងបង្កើនបាននូវការផ្ចង់អារម្មណ៍ ការគ្រប់គ្រងពេលវេលាបានល្អ ធ្វើឱ្យកើនផលិតភាពជាងមុន ជាពិសេសជំរុញកម្លាំងចិត្ត និងស្មារតីឱ្យរវៀសរវៃបន្តទៅមុខ។ តាមរយៈគេហទំព័រ LoveToKnow បានបង្ហាញគន្លឹះ៤ចំណុចដែលយុវជន មិនគួរមើលរំលង ដើម្បីពង្រឹងផែនការសកម្មភាពប្រចាំសប្តាហ៍ ឬគោលដៅប្រចាំខែ និងប្រចាំឆ្នាំឱ្យមានប្រសិទ្ធភាព។

១. មានគោលដៅច្បាស់ ៖ គោលដៅដែលច្បាស់លាស់ មិនត្រឹមតែប្រាប់ពីភាពច្បាស់ៗ ចំពោះសកម្មភាពធំៗនោះទេ ទន្ទឹមគ្នានោះ ត្រូវបង្ហាញអំពី ការបំបែកប្រភេទកិច្ចការ ក្នុងរយៈពេលមួយសប្តាហ៍ ឬក៏មួយខែ នៅក្នុងកម្រិតមួយមានភាពសមល្មមនិងអាចសម្រេចបាន។ ប្រសិនបើកំណត់លើសអំពីសមត្ថភាព ឬលើសអំពីពេលវេលាដែលលោកអ្នកមាន នោះអាចនឹងនាំឱ្យមានសម្ពាធតាមរយៈកិច្ចការដែលលើសចំណុះ ថែមទាំងពិបាកក្នុងការរកពេលសម្រាក និងមិនដឹងថាត្រូវធ្វើអ្វីបន្តទៀត។ ដូច្នេះបំបែកកិច្ចការឱ្យមានទម្រង់តូចៗ និងមានភាពសាមញ្ញា គឺជាការកាត់បន្ថយភាពស្មុគស្មាញក្នុងការបញ្ចប់ភារកិច្ចណាមួយ។

២. ច្នៃផែនការទៅជារូបភាពដែលងាយស្រួលមើល ឬស្រួលចំណាំ ៖ កាលដែល កែច្នៃសកម្មភាពផែនការ ឬគោលដៅទៅក្នុងទំព័រផ្ទាំងក្រដាសមួយ ដែលងាយស្រួលមើល ឬងាយស្រួលក្នុងការដាក់តាំងបង្ហាញ មិនថាវាជាគម្រោងការងារ ឬការណាត់ជួបដើម្បីកិច្ចសន្ទនានោះទេ។ ព្រោះសកម្មភាពបែបនេះ វាជួយឱ្យលោកអ្នកមានការរំឮក អំពីគោលដៅដែលត្រូវធ្វើ និងការកំណត់អំពីអ្វីទៅជាអទិភាពក្នុងជីវិត។

៣. រៀបចំជាសកម្មភាពតូចៗ ឬជាងតារាងបញ្ជី ៖ ការពុះបំបែកសកម្មភាពប្រចាំថ្ងៃ ប្រចាំសប្តាហ៍ ឱ្យទៅជាតារាងមួយរួមបញ្ចូលទាំងគោលដៅតូចៗ មិនថាកិច្ចការនៅផ្ទះ ការងារវិជ្ជាជីវៈ និងកិច្ចសន្ទនាសំខាន់ៗណាមួយនោះទេ គឺត្រូវរៀបចំជាតារាងបញ្ជី ដើម្បីឱ្យមានភាពងាយស្រួលក្នុងការបំពេញ និងការចាត់ជាអាទិភាព។ តាមរយៈការបំបែកកិច្ចការទាំងនេះ ជំរុញឱ្យយើងកាន់តែប្រាកដក្នុងចិត្តថា មិនមានភាពភ្លេចភ្លាំងចំពោះការងារសំខាន់ៗ ឬការមើលរំលងកិច្ចការប្រចាំថ្ងៃ។

៤. ដាក់សញ្ញារំឮករាល់កាលបរិច្ឆេទនៃកិច្ចការនីមួយៗ ៖ តាមរយៈការកំណត់ ឬធ្វើសញ្ញាសម្គាល់ទៅលើផែនការកំណត់ គឺជាផ្នែកមួយជួយតាមដានសកម្មភាព មិនថាជាប្រភេទការងារផ្ទាល់ខ្លួន ឬការងារផ្សេងៗនោះទេ។ សូមចំណាំដែរថា ដើម្បីជួយឱ្យប្រភេទការងាររបស់យើងកាន់តែមានគុណភាពនោះ គឺ ការធ្វើផែនការឱ្យបានទៀងទាត់ រួមទាំងមានភាពបត់បែនក្នុងការកែសម្រួលសកម្មភាពក្នុងស្ថានការណ៍ដែលចាំបាច់ណាមួយ៕