ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងនាមជាសិស្សនិស្សិត ការគ្រប់គ្រងពេលវេលាជាជំនាញសំខាន់មួយដើម្បីឈានទៅរកភាពជោគជ័យក្នុងការសិក្សា។ ការគ្រប់គ្រងពេលវេលាបានល្អ ក៏ជួយឱ្យសិស្សនិស្សិតក្នុងការបែងចែកពេលវេលាសម្រាប់ធ្វើការងារដែលជាចំណង់ចំណូលចិត្ត ដែលជួយដល់ការថែរក្សាសុខភាពផ្លូវចិត្តផងដែរ។
មានកម្មវិធីទូរស័ព្ទជាច្រើនត្រូវបានបង្កើតឡើងដើម្បីជួយបង្កើនផលិតភាពដល់អ្នកប្រើប្រាស់ តែក្នុងអត្ថបទនេះ យើងសូមណែនាំកម្មវិធីទូរស័ព្ទចំនួន៥ ដែលសិស្សនិស្សិតអាចយកទៅប្រើប្រាស់ដើម្បីជាជំនួយក្នុងការគ្រប់គ្រងពេលវេលា ធ្វើកំណត់ចំណាំ ក៏ដូចជាការផ្តោតអារម្មណ៍។
១. Google Calendar ៖ គឺជាកម្មវិធីសាមញ្ញ ដែលអនុញ្ញាតឱ្យសិស្សនិស្សិតរៀបចំពេលវេលានៅក្នុងប្រតិទិនឌីជីថល ដូចជាពេលណាត្រូវរៀនមុខវិជ្ជាអ្វី ពេលណាត្រូវធ្វើការងារផ្ទះ ការប្រឡងជាដើម ដោយកម្មវិធីនេះ នឹងជួយក្នុងការដាស់តឿនតាមរយៈសារនៅលើទូរស័ព្ទដៃ ឬក៏អ៊ីមែលជាដើម។ បន្ថែមពីនេះ អ្នកប្រើប្រាស់ក៏អាចភ្ជាប់សម្រាប់ការជួបជុំពិភាក្សាតាមរយៈ google meet ក៏ដូចជាការបង្កើត google classroom សម្រាប់មិត្តភក្តិ ក្នុងការចែករំលែកមេរៀន និងការបង្រៀនជាដើម។
២. Microsoft To Do ៖ ជាកម្មវិធីទូរស័ព្ទដៃរបស់ក្រុមហ៊ុន Microsoft សម្រាប់ការគ្រប់គ្រងកិច្ចការ (task management), វាអាចជួយសិស្សនិស្សិតរៀបចំការងារ និងអនុវត្តការរៀនប្រកបដោយប្រសិទ្ធភាព តាមរយៈការបែងចែកការងារជាបញ្ជីផ្សេងៗដូចជា ការងារសាលា ឬការងារជាក្រុមជាដើម។ ជាមួយគ្នាកម្មវិធីនេះក៏អាចកំណត់កាលបរិច្ឆេទ ដោយកំណត់ការរំលឹក (reminders)។ សម្រាប់កម្មវិធី Microsoft To Do គឺត្រូវប្រើប្រាស់ជាមួយគណនេយ្យ របស់ Microsoft ដូច្នេះ សិស្សនិស្សិតអាចប្រើប្រាស់វាជាមួយនឹងកម្មវិធី OneNote ឬ Teams ដើម្បីងាយស្រួលក្នុងការកត់ចំណាំ ក៏ដូចជាកិច្ចពិភាក្សានៅលើអនឡាញជាមួយមិត្តភក្តិក៏បាន។
៣. Tide ៖ កម្មវិធីនេះ ត្រូវបានណែនាំ សម្រាប់សិស្សនិស្សិតដែលចង់បង្កើនការយកចិត្តទុកដាក់, កាត់បន្ថយភាពតានតឹង, និងរក្សាវិន័យក្នុងការរៀន ដូចជាកំណត់ពេលវេលារៀន២៥នាទី ហើយសម្រាក៥នាទីជាដើម, នៅពេលសម្រាក សិស្សនិស្សិតអាចកំណត់ជាសម្លេងធម្មជាតិដើម្បីរំសាយអារម្មណ៍ដូចជា រលកសមុទ្រ, ភ្លៀង, ខ្យល់ និងសំឡេងនៅព្រៃភ្នំជាដើម ដែលអាចជួយកាត់បន្ថយភាពតានតឹង។ ជាមួយគ្នានេះ Tide ក៏មាន Deep Focus Mode ដែលជួយដល់សិស្សនិស្សិតផ្ចង់អារម្មណ៍ក្នុងការសិក្សា ដោយកម្មវិធីនឹងបិទការជូនដំណឹង ក៏ដូចជាកាត់បន្ថយការរំខាននានានៅលើទូរស័ព្ទ។
៤. Notion ៖ ជាកម្មវិធីដែលអ្នកធ្វើការ និងប្រកបអាជីវកម្មជាច្រើននៅលើពិភលោកកំពុងប្រើប្រាស់ ដោយវាមានលក្ខណៈល្អជាច្រើន ដូចជាងាយស្រួលក្នុងការធ្វើកំណត់ត្រា, ងាយស្រួលក្នុងការគ្រប់គ្រងការងារជាដើម ហើយសិស្សនិស្សិត ក៏អាចប្រើប្រាស់កម្មវិធីមួយនេះ ដើម្បីគ្រប់គ្រងភារកិច្ច និងការងារសហការជាក្រុម ដើម្បីជួយសម្រួល និងបង្កើនប្រសិទ្ធភាពក្នុងការរៀន ដូចជាអាចចែករំលែក Note, Documents និងកិច្ចការស្រាវជ្រាវជាមួយមិត្តរួមថ្នាក់។
៥. Evernote ៖ ជាកម្មវិធីកត់ត្រាដែលអាចជួយសិស្សនិស្សិត ក្នុងការរៀបចំការរៀន ដូចជាកត់ត្រាមេរៀនដោយមិនចាំបាច់ប្រើប្រាស់សៀវភៅ, ក្នុងនោះក៏មានជា Tags ដើម្បីរៀបចំការកត់ត្រា ងាយស្រួលក្នុងការស្វែងរកនៅពេលក្រោយ។ ក្នុងការកត់ត្រានៅលើ Evernote សិស្សនិស្សិតក៏អាចភ្ជាប់ជាមួយរូបភាព ឯកសារ PDF ឬក៏អាចសរសេរនៅលើនោះបាន ប្រសិនបើយើងមានប៊ិចឌីជីថល៕
