ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការញ៉ាំបានត្រឹមត្រូវមានឥទ្ធិពលយ៉ាងធំធេងទៅលើសមត្ថភាពបំពេញការងារ ។ ផ្ទុយទៅវិញ នៅពេលដែលអ្នកញ៉ាំអាហារមិនបានត្រឹមត្រូវ វាអាចធ្វើឱ្យអ្នកមានបញ្ហាថប់បារម្ភ ការរលាក និងថមថយថាមពលជាដើម។ ដូច្នេះ ដើម្បីពង្រឹងសមត្ថភាពផ្ដោតអារម្មណ៍ អ្នកក៏គួរគិតគូអំពីក្រុមអាហារ ដែលជំនួយការផ្ដោតអារម្មណ៍ និងការចងចាំ។ យោងតាម BetterUp បានបង្ហាញថា ការញ៉ាំអាហារ ៩ប្រភេទខាងក្រោមនេះ នឹងជួយពង្រឹងការផ្ដោតអារម្មណ៍ និងការចងចាំឱ្យកាន់តែប្រសើរឡើង។
១. ផ្លែប៊្លូបឺរី ៖ ផ្លែឈើមួយប្រភេទនេះ សម្បូរទៅដោយសារធាតុប្រឆាំងអុកស៊ីតកម្ម ដែលការពាររាងកាយពីរ៉ាឌីកាល់សេរី។ យោងតាមការស្រាវជ្រាវរបស់ Wiley Online Library បានបង្ហាញថា ការទទួលទានផ្លែប៊្លូបឺរីអាចជួយមនុស្សពេញវ័យបន្ថយល្បឿន នៃការថយចុះមុខងារយល់ដឹង និងប្រឆាំងជំងឺភ្លេចភ្លាំង។
២. ត្រីសម្បូរជាតិខ្លាញ់ ៖ ត្រីសម្បូរជាតិខ្លាញ់ ដូចជា ត្រីសាម៉ុន ត្រីធូណា ត្រីខត (Cod) និងត្រីប៉ូឡូក គឺជាអាហារ ដែលល្អបំផុតសម្រាប់ជួយពង្រឹងការផ្ដោតអារម្មណ៍។ ក្រុមត្រីប្រភេទនេះ មានផ្ទុកទៅដោយ អាស៊ីតខ្លាញ់ អូមេហ្គា 3 និង DHA ដែលល្អសម្រាប់ការបង្កើនការផ្តោតអារម្មណ៍ និងការចងចាំ។ ជាមួយគ្នានេះ អ្នកឯកទេសផ្នែកអាហាររូបត្ថម្ភ បានណែនាំឱ្យទទួលទាន ត្រីដែលមានជាតិខ្លាញ់ក្នុងមួយសប្ដាហ៍ យ៉ាងហោចណាស់ឱ្យបាន ២ដង។
៣. តែបៃតង ៖ តែបៃតងមានផ្ទុកជាតិកាហ្វេអ៊ីន និង L-theanine ដែលជួយបង្កើនអារម្មណ៍ចិត្តទុកដាក់ និងផ្តោតអារម្មណ៍។ លើសពីនេះ L-theanine ជាសារធាតុដែលធ្វើឱ្យអ្នកមានអារម្មណ៍ធូរស្រាលក្នុងរាងកាយ ហើយមានសមត្ថភាពយកចិត្តទុកនឹងការងារបានកាន់តែប្រសើរ។
