គន្លឹះក្នុងការធ្វើបទបង្ហាញមានច្រើនប្រភេទ និងផ្អែកតាមដំណាក់កាល មិនថាការរៀបចំខ្លួន ឬប្រធានបទ ការតាំងស្មារតី វិភាគហានិភ័យទុកមុន រួមទាំងភាពបត់បែនជាដើម, យ៉ាងណា តាមរយៈគេហទំព័រ University of Sheffield បានបង្ហាញគន្លឹះ៥ចំណុចបន្ថែម ដែលនឹងជួយ​លោកអ្នក​ក្នុងការបង្កើនប្រិសិទ្ធ នៃការធ្វើបទបង្ហាញ។

១. បង្កើនការចូលរួមពីអ្នកស្តាប់ ៖ ទោះបីជាមានគំនិតច្រើន ក្នុងការអធិប្បាយពេលធ្វើបទបង្ហាញយ៉ាងណាក៏ដោយ ប៉ុន្តែដើម្បីឱ្យមានប្រសិទ្ធភាពទៅមុខបាន លុះត្រាណាតែបុគ្គលដែលជាអ្នកធ្វើបទបង្ហាញ អាចប្រមូលចំណាប់អារម្មណ៍អ្នកស្តាប់ឱ្យនៅក្នុងបច្ចុប្បន្នភាពបាន ការមិនយកចិត្តទុកដាក់ចំពោះអ្នកចូលរួម បង្កឱ្យការជជែក ឬការអធិប្បាយមិនឆ្លើយតបនឹងវត្ថុបំណង ដែលនេះជាហានិភ័យមួយក្នុងចំណោមហានិភ័យដទៃទៀត។ ដើម្បីរក្សាចំណាប់អារម្មណ៍បាន គួរគិតអំពីការបន្ថែមករណីសិក្សាណាមួយកំឡុងពេលបញ្ជូនសារ តាមរយៈការធ្វើបទបង្ហាញ មួយវិញទៀតអាចប្រើប្រាស់វីឌេអូ ឬក៏រូបភាព និងសាច់រឿងកំប្លែងណាមួយ ដែលអាចអន្ទងឱ្យអ្នកចូលរួមទទួលបានការកម្សាន្តខ្លះៗ។ ការទាញចំណាប់អារម្មណ៍អ្នកស្តាប់ គួរព្យាយាមធ្វើឱ្យបានមុនពេលអ្នកស្តាប់ចាប់ផ្តើមបង្ហាញភាពធុញទ្រាន់។

២. សម្លឹងទៅកាន់ អ្នកចូលរួមស្តាប់ ៖ វិធីសាស្រ្តមួយ ដែលអាចរក្សាស្មារតីបច្ចុប្បន្នភាពអ្នកស្តាប់ គឺការសម្លឹងទៅកាន់កែវភ្នែករបស់អ្នកស្តាប់ខណៈពេលធ្វើបទបង្ហាញ ឬក៏អធិប្បាយសាច់រឿង ដែលពាក់ព័ន្ធនឹងអ្នកស្តាប់បន្តិចសិន មិនថាបែបផ្លូវការ ឬក៏បែបឯកជននោះទេ ប៉ុន្តែកុំប្រើពេលវែងពេក។ ហើយពេលខ្លះគ្រាន់តែប្រើប្រាស់ ក្រសែភ្នែក ក៏អាចធ្វើឱ្យអ្នកស្តាប់មានអារម្មណ៍ថាខ្លួនត្រូវបានយកចិត្តទុកដាក់ និងមិនទុកនរណាម្នាក់ចោល។

