ភ្នំពេញ – ជាធម្មតានៅពេលដាច់ឆ្នាំម្តងៗយើងតែងតែគិតថា តើឆ្នាំថ្មីខាងមុខនេះគួរតែធ្វើអ្វីខ្លះ? គួរតែសម្រេចរឿងណាខ្លះ? តែមិនដែលសួរទេថា តើកាលពីឆ្នាំចាស់ដែលកន្លងផុតទៅនោះយ៉ាងម៉េចហើយ? តើមានអី្វកើតឡើងចំពោះយើងខ្លះ ? ដើម្បីឆ្លើយនឹងសំណួរនេះ អ្នកស្រី គីម ស៊ីដដាវីស អ្នកនិយាយសាធារណៈ និងជាគ្រូបង្រៀនមុខវិជ្ជាជំនាញគ្រប់គ្រងនៅសា​​កល​វិទ្យាល័យភូមិន្ទភ្នំពេញ បានប្រាប់ពីរឿងមួយចំនួនដែលអ្នកត្រូវដឹងមុនចាប់ផ្តើមគម្រោងឆ្នាំថ្មី។

ខាងក្រោមនេះ អ្នកអាចសាកល្បងមកគិត និងនិយាយពីរឿងចាស់ៗសិន មុននឹងចាប់ផ្ដើមឆ្នាំថ្មី រួមមាន៖

១-  ពិនិត្យមើលថា តើរយៈពេលមួយឆ្នាំកន្លងមកនេះអ្នកមានអ្វីផ្លាស់ប្តូរខ្លះ? ៖ ការផ្លាស់ប្តូរ​មិនថារូបរាង លុយកាក់ ចំណេះដឹង ឬអ្វីផ្សេងៗនោះទេ ហើយការផ្លាស់ប្តូរនៅត្រង់ចំនុចនេះនិយាយគ្រប់ការផ្លាស់ប្តូរទាំងអស់ មិនថារឿងល្អ និងរឿងមិនល្អ មិនថារឿងតូច និងរឿងធំនោះទេ អញ្ចឹងសាកល្បងត្រួតពិនិត្យមើលជាមួយគ្នាថា តើខ្លួនឯងមានការប្រែប្រួលកម្រិតណា រីកចម្រើនទេ ឬក៏នៅដដែលដើម្បីងាយស្រួលនូវក្នុងការរៀបចំផែនការថ្មីសម្រាប់ឆ្នាំក្រោយ។

២- សរសេរនូវភាពជោគជ័យដែលអ្នកទទួលបានក្នុងឆ្នាំចាស់ ៖ មិនថាជោគជ័យនោះធំ  ឬតូចកម្រិតណាក៏ដោយត្រូវសរសេរមកឱ្យអស់ ឧទាហរណ៍ដូចជា សម្រកគីឡូបាន២គីឡូដោយជោគជ័យ អានសៀវភៅចប់៣ ឬ៤ក្បាល ដោយជោគជ័យ សន្សំលុយបានចំនួនណាមួយដែលអ្នកបានកំណត់ដោយជោគជ័យ ដូច្នេះគួរតែសរសេរឱ្យអស់តាំងតែពីដើមឆ្នាំ រហូតដល់ចុងឆ្នាំព្រោះវាមិនត្រឹមតែជួយឱ្យអ្នកចាប់ផ្ដើមឆ្នាំថ្មីបានយ៉ាងល្អតែប៉ុណ្ណោះទេ តែវាជួយឱ្យអ្នកមានមោទនភាពលើខ្លួនឯងទៀតផង។

៣- សរសេរឈ្មោះនរណាម្នាក់ដែលអ្នកជួបក្នុងរយៈពេលពេញមួយឆ្នាំនេះ ៖ សាកល្បងគិតបន្តិចមើលថា តើអ្នកណាខ្លះដែលតែងតែជជែកនូវរឿងរ៉ាវជីវិតជាមួយអ្នក? តើអ្នកណាខ្លះដែលតែងតែជួយដោះស្រាយនូវបញ្ហារបស់អ្នកមិនថា ពួកគាត់រវល់ប៉ុនណា? តើអ្នកណាខ្លះដែលតែងតែចំណាយពេលស្តាប់រឿងក្នុងចិត្តរបស់អ្នកទោះរឿងនោះស្តាប់ទៅហាក់បីដូចជាដដែលៗ តែគាត់នៅតែស្តាប់? តើអ្នកណាខ្លះដែលតែងតែមើលថែអ្នកមិនថា អ្នកឈឺ ឬជានោះទេ ដូចនេះបើសិនជាអ្នកដឹងហើយថាពួកគាត់គឺជាអ្នកណា កុំភ្លេចអរគុណគាត់ ព្រោះពួកគាត់នឹងហើយដែលធ្វើឱ្យយើងមានកម្លាំងចិត្ត មានថាមពល មានគំនិត មានដំណោះស្រាយសម្រាប់បន្តរដំណើរទៅឆ្នាំក្រោយបន្តទៀត។

