កិរិយាវិជ្ជ​មាននៅកន្លែងការងារ មានមុខងារសម្រួលដល់សុខភាពផ្លូវចិត្ត និងសេចក្ដីពេញចិត្តចំពោះកិច្ចការដែលកំពុងតែបំពេញ។ នៅពេលមនុស្សគិតអំពីអាកប្បកិរិយាវិជ្ជមាន គេអាចនឹងគិតទៅដល់ការបង្ហាញទឹកមុខស្រស់បស់ ឬក៏ទឹកមុខសុភមង្គល ដូចជារក្សាស្នាមញញឹមនៅលើផ្ទៃមុខ ឬក៏ព្យាយាមគិតទៅដល់ភាពរីករាយ។ ប៉ុន្តែជាក់ស្តែង គឺនៅមានកត្តាច្រើនយ៉ាងជាងនេះ និងមានភាពស៊ីជម្រៅជាងទឹកមុខដែលបង្ហាញចេញ ។ ដោយឡែកអកប្បកិរិយាអវិជ្ជាមាន បានបង្កើននូវអារម្មណ៍ភ័យខ្លាច និងក្ដីមន្ទិលជាច្រើន។ តាមរយៈគេហទំព័រ When I Work បានបង្ហាញគន្លឹះ៤ចំណុច ដែលជំរុញឱ្យមានអាកប្បកិរិយាវិជ្ជមាន ឬក៏ផ្នត់គំនិតវិជ្ជមាននៅកន្លែងការងារ។

១. នៅក្បែរមនុស្សមានផ្នត់គំនិតវិជ្ជមាន ៖ មនុស្សដែលអ្នកនៅក្បែរជារឿយៗ បានជះឥទ្ធិពលទៅកាន់អ្នក ដូចជាប្រសិនបើអ្នក​តែងតែនៅក្បែរមនុស្សអវិជ្ជមាន រអ៊ូរទាំជាប្រចាំ មិនយូរមិនឆាប់ អ្នកអាចនឹងក្លាយជាមនុស្សរអ៊ូរទាំដោយគ្មាន​ដំណោះស្រាយ​ដូចគ្នា ហើយតែងតែមើលពិភពលោកក្នុងផ្លូវអវិជ្ជមានជានិច្ច។ ក្នុងករណីខ្លះ អ្នកអាចនឹងគិតថា អ្នកមានថាមពល និងមានលទ្ធភាពគ្រប់គ្រាន់ដើម្បីផ្លាស់ប្តូរភាពអវិជ្ជមានបាន ប៉ុន្តែវាមិនអាចសម្រេចបានទាំងស្រុងនោះទេ។ ដូច្នេះព្យាយាមផ្សារភ្ជាប់ទំនាក់ទំនង ជាមួយមនុស្សដែលចេះពេញចិត្តជាមួយនឹងការងារ មនុស្សមានគំនិតថ្មីៗ ទស្សនៈទូលំទូលាយ និងកិច្ចការជាច្រើនដែលនាំមកនូវភាពរីកចម្រើន។ ដែលកត្តាទាំងនេះហើយបានរួមចំណែក បង្កើនបាននៅទស្សនៈឆ្ពោះទៅមុខកំឡុងពេលបំពេញកិច្ចការ។ ទោះបីជាមិនអាចជ្រើសប្រភេទមនុស្សដែលស្របនឹងទស្សនៈវិស័យដែលអ្នករំពឹងចង់បាន ប៉ុន្តែការវិនិយាគចំណាយពេលជាមួយនរណា គឺជាអ្វីដែលអ្នកអាចជ្រើសបាន។

២. បញ្ចូលទស្សនៈវិជ្ជមានទៅក្នុងការគិត ៖ ការស្តាប់ចម្រៀងល្អៗ ការស្តាប់សៀវភៅល្អៗកំឡុងពេលធ្វើដំណើរទៅកន្លែងការងារ ការអានសៀវភៅដែលផ្តល់នូវថាមពលជំរុញចិត្ត ឬក៏មើលវីឌេអូ ឬទស្សនាភាពយន្តនានា ដែលជួយអភិវឌ្ឍន៍ទាំងស្មារតី និងការមើលពិភពលោកក្នុងផ្លូវមួយដែលអាចបន្តដំណើរទៅមុខរួច នោះគឺចាត់ទុក​ក្នុងការ​បញ្ចូលផ្នត់គំនិតវិជ្ជមានហើយ។

៣. គ្រប់គ្រងការប្រើប្រាស់ពាក្យសម្តី ៖ ហ្វឹកហាត់ឱ្យស្ទាត់នូវការប្រើប្រាស់ប្រយោគទៅកាន់ខ្លួនឯង និងអ្នកដទៃប្រកបដោយវិចារណញ្ញាណ ដោយមានការទុកចន្លោះគិតក្នុងរយៈពេលយូរ មុននឹងនិយាយទៅកាន់អ្នកដទៃ។ ការពិចារណាចំពោះពាក្យសម្តីដែលខ្លួនប្រើរាល់ថ្ងៃមានភាពសំខាន់ត្រង់ថា បានជះឥទ្ធិពលវិជ្ជមានចំពោះការងារ និងមនុស្សជុំវិញខ្លួន។

៤. បង្កើតទម្លាប់ប្រចាំថ្ងៃ ៖ មិនពិបាកអ្វីពេកនោះទេ ដោយគ្រាន់តែគិតអំពីទម្លាប់ប្រចាំថ្ងៃនៅកន្លែងធ្វើការ ប៉ុន្តែវាក៏ប៉ះពាល់ទៅដល់ភាពបត់បែន។ យ៉ាងណាមិញ បើគិតអំពីភាពវិជ្ជមានក្នុងចំណុចនេះ ការមានទម្លាប់ និងវិន័យដ៏តឹងតែង គឺជារចនាសម្ព័ន្ធក្នុងការឈានជើងទៅសម្រេចគោលដៅ និងបញ្ចប់ទាំងកិច្ចការធំតូច ក្នុងថេរវេលាមួយមានកំណត់ និងជាការជំរុញចិត្តចំពោះការផ្តើមការងារក្នុងថ្ងៃថ្មី។ មានមនុសជាច្រើនមានអាការអស់កម្លាំងខ្លាំង និងមានភាពស្មុគស្មាញ បន្ទាប់ពីបញ្ចប់ការងារព្រោះនៅមានភារកិច្ចជាច្រើនមិនទាន់បានបង្ហើយ។ ដូច្នេះវាមានសារៈសំខាន់ណាស់ ដែលត្រូវបិទបញ្ចប់ថ្ងៃនីមួយៗ ដោយមានការរៀបចំ ដ៏រៀបរយ និងការត្រៀមខ្លួនសម្រាប់ថ្ងៃបន្ទាប់៕