ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
មនុស្សគ្រប់រូបតែងតែប្រាថ្នានូវភាពជោគជ័យ មិនថានៅក្នុងការសិក្សា ក៏ដូចជាការងារនោះទេ ។ តែយ៉ាងណាក៏ដោយភាពជោគជ័យ មិនមែនចេះតែរត់មករកយើងងាយៗឡើយ ប្រសិនបើគ្មានការខិតខំប្រឹងប្រែង និងការកំណត់គោលដៅនោះ។
លោកស្រី សាត សារិទ្ធ ប្រធានផ្នែកធនធានមនុស្ស នៃក្រុមហ៊ុនកូមីនខ្មែរ បានបង្ហាញនូវគន្លឹះចំនួន៧ ដើម្បីទទួលបានជោគជ័យក្នុងជីវិតសិក្សា និងជីវិតការងារ ៖
១.កំណត់គោលដៅ ៖ បើតាមប្រសាសន៍លើកឡើងលោកស្រី សាត សារិទ្ធ ដើម្បីឱ្យជីវិតសិក្សា និងជីវិតការងារជោគជ័យ ជាដំបូងចាំបាច់ត្រូវកំណត់គោលដៅជាមុនសិនថា តើយើងចង់ក្លាយជាអ្វី ? និងចង់បន្តធ្វើអ្វីនៅថ្ងៃអនាគត? ការកំណត់គោលដៅ គឺជារឿងសំខាន់ដើម្បីសម្រេចនូវកិច្ចការអ្វីមួយ ។ បើគ្មានគោលដៅច្បាស់លាស់ទេ យើងនឹងមិនអាចម្រេចសមិទ្ធផលបានទេ។
២.ការតាំងចិត្ត ៖ ក្រោយពីបានកំណត់គោលដៅរួចហើយ រឿងបន្ទាប់ដែលត្រូវធ្វើ គឺការតាំងចិត្ត ។ ដើម្បីសម្រេចបាននូវលទ្ធផលអ្វីមួយវាជារឿងពិបាក ដូច្នេះការតាំងចិត្តព្យាយាមមិនបោះបង់ នឹងធ្វើឱ្យសម្រេចគោលដៅនៅថ្ងៃណាមួយ។
៣.ទំនុកចិត្ត ៖ ទំនុកចិត្តក៏ត្រូវចាត់ទុកថាជារឿងសំខាន់មួយផងដែរដើម្បីឆ្ពោះទៅកាន់ភាពជោគជ័យ ។ មិនថា នៅក្នុងការសិក្សា ឬការងារនោះទេ ប្រសិនបើយើងគ្មានទំនុកចិត្តលើខ្លួនឯង យើងនឹងមិនអាចសម្រេចបាននូវកិច្ចការជាទីគាប់ប្រសើរឡើយ ។ ការមានទំនុកចិត្តលើខ្លួនឯង មានទំនុកចិត្តទៅលើចំណេះ ជំនាញរបស់ខ្លួនឯង នឹងធ្វើឱ្យយើងមានភាពក្លាហាន ដើម្បីឈានទៅសម្រេចកិច្ចការ ឬគោលដៅ។
៤.ទំនាក់ទំនង ៖ ជាការកត់សម្គាល់របស់លោកស្រី សាត សារិទ្ធ មនុស្សដែលពូកែនិយាយ ពូកែមានទំនាក់ទំនង អនាគតរបស់ពួកគាត់ គឺតែងតែរុងរឿង ។ លោកស្រីបញ្ជាក់ថា ការមានទំនាក់ទំនងល្អជាមួយអ្នកនៅជុំវិញខ្លួន នៅក្នុងសង្គមការងារ គឺជារឿងសំខាន់ដែលត្រូវពង្រឹង ដោយថា ប្រសិនបើគ្មានការទំនាក់ទំនងទេ នោះគឺយើងនឹងមិនទទួលបានជោគជ័យឡើយ។
៥.មានវិន័យ ៖ អ្នកគ្មានថ្ងៃសម្រេចគោលដៅ ឬទទួលបានភាពជោគជ័យឡើយប្រសិនបើគ្មានវិន័យក្នុងខ្លួន។ ការមានវិន័យចំពោះខ្លួនឯង នឹងជំរុញអ្នកដើរទៅដល់គោលដៅ។ បើតាមការលើកឡើងរបស់លោកស្រី សារិទ្ធ បើសិនជាយើងគ្មានការដាក់វិន័យ ដាក់កំហិតចំពោះខ្លួនឯង នោះយើងនឹងមិនអាចមើលឃើញអនាគតទៅណានោះទេ ដូច្នេះវិន័យ គឺជារឿងសំខាន់។
៦.ការគិតបែបវិជ្ជមាន ៖ ប្រសិនបើអ្នកដាក់អារម្មណ៍ទៅតែរឿងល្អៗ នោះអ្នកនឹងជួបតែរឿងល្អៗ ។ នៅពេលអ្នកអនុវត្តការគិតវិជ្ជមានទៅក្នុងជីវិត និងការងារ អ្នកនឹងសំគាល់ឃើញថា ភាពជោគជ័យ ប្រែក្លាយជាងាយស្រួល មិនដូចមនុស្សជាច្រើនគិតនោះទេ។
៧.Smart Work ៖ កាលពីមុនគេតែប្រើពាក្យ Hard Working ប៉ុន្តែបច្ចុប្បន្ន គេប្រើពាក្យ Smart Work វិញម្តង ។ អ្នកដែលធ្វើកិច្ចការដោយប្រើភាពវៃឆ្លាត ឬ Work Smart គឺភាគច្រើនគេចូលចិត្តស្រាវជ្រាវ ចេះអភិវឌ្ឍចំណេះដឹងរបស់ខ្លួនឯង ចេះរកវិធីដើម្បីកែលម្អការងារដើម្បីសម្រេចគោលដៅឱ្យមានប្រសិទ្ធភាពដោយប្រើរយៈពេលតិច។ ដូច្នេះប្រសិនបើយើងធ្វើកិច្ចការដោយភាពឆ្លាតវៃ នោះភាពជោគជ័យនឹងកាន់តែខិតមកជិតយើង៕
