ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ដោយមើលឃើញពីតម្រូវការកាន់តែច្រើនឡើងក្នុងការប្រើប្រាស់ភាសាចិន ក្នុងទំនាក់ទំនងការងារ និងការធ្វើពាណិជ្ជកម្ម បណ្តាញសាលារៀនវេសឡាញ និងសាលាបណ្តុះបណ្តាលស្ទេប ហ្វរវើដ អីប្រដ ស្គូល បានចាប់ដៃគ្នាក្នុងការលើកកម្ពស់គុណភាពការបណ្តុះបណ្តាលភាសាចិន ក៏ដូចជាផ្តល់ឱកាសអាហារូបករណ៍ សម្រាប់សិស្សានុសិស្សទៅសិក្សានៅប្រទេសចិន។
លោកឧកញ៉ា ប៉ិច បូឡែន អគ្គនាយកក្រុមហ៊ុនវេសឡាញ អេឌ្យូខេសិន គ្រុប មានប្រសាសន៍ថា បច្ចុប្បន្ននេះ នៅក្នុងតំបន់អាស៊ី ក៏ដូចជាអាស៊ាន ភាសាចិនកំពុងតែត្រូវបានប្រើប្រាស់យ៉ាងទូលំទូលាយក្នុងចំណោមអ្នកវិនិយោគ ប្រហាក់ប្រហែលទៅនឹងភាសាអង់គ្លេសដែលជាភាសាប្រើប្រាស់ជាសាកលផងដែរ។ ដោយមើលឃើញពីការកើនឡើងនៃការប្រើប្រាស់ភាសាចិនក្នុងទំនាក់ទំនងពាណិជ្ជកម្មនេះ ជាទិសដៅ បណ្តាញសាលារៀនវ៉េស្ទឡាញន៍ នឹងផ្តល់ជាជម្រើសសម្រាប់ប្រព័ន្ធអប់រំ៣ភាសា គឺភាសាខ្មែរដែលសាលាផ្តោតជាសំខាន់ បន្ទាប់មកភាសាអង់គ្លេស និងភាសាចិន ពោលគឺក្រោយបញ្ចប់ថ្នាក់វិទ្យាល័យ សិស្សានុសិស្សរបស់បណ្តាញសាលារៀនវ៉េស្ទឡាញន៍ មានចំណេះដឹងភាសាអង់គ្លេសស្ទាត់ជំនាញ ហើយក៏ចេះភាសាចិនអាចទំនាក់ទំនងបាន។
លោក លឹម វិទ្ធី តំណាងសាលាបណ្តុះបណ្តាលស្ទេប ហ្វរវើដ អីប្រដ ស្គូល មានប្រសាសន៍ថា បច្ចុប្បន្នប្រទេសចិន ដែលត្រូវចាត់ទុកថាជាមហាអំណាចមួយរបស់ពិភពលោក បានផ្តល់អាហារូបករណ៍ជាច្រើនសម្រាប់និស្សិតមកពីទូទាំងពិភពលោក ហើយស្របគ្នានេះ ប្រទេសជិតខាងកម្ពុជា ដែលមានវៀតណាម ឡាវ ថៃ សុទ្ធសឹងតែបានបញ្ជូនសិស្សទៅសិក្សានៅប្រទេសចិន មិនលើសពី២ម៉ឺននាក់ក្នុងប្រទេសនីមួយៗ។ បើធៀបទៅនឹងចំនួននេះ ប្រទេសកម្ពុជា គឺមាននិស្សិតទៅសិក្សានៅប្រទេសចិនតិចតួចនៅឡើយ។ យ៉ាងណាក៏ដោយ សម្រាប់ការចាប់ដៃគ្នា រវាង ស្ទេប ហ្វរវើដ អីប្រដ ស្កូល ជាមួយក្រុមហ៊ុនវេសឡាញ អេឌ្យូខេសិន គ្រុប គឺនឹងផ្តោតទៅលើ ការបង្កើនការផ្សព្វផ្សាយទៅលើឱកាសអាហារូបករណ៍ទៅដល់សិស្សានុសិស្ស, កម្មវិធីប្រឡងភាសាចិន HSK និង HKK និងកម្មវិធីផ្លាស់ប្តូរការសិក្សា ដែលនឹងជួយឱ្យសិស្សកម្ពុជាបានមើលឃើញពីការអភិវឌ្ឍនៅក្នុងប្រទេសចិន។
បើតាម លោក សរ រិទ្ធី ប្រធានសមាគមសហប្រតិបត្តិការដើម្បីជំរុញការអប់រំ កម្ពុជា អាស៊ាន-ចិន បច្ចុប្បន្ននៅលើពិភពលោក មានប្រទេសចំនួន១៨០ បានកំពុងដំណើរការបង្រៀនភាសាចិន ហើយក្នុងនោះមាន ៤១ប្រទេសបានបញ្ចូលភាសាចិននៅក្នុងប្រព័ន្ធអប់រំជាតិរបស់ខ្លួន ក្នុងនោះតាមទិន្នន័យ ពីមជ្ឈមណ្ឌលស្រាវជ្រាវនយោបាយទីផ្សារ និងអក្សរសាស្រ្ត នៃក្រសួងអប់រំចិន បានបង្ហាញថា មានសាលា និងគ្រឹះស្ថានបណ្តុះបណ្តាលគ្រប់ប្រភេទប្រមាណជាង ៨ម៉ឺនកន្លែង ដែលបានបើកកម្មវិធីសិក្សាភាសាចិន ដោយមានចំនួនសិស្សានុសិស្សដែលកំពុងរៀនភាសាចិនលើសពី ៣០លាននាក់។
បើក្រឡេកមកមើលទំនាក់ទំនងកម្ពុជា-ចិន បច្ចុប្បន្ននេះ បានឈានដល់ចំណុចកំពូលនៃប្រវត្តិសាស្រ្តនៅក្នុងទំនាក់ទំនងទ្វេភាគីកម្ពុជា-ចិន ក្រោមកិច្ចសហប្រតិបត្តិការដៃគូយុទ្ធសាស្រ្តគ្រប់ជ្រុងជ្រោយ និងការកសាងវាសនាសហគមន៍រួមគ្នា ប្រកបដោយគុណភាពខ្ពស់ កម្រិតខ្ពស់ និងស្តង់ដារខ្ពស់នៅកម្ពុជា ។ សម្រាប់លោក សរ រិទ្ធី យល់ឃើញថា ភាសាចិននឹងក្លាយទៅជាភាសាពេញនិយមនៅគ្រប់មជ្ឈដ្ឋាននាពេលអនាគត៕
