នាយកប្រតិបតិ្តក្រុមហ៊ុន Sala លើកឡើងថា «ពិព័រណ៌ជំនាញ និងសាកលវិទ្យាល័យឆ្នាំ ២០២៤» គឺជាវេទិកាមួយ ដែលអនុញ្ញាតឱ្យសិស្សានុសិស្ស ស្វែងយល់ពីចំណូលចិត្ត ចំណាប់អារម្មណ៍ និងជំនាញដែលសក្តិសមនឹងខ្លួនឯង ដើម្បីងាយស្រួលអភិវឌ្ឍសមត្ថភាព ឱ្យអាចក្លាយខ្លួនជាធនធានមនុស្សឆ្នើមសម្រាប់សង្គមជាតិនាពេលអនាគត។

កម្មវិធី «ពិព័រណ៍ជំនាញ និងសាកលវិទ្យាល័យ» ឆ្នាំ២០២៤ បាន​ប្រព្រឹត្តទៅ​កាលពីថ្ងៃទី២២ និង​ថ្ងៃទី២៣ ខែវិច្ឆិកា កន្លងទៅនេះ នៅមជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) ក្រោមអធិបតីភាព លោក ជន់ សារ៉ន អនុប្រធាននាយកដ្ឋានតម្រង់ទិសវិជ្ជាជីវៈ នៃក្រសួងអប់រំ យុវជន និងកីឡា។

លោក សុខ លាភ នាយកប្រតិបតិ្តក្រុមហ៊ុន Sala មានប្រសាសន៍ថា ពិព័រណ៌​ដែលធ្វើ​ឡើង​រយៈពេល​២ថ្ងៃនោះ បាន​ផ្តល់​ឱកាសដល់សិស្សានុសិស្សដែលចូលរួម​ដូចជា ទទួលបានព័ត៌មានជាក់លាក់ អំពីជំនាញ ងាយស្រួលក្នុង​ការ​ជ្រើសរើស និងឱកាស ដែលពួកគេអាចសិក្សានៅវិទ្យាស្ថាន និងសាកលវិទ្យាល័យផ្សេងៗ។ លោកបន្ថែមថា នេះជាជំហានមួយក្នុងការធ្វើដំណើរ ក្រោយបញ្ចប់ការសិក្សាថ្នាក់វិទ្យាល័យ បើទោះជាបន្តការសិក្សានៅតាមគ្រឹះស្ថានឧត្តមសិក្សាក្ដី ឬក៏គ្រឹះស្ថានអប់រំផ្សេងៗក្ដី, លោកថា វេទិកានេះ គឺជាកន្លែងមួយ ដែលអាចភ្ជាប់ ដំណើរជីវិតសិស្សានុសិស្ស រវាងការសិក្សានៅវិទ្យាល័យ និងឧត្តមសិក្សា។

យុវជន រ៉ាវីស រ័ង្គវីលលីក្ស ជាសិស្ស ដែលទើបតែប្រឡងជាប់ថ្នាក់ទី១២ បានលើកឡើងថា លោកចូលរួមក្នុងកម្មវិធីនេះ ព្រោះចង់ស្វែងយល់ និងសិក្សាពីឱកាសអាហារូបករណ៍ទៅសិក្សានៅបរទេស ខណៈលោកចង់បន្តការសិក្សាជំនាញបញ្ញាសិប្បនិម្មិត (AI) នៅប្រទេសសិង្ហបុរី និងអូស្ត្រាលី។ យុវជនរូបនេះយល់ថា ការផ្ដួចផ្ដើមឱ្យមានកម្មវិធីនេះ គឺពិតជាល្អសម្រាប់យុវជន ជាពិសេសសិស្សានុសិស្សដែលកំពុងរៀននៅកម្រិតវិទ្យាល័យ និងទើបតែបញ្ចប់ការសិក្សាថ្នាក់ទី១២ ព្រោះជាធម្មតា សិស្សជាច្រើន មិនទាន់ស្គាល់ខ្លួនឯង និងដឹងច្បាស់ថា គាត់គួររៀនជំនាញអ្វី ឬក៏រៀននៅសាកលវិទ្យាល័យណានោះទេ។

យុវតី ភោគ ស្រីកែវ ដែលទើប​តែរៀន​ថ្នាក់ទី១០ នៃវិទ្យាល័យជាស៊ីមសាមគ្គី បាននិយាយថា មូលហេតុដែលជំរុញឱ្យខ្លួនចូលរួមក្នុងកម្មវិធីនេះ ព្រោះចង់ស្វែងយល់ពីខ្លួនឯងឱ្យបានកាន់តែច្បាស់ ដើម្បីងាយស្រួលជ្រើសរើសជំនាញសិក្សា បន្ទាប់ពីបញ្ចប់ថ្នាក់ទី១២ ខណៈបច្ចុប្បន្ន ខ្លួនមិនទាន់សម្រេចចិត្តថា នឹងរៀនបន្តជំនាញអ្វីនៅឡើយ។ កញ្ញាបន្តថា សិស្សានុសិស្ស ជាពិសេសសិស្សវិទ្យាល័យគួរចូលរួមកម្មវិធីនេះ ព្រោះជាឱកាសដែលអាចសិក្សាពីខ្លួនឯង ជាពិសេស គឺភាពខ្លាំង និងភាពខ្សោយរបស់ខ្លួន។ ហើយការដែលយើងស្គាល់ខ្លួនឯងច្បាស់ និងដឹងពីជំនាញ ដែលខ្លួនឯងចង់ធ្វើ គឺផ្ដល់ភាពងាយស្រួលក្នុងការកំណត់គោលដៅ ហើយដំណើរឆ្ពោះទៅកាន់គោលដៅ គឺកាន់តែងាយស្រួល។

គួរជម្រាបថា កម្មវិធីនេះ ត្រូវបានរៀបចំឡើងដោយវេទិកា Sala និងដោយធ្វើឡើងរយៈពេល ២ថ្ងៃ នៅថ្ងៃទី ២២ និង ២៣ ខែវិច្ឆិកា និងមានការគាំទ្រដោយក្រសួងអប់រំ យុវជន និងកីឡា នៅមជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) ដែលនឹងមានការចូលរួមពីសាកលវិទ្យាល័យ វិទ្យាស្ថានបណ្តុះបណ្តាលវិជ្ជាជីវៈ និងស្ថាប័នអប់រំជាង៣០។ ខណៈនេះលើកទី៤ហើយ ដែល Sala បានរៀបចំពីព័រណ៍នេះឡើង និងអនុញ្ញាតឱ្យសិស្សនិស្សិត ចូលរួមស្ដាប់វាគ្មិនបកស្រាយលើប្រធានបទផ្សេងៗ និងអាចប្រឹក្សាជំនាញអំពីរបៀបជ្រើសរើសជំនាញ និងសាកលវិទ្យាល័យ៕