ឆ្អឹងរបស់យើង គឺមានជីវិត និងជាលិកាលូតលាស់ ដូច្នេះ ការយកចិត្តទុកដាក់ចំពោះសុខភាពឆ្អឹង និងផ្ដល់សារធាតុចិញ្ចឹមឱ្យបានគ្រប់គ្រាន់ គឺជាកិច្ចការអាទិភាពដែលយើងត្រូវគិតគូរ។ ប្រសិនបើឆ្អឹងមានសុខភាពខ្សោយ និងស្រួយ យើងងាយប្រឈមនឹងហានិភ័យនៃជំងឺពុកឆ្អឹង។ ជំងឺនេះបាននិងកំពុងគំរាមកំហែងអាយុជីវិតមនុស្សរាប់លាននាក់ក្នុងមួយឆ្នាំៗ ហើយភាគច្រើនកើតមានលើស្ត្រីអស់រដូវ។ បើទោះជាជំងឺពុកឆ្អឹងងាយកើតលើមនុស្សវ័យចំណាស់ ប៉ុន្តែយើងមិនគួររងចាំដល់វ័យចំណាស់ទើបថែទាំសុខភាពឆ្អឹងនោះដែរ។

មានវិធីជាច្រើន ដែលយើងអាចអនុវត្តបាន ដើម្បីឱ្យឆ្អឺងរឹងមាំ ដែលវិធីទាំងនោះរួមមាន ការហាត់ប្រាណជាទៀងទាត់ ជៀសវាងការជក់បារី សេពគ្រឿងស្រវឹង និងទទួលទានអាហារដែលមានជីវជាតិជាដើម។ ក្នុងនោះមានអាហារ និងភេសជ្ជៈ ៤ប្រភេទ ដែលល្អសម្រាប់សុខភាពឆ្អឹង៖

១. ទឹកសណ្ដែក ៖ យោងតាម NIH បានឱ្យដឹងថា មនុស្សពេញវ័យត្រូវការជាតិកាល់ស្យូម ១,៣០០មីលីក្រាមក្នុងមួយថ្ងៃ។ ក្នុងករណីដែលអ្នកអាឡែកហ្ស៊ីជាមួយទឹកដោះគោ ឬមិនអាចញ៉ាំជាតិ Lactose អ្នកអាចញ៉ាំទឹកសណ្ដែកជំនួសបាន ព្រោះវាសម្បូរទៅដោយកាល់ស្យូម ដែលមាននាទីពង្រឹងសុខភាពឆ្អឹង។ លើសពីនេះ ជាតិសណ្ដែកសៀងដែលមានក្នុងនោះ គឺជាប្រូតេអ៊ីន ដែលចូលរួមចំណែកពង្រឹងសុខភាពឆ្អឹង។ បើតាមលទ្ធផលស្រាវជ្រាវរបស់បណ្ណាល័យជាតិឱសថអាមេរិក (NLM) បានបង្ហាញថា សណ្ដែកសៀងអាចជាផ្នែកមួយនៃរបបអាហារពង្រឹងឆ្អឹង ព្រោះវាអាចជួយឱ្យសុខភាពឆ្អឹងប្រសើរឡើង និងកាត់បន្ថយហានិភ័យ នៃការបាក់ឆ្អឹង ជាពិសេសសម្រាប់ស្ត្រីពេលអស់រដូវ។

