នៅក្នុងរបាយការណ៍ ដែលចេញផ្សាយកាលពីថ្ងៃចន្ទ អង្គការសុខភាពពិភពលោក (WHO) បានបញ្ជាក់ថា កម្ពុជាបាននិងកំពុងជំរុញអាទិភាពសុខភាពផ្លូវចិត្តថ្នាក់ជាតិ មុនការចាប់ផ្តើមគម្រោងពិសេសរបស់ WHO សម្រាប់សុខភាពផ្លូវចិត្តទៅទៀត។

តាមរយៈរបាយការណ៍ បានបញ្ជាក់ថា ប្រទេសកម្ពុជា បានត្រៀមខ្លួនរួចជាស្រេច ក្នុងការពង្រឹងប្រព័ន្ធសុខភាពផ្លូវចិត្តរបស់ខ្លួន តាមរយៈយុទ្ធសាស្ត្រ ដែលដឹកនាំដោយក្រសួងសុខាភិបាលកម្ពុជា និងគាំទ្រដោយអង្គការសុខភាពពិភពលោក។

ខណៈបច្ចុប្បន្ន រាជរដ្ឋាភិបាលកម្ពុជា កំពុងយកចិត្តទុកដាក់ជាចម្បងលើកិច្ចការអាទិភាពចំនួន២ និងកំពុងបង្ហាញពីសន្ទុះជោគជ័យ ដែលកិច្ចការទាំងនោះរួមមាន ៖

១. គោលការណ៍ណែនាំសម្រាប់ការប្រឹក្សាវិបត្តិតាមអ៊ីនធឺណិត

ដើម្បីឆ្លើយតបទៅនឹងតម្រូវការកើនឡើង សម្រាប់ការគាំទ្រផ្នែកសុខភាពផ្លូវចិត្ត ដែលងាយស្រួល និងទាន់ពេលវេលា កម្ពុជាបានបង្កើតគោលការណ៍ណែនាំថ្នាក់ជាតិ សម្រាប់ការប្រឹក្សាវិបត្តិតាមអ៊ីនធឺណិត។ កិច្ចការនេះ ដឹកនាំដោយក្រុមការងារបច្ចេកទេស នាយកដ្ឋានសុខភាពផ្លូវចិត្ត និងការរំលោភបំពានគ្រឿងញៀន ដោយបានបង្កើតគោលការណ៍ច្បាស់លាស់ ប្រកបដោយស្តង់ដាសីលធម៌ សម្រាប់ការគាំទ្រវិបត្តិតាមរយៈវេទិកាឌីជីថល។

គោលការណ៍នេះ ត្រូវបានគេរំពឹងថា នឹងក្លាយជាឧបករណ៍ដ៏សំខាន់ សម្រាប់ពង្រីកលទ្ធភាពទទួលបានការថែទាំសុខភាពផ្លូវចិត្ត ប្រកបដោយសុវត្ថិភាព និងឆ្លើយតប ជាពិសេសសម្រាប់ប្រជាជននៅតំបន់ដាច់ស្រយាល និងតំបន់ដែលខ្វះខាត។

២. ការបណ្ដុះបណ្ដាលផ្នែកសង្គ្រោះបឋមផ្លូវចិត្ត (PFA) សម្រាប់សាលារៀន

ដោយទទួលស្គាល់ពីតម្រូវការបន្ទាន់សម្រាប់ជំនួយសុខភាពផ្លូវចិត្ត ដែលផ្ដោតលើយុវជន នាយកដ្ឋានសុខភាពសិក្សា (SHD) នៃក្រសួងអប់រំ យុវជន និងកីឡា បានដឹកនាំកម្មវិធីបណ្ដុះបណ្ដាលផ្នែកចិត្តសាស្ត្រ (PFA) សម្រាប់សាលារៀន។ កម្មវិធីសិក្សាផ្ដល់ជូនបុគ្គលិកសាលារៀននូវជំនាញសំខាន់ៗ ដើម្បីគាំទ្រផ្នែកចិត្តសាស្ត្រកម្រិតដំបូងដល់សិស្ស ដែលរងផលប៉ះពាល់ដោយសារភាពតានតឹង ការប៉ះទង្គិចផ្លូវចិត្ត ឬវិបត្តិផ្សេងៗ។

បន្ទាប់ពីការត្រួតពិនិត្យបច្ចេកទេស និងកែលម្អកម្មវិធីសិក្សារួចរាល់ សម្រាប់ការធ្វើតេស្តសាកល្បង។ ការសាកល្បង នឹងអនុវត្តក្នុងរូបភាពទូលំទូលាយ ដោយមានគោលបំណងបញ្ចូលជំនួយសុខភាពផ្លូវចិត្តទៅក្នុងប្រព័ន្ធសុខភាពសាលារៀន ដែលមានលក្ខណៈទូលំទូលាយ ក្នុងប្រទេសកម្ពុជា។

ដោយឡែក ចំពោះគំនិតផ្ដួចផ្ដើមពិសេសរបស់ WHO សម្រាប់សុខភាពផ្លូវចិត្ត មានគោលបំណងគាំទ្រមនុស្ស ១០០លាននាក់បន្ថែមទៀត នៅទូទាំងពិភពលោក ឱ្យទទួលបានការថែទាំសុខភាពផ្លូវចិត្ត ប្រកបដោយគុណភាព តម្លៃសមរម្យ តាមរយៈការជំរុញគោលនយោបាយសុខភាពផ្លូវចិត្ត សេវាកម្ម និងសិទ្ធិមនុស្ស។

ជាមួយនឹងសមត្ថភាពដឹកនាំថ្នាក់ជាតិដ៏រឹងមាំ និងសន្ទុះបច្ចេកទេស ដែលកំពុងដំណើរការរួចហើយ កម្ពុជាស្ថិតនៅក្នុងទីតាំងល្អ ក្នុងការសម្របខ្លួន និងធ្វើមូលដ្ឋាននីយកម្មគំនិតទៅក្នុងបរិបទរបស់ខ្លួន ពោលគឺ ការកសាងប្រព័ន្ធថែទាំ ដែលមានភាពធន់ និងបរិយាប័ន្ន សម្រាប់ទាំងអស់គ្នា៕