ស្របទៅ​នឹង​ការវិវឌ្ឍន៍​នៃសេដ្ឋកិច្ចកម្ពុជា ការ​ដាក់ចេញ​នូវកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស ដល់យុវជន​របស់​រាជរដ្ឋាភិបាលកម្ពុជា ត្រូវ​បានអ្នកជំនាញ​សេដ្ឋកិច្ច​ចាត់ទុកថា គឺជាថ្នាលបណ្តុះបណ្តាលកម្លាំងជំនាញមួយយ៉ាងសំខាន់សម្រាប់កម្ពុជា ហើយតាមរយៈសន្ទុះកើនឡើងនៃកម្លាំងជំនាញនៅក្នុងស្រុកនេះ គឺស្របតាមរបត់ថ្មីមួយ ក្នុងការកែប្រែទិសដៅវិនិយោគបរទេសនៅកម្ពុជា ដែលនឹងអាចប្រែក្លាយខ្លួនយ៉ាងឆាប់រហ័សក្នុងការចូលរួមប្រកួតប្រជែងលំហូរវិនិយោគនៅតំបន់អាស៊ាន និងសកលលោក។

នាយកប្រតិបត្តិវិទ្យាស្ថានចក្ខុវិស័យអាស៊ី លោកបណ្ឌិត ឈាង វណ្ណារិទ្ធ បានមានប្រសាសន៍ថា កម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសរបស់រាជរដ្ឋាភិបាលកម្ពុជា បានទាក់ទាញយុវជនចូលរៀនជំនាញជាង៧មុឺននាក់ក្នុងរយៈពេលមួយ​ឆ្នាំមកនេះ ហើយ​វា​ពិត​ជា​ដំណើរ​ការ​ដ៏​គួរ​ឱ្យ​កត់​សម្គាល់ និង​ជាសមិទ្ធផល​ដ៏ល្អប្រពៃក្នុង​លក្ខខណ្ឌ​នៃ​ការ​អភិវឌ្ឍ​ជំនាញ និង​ការ​បង្កើន​ជំនាញនៅកម្ពុជា។

នាយកប្រតិបត្តិវិទ្យាស្ថានចក្ខុវិស័យអាស៊ីរូបនេះបន្តថា ការអភិវឌ្ឍន៍កម្លាំងជំនាញគឺជារឿងចាំបាច់ណាស់នៅក្នុងយុគសម័យអភិវឌ្ឍន៍សេដ្ឋកិច្ចប្រកបដោយចីរភាពនាពេលបច្ចុប្បន្ន ដែលកម្ពុជាចាំបាច់ត្រូវ​ការ​កម្លាំង​ពលកម្ម​ជំនាញ​ដើម្បី​ទាក់ទាញការវិនិយោគបរទេសបន្ថែម​ទៀត​ក្នុង​វិស័យ​ផលិតកម្ម និង​ឧស្សាហកម្ម​បច្ចេកវិទ្យា​ខ្ពស់ ដូច្នេះកម្មវិធីបណ្តុះបណ្តាលជំនាញរបស់រាជរដ្ឋាភិបាលនៅក្នុងអាណត្តិទី៧នេះនឹងក្លាយទៅជាសូចនាករមួយដ៏មានសក្តានុពល និងចម្បងក្នុងការផ្លាស់ប្តូមុខមាត់សេដ្ឋកិច្ចកម្ពុជា។

បើតាមលោកបណ្ឌិត ឈាង វណ្ណារិទ្ធ នៅក្នុងយុគសម័យសេដ្ឋកិច្ចបែបថ្មីនេះ ប្រទេសកម្ពុជាត្រូវការវិនិយោគ​ធនធាន​បន្ថែម​ទៀត​ដើម្បី​បណ្តុះបណ្តាល​យុវជន​​នូវ​ជំនាញ​អនាគត​ដែល​ឆ្លើយតប​នឹង​ទីផ្សារ​ការងារ​នា​ពេល​អនាគត ដូចជាជំនាញបច្ចេកវិទ្យា និងនវានុវត្តន៍ ក៏​ដូចជាជំនាញផ្សេងទៀត ដែលកម្ពុជាគួរតែផ្តោតបន្ថែមលើការអភិវឌ្ឍជំនាញមូលដ្ឋាន។ 

ចំណែកលោកបណ្ឌិត គី សេរីវឌ្ឍន៍ អនុប្រធានវិទ្យាស្ថានមនុស្សសាស្ត្រ និងវិទ្យាសាស្ត្រសង្គម និងជាអ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា លើកឡើងថា ការបណ្តុះបណ្តាលជំនាញវិជ្ជាជីវៈ និងបច្ចេកទេសរបស់រាជរដ្ឋាភិបាល នឹងក្លាយទៅជាចលករក្នុងការអភិវឌ្ឍសេដ្ឋកិច្ចប្រកបដោយនិរន្តរភាពរបស់កម្ពុជា ពីព្រោះកម្មវិធីបណ្តុះបណ្តាលថ្នាក់ជាតិមួយនេះបានក្លាយទៅជាថ្នាលនៃការបង្កើតកម្លាំងជំនាញជាច្រើនមុឺននាក់រួចស្រេចទៅហើយនៅក្នុងរយៈពេលមួយឆ្នាំមកនេះចាប់តាំងពីរាជរដ្ឋាភិបាលដាក់ឱ្យអនុវត្តជាផ្លូវការ។

អ្នកជំនាញសេដ្ឋកិច្ចរូបនេះបន្ថែមថា ការបណ្តុះបណ្តាលជំនាញវិជ្ជាជីវៈ និងបច្ចេកទេសមួយនេះ នឹងនាំកម្ពុជាទៅដល់ការបង្កើតកម្លាំងធនធានផលិតកម្មដ៏ខ្លាំងមួយដែលមានផលិតភាពខ្ពស់ នឹងឈានដល់អភិវឌ្ឍឧស្សាហកម្ម និងផលិតកម្មនៅកម្ពុជា ដែលជាយន្តការក្នុងការកែប្រែកម្ពុជាពីការពឹងផ្អែកលើវិស័យកសិកម្ម មកពឹងផ្អែកលើឧស្សាហកម្ម និងពីសហគ្រាសខ្នាតតូចមធ្យម មកជាឧស្សាហកម្មធន់ធ្ងន់។

បើតាមក្រសួងការងារ និងបណ្តុះបណ្តាលវិជ្ជាជីវៈ ចាប់តាំងពីរាជរដ្ឋាភិបាលកម្ពុជាបានដាក់ឱ្យអនុវត្តកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស កាលពីខែវិច្ឆិកា ឆ្នាំ២០២៣ រហូតមកដល់ខែវិច្ឆិកា ឆ្នាំ២០២៤ កម្មវិធីបណ្តុះបណ្តាលថ្នាក់ជាតិមួយនេះបានទទួលសិស្សចុះឈ្មោះចូលរៀនសរុបចំនួនជាង៧មុឺននាក់នៅទូទាំងប្រទេស។ យុវជនសិក្សាជំនាញរបស់រាជរដ្ឋាភិបាលទាំងនោះបានទទួលការងារធ្វើសមរម្យ, កំពុងចុះកម្មសិក្សានៅតាមក្រុមហ៊ុនឯកជននានាក្រោមកិច្ចសម្របសម្រួលរបស់ក្រសួងការងារ និងបណ្តុះបណ្តាលវិជ្ជាជីវៈ៕