៣. បង្កើតស្លាយដែលមានភាពសាមញ្ញ ៖ ទោះបីជាមិនតម្រូវឱ្យធ្វើស្លាយ ឬមានភាពចាំបាច់នៃការផ្តល់ជាស្លាយកំឡុងពេលធ្វើបទបង្ហាញក៏ដោយ ការបង្កើតស្លាយដែលមានលក្ខណៈសាមញ្ញ បាននាំឱ្យបទបង្ហាញមានប្រសិទ្ធភាព និងការសង្ខេបមួយដែលផ្តល់ឱ្យអ្នកស្តាប់ មានភាពងាយស្រួលក្នុងការតាមឱ្យទាន់ប្រធានបទ ដែលកំពុងតែអធិប្បាយ។ គួរមានរូបភាពភ្ជាប់ជាមួយស្លាយ និងការប្រើប្រាស់តែខ្លឹមសារសំខាន់ៗនៅក្នុងស្លាយ រួមទាំងជៀសវាងការប្រើប្រាស់អក្សរសុទ្ធសាធ ឬការប្រើពណ៌ស្លាយមិនច្បាស់ ជារួមធ្វើយ៉ាងណាឱ្យស្លាយមិនពិបាកក្នុងការសម្លឹងមើល។

៤. មិនគួរផ្អាក ឬបង្កការរំខានពេលកំពុងអធិប្បាយ ៖ សំឡេងបែបស្ទាក់ស្ទើរ អ៎ ! អឺ ជាចំណុចដែលមនុស្សស្ទើរតែគ្រប់គ្នា បានឆ្លងកាត់​ គ្រាន់តែតិច ឬច្រើនប៉ុណ្ណោះ ហើយពេលខ្លះដឹងដែរ ប៉ុន្តែមិនដឹងបញ្ឈប់ដោយរបៀបណា? ជាទូទៅយើងប្រហែលជាប្រើប្រាស់វា ភាគច្រើនពេលនៅជាមួយសមាជិកគ្រួសារ ឬក៏មិត្តស្និទស្នាល ព្រោះអាចទុកចន្លោះឱ្យខ្លួនឯងគិតបានខ្លះ មុននឹងឆ្លើយតប។ ប៉ុន្តែការប្រើសម្លេងពេលធ្វើបទបង្ហាញ អ៎ ! អឺ បានបង្ហាញអំពីភាពខ្វះខាតទំនុកចិត្តចំពោះសមត្ថភាពខ្លួនឯង។ គួរប្រើប្រាស់ភាសាបែបនេះតែក្នុងករណី ដែលមិនច្បាស់ទៅលើចំណុចណាមួយ។ យ៉ាងណាក៏ដោយ ប្រសិនបើអ្នកបានអនុវត្តន៍ និងសិក្សាស្រាវជ្រាវបន្ថែម នោះអ្នកនឹងមានភាពងាយស្រួលដើម្បីដឹងថា តើអ្វីដែលគួរនិយាយ និងអ្វីដែលមិនគួរនិយាយ រួមទាំងមានការយកចិត្តទុកដាក់ពីអ្នកស្តាប់បានច្រើនជាងមុន ក៏ដូចជាអភិវឌ្ឍន៍ទំនុកចិត្ត ចំណេះដឹង និងភាពទាក់ទាញ។

៥. មានភាពជាខ្លួនឯង ៖ ចំណុចដែលសំខាន់ គឺមានភាពជាខ្លួនឯង បង្ហាញសិល្បៈការអធិប្បាយបែបធម្មជាតិដែលខ្លួនមាន។ យ៉ាងណាក៏ដោយ មិនមានអ្វីខុសទាស់ទេ ដែលត្រូវមើលទៅកាន់ការធ្វើបទបង្ហាញរបស់អ្នកដទៃដើម្បីរៀនសូត្របន្ថែម បន្តែកុំព្យាមយាមធ្វើត្រាប់របៀបដែលគេនិយាយទាំងស្រុង ព្រោះបទបង្ហាញគួរតែមានអ្វីខុសប្លែកពីអ្នកដទៃ និងបង្ហាញពីចំណុចពិសេស ឬភាពខ្លាំងរបស់ខ្លួនឯងឱ្យបានច្រើន៕