២. យ៉ាអួ ៖ បើតាមទិន្នន័យរបស់នាយកដ្ឋានកសិកម្មអាមេរិក (USDA) បានឱ្យដឹងថា យ៉ាអួមួយពែងមានផ្ទុកនូវកាល់ស្យូម ២៩៦មីលីក្រាម ដែលប្រហែលជា ២៣ភាគរយនៃតម្រូវការប្រចាំថ្ងៃរបស់មនុស្សម្នាក់។ លើសពីនេះ ទឹកដោះគោយ៉ាអួ សម្បូរទៅដោយ ប្រូតេអ៊ីន ផូស្វ័រ ស័ង្កសី និងវីតាមីន B ដែលសុទ្ធសឹងតែជាសារធាតុចិញ្ចឹមដ៏ល្អសម្រាប់ឆ្អឹង។ ជាធម្មតា ការទទួលបានជាតិកាល់ស្យូមគ្រប់គ្រាន់ គឺល្អសម្រាប់សុខភាពឆ្អឹង ប៉ុន្តែយើងក៏ត្រូវដឹងដែរថា ការទទួលកាល់ស្យូមច្រើនលើសកំណត់ ក៏អាចធ្វើឱ្យឆ្អឹងចុះខ្សោយផងដែរ។ អ្នកជំនាញលើកទឹកចិត្តឱ្យទទួលទានអាហារដែលសម្បូរជាតិកាល់ស្យូម ប៉ុន្តែសូមកុំលើសពី ១,៣០០មីលីក្រាមក្នុងមួយថ្ងៃ។

៣. ស៊ុត ៖ ស៊ុតជាប្រភពនៃប្រូតេអ៊ីន ផូស្វ័រ ម៉ាញ៉េស្យូម វីតាមីន K និងវីតាមីន D ដែលមានអត្ថប្រយោជន៍ជាច្រើនចំពោះឆ្អឹង។ ក្រៅពីនេះ វាមានសារធាតុលូធាន (ស៊ុតលឿង-Lutein) និងកូលីន (Choline) ដែលល្អសម្រាប់សុខភាពខួរក្បាល។ បើតាមការសិក្សារបស់ NIH នៅឆ្នាំ២០២១ បានរកឃើញទំនាក់ទំនងវិជ្ជមាន រវាងការទទួលទានស៊ុត និងដង់ស៊ីតេឆ្អឹង ដោយក្រុមអ្នកស្រាវជ្រាវបានចាត់ទុកថា សារធាតុកូលីន ដែលមានក្នុងស៊ុត អាចចូលរួមកាត់បន្ថយហានិភ័យនៃជំងឺពុកឆ្អឹង។ បើទោះជាស៊ុតមានអត្ថប្រយោជន៍ច្រើនចំពោះសុខភាព ប៉ុន្តែការទទួលទានស៊ុតច្រើនអាចធ្វើឱ្យមានការកើនឡើងខ្ពស់នៃជាតិកូឡេស្ដូរ៉លក្នុងរាងកាយ។ ហេតុនេះ បើតាម សមាគមន៍បេះដូងអាមេរិក (American Heart Association) បានណែនាំឱ្យទទួលទានស៊ុតតែមួយគ្រាប់ប៉ុណ្ណោះក្នុងមួយថ្ងៃ។

៤. បន្លែ និងផ្លែឈើ ៖ មានហេតុផលជាច្រើន ដែលបង្ហាញថា ការញ៉ាំបន្លែ និងផ្លែឈើជារៀងរាល់ថ្ងៃ ផ្ដល់ផលវិជ្ជមានចំពោះសុខភាពឆ្អឹង។ យោងតាម មូនិធិសុខភាពឆ្អឹង និងជំងឺពុកឆ្អឹង (The Bone Health & Osteoporosis Foundation) បានណែនាំឱ្យទទួលទានបន្លែ និងផ្លែឈើ ដែលសម្បូរទៅដោយជាតិ កាលស្យូម ម៉ាញ៉េស្យូម ប៉ូតាស្យូម វីតាមីន C និងវីតាមីន K ជាប្រចាំ ដើម្បីជំរុញឱ្យសុខភាពឆ្អឹងមានការលូតលាស់បានល្អ ដោយអាហារទាំងនោះមានដូចជា៖ បន្លែបៃតង ដំឡូងបារាំង ម្ទេសហាវ៉ៃ ស្ពែក្ដោប ក្រូច ចេក ប៉េងប៉ោះ ម្នាស់ និងស្ត្រ័របឺរី។ ការទទួលទានផ្លែឈើ និងបន្លែច្រើនប្រភេទ អាចធានាថា ឆ្អឹងរបស់អ្នកនឹងទទួលបានសារធាតុចិញ្ចឹមជាច្រើន៕