៤. កាហ្វេ ៖ ការផឹកកាហ្វេនៅពេលព្រឹកអាចជួយអ្នកពង្រឹងសមត្ថភាពយកចិត្តទុក និងការផ្ដោតអារម្មណ៍។ ហេតុផលនេះហើយ ទើបធ្វើឱ្យកាហ្វេមានភាពពេញនិយមខ្លាំងក្នុងចំណោមមនុស្សពេញវ័យ។ ម្យ៉ាងទៀត យោងតាមក្រុមអ្នកស្រាវជ្រាវរបស់សាកលវិទ្យាល័យ Johns Hopkins University បានរកឃើញថា ការទទួលទានជាតិកាហ្វេអ៊ីនក៏ជួយបង្កើនការចងចាំ និងលំនឹងនៃរាងកាយផងដែរ។
៥. ស៊ុត ៖ ស៊ុតមានផ្ទុកសារធាតុ choline ដែលជាសារធាតុចិញ្ចឹម ដែលកាត់បន្ថយការរលាក និងការថយចុះនៃមុខងារយល់ដឹងរបស់ខួរក្បាល។ លើសពីនេះ នៅក្នុងស៊ុតក៏មានផ្ទុកសារធាតុ Tryptophan ដែលជួយឱ្យរាងកាយបង្កើនការផលិតអរម៉ូន Serotonin ផងដែរ។ អរម៉ូននេះ មានតួនាទីធ្វើឱ្យអារម្មណ៍របស់អ្នកប្រសើរឡើង និងគេងលក់ស្រួល។
៦. គ្រាប់ផ្លែឈើ (Nut) ៖ គ្រាប់ផ្លែឈើមានផ្ទុកនូវអាស៊ីតខ្លាញ់អូមេហ្គា3 ដែលមានសារៈសំខាន់សម្រាប់មុខងារយល់ដឹងរបស់ខ្លួនក្បាល។ អាហារប្រភេទនេះ មានផ្ទុកនូវសារធាតុ ទង់ដែង ម៉ង់ហ្គាណែស ស័ង្កសី និងសេលេញ៉ូម ដែលសុទ្ធសឹងតែជាសារធាតុចិញ្ចឹម ដែលនាំឱ្យមុខងារប្រព័ន្ធប្រសាទឱ្យមានសុខភាពល្អ។
៧. គ្រាប់ល្ពៅ (Pumpkin Seeds) ៖ គ្រាប់ល្ពៅ មានផ្ទុកនូវសារធាតុស័ង្កសី ដែលជាសារធាតុចិញ្ចឹមជួយសម្រួលដល់ការរំលាយអាហារ និងប្រព័ន្ធភាពស៊ាំក្នុងរាងកាយ។ លើសពីនេះ ការញ៉ាំគ្រាប់ល្ពៅជាអាហារសម្រន់ នៅពេលអផ្សុក ក៏អាចជួយពង្រឹងការចងចាំ និងការគិតរបស់អ្នកផងដែរ។
៨. បន្លែបៃតង ៖ ប្រភេទបន្លែបៃតង ដូចជា សាឡាត់ ខាត់ណា ស្ពែក្រញ៉ាញ់ និងប្រូខូលី ជាដើម គឺជាប្រភពថាមពលដ៏អស្ចារ្យ។ អាហារប្រភេទនេះ សម្បូរទៅដោយសារធាតុចិញ្ចឹមសំខាន់ៗដូចជា វីតាមីន K, Lutien, phylloquinone, និង nitrate ដែលអាចជួយអ្នកឱ្យផ្តោតអារម្មណ៍បំពេញការងារបានល្អ ប្រឆាំងនឹងជំងឺវង្វេង(dementia) និងជំងឺភ្លេចភ្លាំង(Alzheimer)។
៩. សូកូឡាខ្មៅ ៖ ដោយសារតែមានផ្ទុកនូវសារធាតុកាហ្វេអ៊ីន សូកូឡាខ្មៅគឺជាអាហារដែលល្អឥតខ្ចោះសម្រាប់ការពង្រឹងការផ្តោតអារម្មណ៍ និងមុខងារចងចាំរបស់អ្នក។ យ៉ាងណាមិញ ការញ៉ាំសូកូខ្មៅច្រើនពេក ក៏អាចប៉ះពាល់ដល់សុខភាពរបស់អ្នកផងដែរ៕