៤- សរសេរនូវទម្លាប់អាក្រក់របស់អ្នកកាលពីឆ្នាំចាស់ ៖ ទម្លាប់អាក្រក់ណាមួយដែលអ្នកគិតថាអ្នកចង់កែប្រែវាឱ្យល្អជាងមុន ធ្វើឱ្យប្រសើរជាងឆ្នាំមុនយ៉ាងហោច បើមិនអញ្ចឹងទេទម្លាប់អាក្រក់មួយនោះ វានឹងអាចធ្វើឱ្យប៉ះពាល់ដល់អ្នកទៅថ្ងៃមុខ។ ឧទាហរណ៍ ដូចជា ទម្លាប់នៃកាគេងរបស់អ្នកដែលអ្នកតែងតែទម្លាប់គេងយប់ជ្រៅ ឬគេងមិនបានគ្រប់គ្រាន់ ដូចនេះព្យាយាមដូរដោយចូលគេងពីព្រលប់វិញ ឬគេងឱ្យបានគ្រប់ម៉ោងវិញ។

៥- សរសេរនូវជំនាញថ្មីដែលចង់រៀន ៖ សរសេរនូវជំនាញអ្វីមួយដែលអ្នកចង់ចេះ  ឬចង់ធ្វើការអភិវឌ្ឍន៍វា ឬចង់ធ្វើឱ្យវាល្អជាងឆ្នាំមុនដែលជំនាញទាងនោះអាចជាជំនាញដែលពាក់ព័ន្ធនឹងការងាររបស់អ្នក ឬអាចនឹងមិនពាក់ព័ន្ធនឹងការងាររបស់អ្នកក៏បាន សំខាន់ឱ្យតែអ្នកមានគោលបំណងចង់ចេះពីវា ឬចង់អភិវឌ្ឍន៍វាទៅថ្ងៃមុខ។

៦- សង្កេតមើលមនុស្សសំខាន់ ៖ ពិនិត្យមើលថា តើក្នុងរយះពេលមួយឆ្នាំនេះ អ្នកប្រើពេលវេលាជាមួយមនុស្សសំខាន់របស់អ្នកបានប៉ុនណា? មិនថាឪពុកម្តាយ  កូន ឬដៃគូររបស់អ្នកនោះទេ ព្រោះពេលខ្លះអ្នកភ្លេចចាប់អារម្មណ៍ ដោយចំណាយពេលច្រើននៅក្នុងការធ្វើការងារ ការរៀន ការប្រកបរបររកស៊ីរហូតដល់មិនសូវមានពេល និងប្រើពេលវេលាជាមួយមនុស្សសំខាន់របស់អ្នក អញ្ចឹងគួរតែត្រួតពិនិត្យមើលឱ្យច្បាស់ ហើយលៃលកបំពេញវាវិញនៅឆ្នាំក្រោយ ព្រោះពេលវេលាមិនចាំអ្នកទេ ប្រយ័ត្នថ្ងៃណាមួយបាត់បង់ អ្នកបានត្រឹមតែស្តាយក្រោយប៉ុណ្ណោះ។

៧- ពិនិត្យឡើងវិញអំពីពេលសម្រាក៖ ពិនិត្យមើលថា តើក្នុងរយៈពេលមួយឆ្នាំនេះ អ្នកបាននាំខ្លួនឯងទៅសម្រាកលំហែដែរ ឬអត់ មិនថាសម្រាកលំហែផ្លូវកាយ  និងសម្រាកលំហែរផ្លូវចិត្តនោះទេ ព្រោះពេលខ្លះអ្នកវក់ទៅនឹងការធ្វើការងារពេក វក់រកលុយពេក វក់រៀនពេករហូតដល់ថ្នាក់ភ្លេចសម្រាកលំហែ។ បើមិនទាន់បានសម្រាកលំហែទេ ល្មមគិតគូរហើយ គិតគូរពីខ្លួនឯងខ្លះ ដើម្បីអាចឱ្យខ្លួនឯងមានថាមពលបន្តរគោលដៅថ្មីៗទៀត៕