ភ្នំពេញ – ក្រោយ​ការ​ប្រឡងបាក់ឌុបបានបញ្ចប់ ជីវិតវិទ្យាល័យក៏ត្រូវបានបញ្ចប់ដែរ ហើយ​អ្វីដែលសិស្សានុសិស្សគិតបន្តទៀតនោះ គឺការរៀនបន្តនៅសកលវិទ្យាល័យ ។ ប្រសិនបើសិស្សានុសិស្សចង់មកបន្តការសិក្សានៅសកលវិទ្យាល័យដែលនៅឆ្ងាយពីផ្ទះ គឺគួរ​តែមានការត្រៀមខ្លួន និងរៀបចំខ្លួនជាមុនឱ្យបានរួចរាល់ ព្រោះជាការបើកទំព័រជីវិតថ្មីសម្រាប់ជីវិត ។

កញ្ញា លុយ សុភី ជាអតីតសិស្សនិទ្ទេស A ឆ្នាំ២០២១ នៃវិទ្យាល័យហ៊ុនសែនគរ ខេត្តកំពង់ចាម បច្ចុប្បន្នជានិស្សិតឆ្នាំទី២ ជំនាន់ទី១នៃវិទ្យាស្ថានស៊ីអ៊ីអូ និងជាក្រុមការងារអ្នកបន្តវេន បានចែករំលែកបទពិសោធន៍មួយចំនួនដែលសិក្សានុសិស្សគួររៀបចំខ្លួនមុនពេលមករៀនឆ្ងាយពីផ្ទះ ដោយ​ក្នុង​នោះរួមមាន៖

ទី១. ត្រូវដឹងពីគោលបំណងជាមុនសិន ៖ សិស្សានុសិស្សទាំងអស់ត្រូវដឹងពីគោលបំណងរបស់ខ្លួនថា មករៀននៅភ្នំពេញ ឬតាមបណ្តាខេត្តក្រុង គោលបំណងចង់បានអ្វីត្រឡប់ទៅស្រុកវិញ? ជៀសវាងមករៀនឱ្យតែបាត់ពីផ្ទះ ឱ្យតែគេសរសើរថារៀនបានខ្ពង់ខ្ពស់ទាំងដែលខ្លួនឯងមិនទទួលបានអ្វីមកវិញទាល់តែសោះ។ ចំណុចនេះ មានន័យថា ប្រសិនបើសិស្សានុសិស្សឡើងមករៀនដោយគ្មានគោលបំណងជាក់លាក់ នោះនឹងនាំឱ្យខាតពេលវេលា ខាតថវិកា ចំនាយលើថ្លៃសិក្សា។

ទី២. គិតគូរឱ្យបានល្អិតល្អន់អំពីការជ្រើសរើសជំនាញ និងសកលវិទ្យាល័យ ៖ ត្រង់ចំណុចនេះ សិស្សានុសិស្សត្រូវគិតគូរឱ្យបានល្អិតល្អន់អំពីការជ្រើសរើសជំនាញ និងសកលវិទ្យាល័យដែលខ្លួនចង់បន្តការសិក្សាឱ្យបានត្រឹមត្រូវ ជៀសវាងរើសជំនាញខុស។ លើសពីនេះ គួរជ្រើសរើសជំនាញដែលខ្លួនស្រឡាញ់ទើបជាការល្អ ព្រោះបើបន្តរៀនជំនាញដែលខ្លួនមិនស្រឡាញ់អាចធ្វើឱ្យខាតពេលវេលាសិក្សា និងចំណាយធនធានច្រើន។

៣. រកកន្លែងស្នាក់នៅ៖ ក្រោយពីដឹងគោលបំណង រើសជំនាញ រើសសាលាបានហើយ អ្វីដែលសិស្សានុសិស្សគួរធ្វើនោះ គឺរកកន្លែងស្នាក់នៅ និងរកអ្នកស្នាក់នៅជាមួយ ដោយកុំនៅបន្ទប់តែម្នាក់ឯងទាំងដែលគ្មានមិត្តភក្តិ បងប្អូន ឬអ្នកស្គាល់នៅក្បែរនោះឱ្យសោះ ខ្លាចក្រែងនៅពេលខ្យល់ចាប់ ឈឺ គ្មានអ្នកណាជួយមើលថែ។ ជាពិសេស គួរស្វែងរកបន្ទប់ស្នាក់នៅដែលនៅជិតសាកលវិទ្យាល័យដើម្បីងាយស្រួលក្នុងការទៅរៀន មិនខាតពេលស្ទះចរាចរណ៍ និងអាចជិះកង់ទៅរៀនក៏បាន។

៤. ត្រៀមថ្នាំសង្កូវ៖ មករៀនឆ្ងាយពីផ្ទះ ឆ្ងាយឪពុកម្ដាយ ទាមទារឱ្យមានភាពឯករាជ្យជាងមុន និងម្ចាស់ការលើខ្លួនឯង មានន័យថា ជួបបញ្ហាត្រូវចេះរកដំណោះស្រាយដោយខ្លួនឯង។ ទន្ទឹមគ្នានេះ ត្រូវត្រៀមសម្ភារៈដែលត្រូវប្រើប្រាស់ប្រចាំថ្ងៃ ហើយអ្វីដែលសំខាន់គឺថ្នាំសង្កូវ ត្រូវមាននៅក្នុងបន្ទប់កុំឱ្យដាច់ ព្រោះប្រសិនបើឈឺនៅពេលយប់ព្រលប់គឺនឹងពិបាកចេញទៅទិញនៅខាងក្រៅ។

៥. បង្កើតទំនាក់ទំនងល្អ៖ ត្រូវបង្កើតទំនាក់ទំនងល្អជាមួយមនុស្សថ្មីៗឱ្យបានច្រើន គឺស៊ូឱ្យមានអ្នកស្រឡាញ់ច្រើនជាងអ្នកស្អប់។ លើសពីនេះ រាប់អានក៏ត្រូវមើលដែរថា មនុស្សបែបណាគួរសេពគប់ជាមួយ មនុស្សបែបណាគួរជៀសវាង ប្រយ័ត្នគ្រោះថ្នាក់នៃការរាប់អាន។

អតីតសិស្សនិទ្ទេស A ឆ្នាំ២០២១ កញ្ញា លុយ សុភី ក៏បានលើកទឹកចិត្តដល់ប្អូនៗដែលឡើងមករៀនឆ្ងាយពីផ្ទះត្រូវប្តេជ្ញាចិត្តថា ត្រូវតែតស៊ូ ទោះបីមានឧបសគ្គអ្វីក៏ដោយកុំចុះចាញ់ ព្រោះជីវិតរស់នៅឆ្ងាយពីផ្ទះមិនងាយស្រួលនោះទេ  ខុសប្លែកគ្នាស្ទើរតែ៣៦០ដឺក្រេ នឹកផ្ទះក៏នឹក ចុងខែដាច់លុយចាយក៏មាន។ ប៉ុន្តែជីវិតត្រូវតែឯករាជ្យ ព្រោះនៅមានរឿងច្រើនដែលប្អូនៗត្រូវឆ្លងកាត់ ដូច្នេះប្អូនៗត្រូវតែតាំងចិត្តឱ្យបានខ្ពស់បំផុតទើបអាចឆ្លងផុតបាន និងត្រូវចងចាំថា គេអាចធ្វើបាន យើងក៏អាចធ្វើបាន៕