ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ក្រោយការដាក់ឱ្យអនុវត្តនូវគោលនយោបាយជាតិស្តីពីការអប់រំបណ្តុះបណ្តាលបច្ចេកទេស និងវិជ្ជាជីវៈ ឆ្នាំ២០១៧-២០២៥ បច្ចុប្បន្នកម្ពុជាបានបណ្តុះបណ្តាលអ្នកជំនាញប្រមាណ ៣០ម៉ឺននាក់ហើយ ។ នេះបើតាមការលើកឡើងក្នុងរបាយការណ៍របស់ ឯកឧត្តម អ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ ក្នុងពិធីប្រគល់សញ្ញាបត្រដល់និស្សិតវិទ្យាស្ថានជាតិពាណិជ្ជសាស្រ្ត (NIB) នៅព្រឹកថ្ងៃទី៣០ ខែមីនា ក្រោមអធិបតីភាព សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា។
ឯកឧត្តមរដ្ឋមន្រ្តីមានប្រសាសន៍ថា ការអនុវត្តគោលនយោបាយជាតិអប់រំបណ្តុះបណ្តាលបច្ចេកទេស និងវិជ្ជាជីវៈ បានធ្វើឱ្យការអប់រំបណ្តុះបណ្តាលវិជ្ជាជីវៈមានការរីកចម្រើនទាំងបរិមាណ និងគុណភាព ដោយបច្ចុប្បន្នកម្ពុជាមានគ្រឹះស្ថានបណ្តុះបណ្តាលបច្ចេកទេស និងវិជ្ជាជីវៈសរុបចំនួន ៣២៥ ក្នុងនោះគ្រឹះស្ថានសាធារណៈក្រោមឱវាទរបស់ក្រសួងមានចំនួន ៣៧។
ជាមួយនឹងការរីកចម្រើននេះ បើគិតចាប់តាំងពីឆ្នាំ២០១៨ រហូតដល់ឆ្នាំ២០២២ កម្ពុជាបានបណ្តុះបណ្តាលអ្នកជំនាញប្រមាណ ៣០ម៉ឺននាក់ ក្នុងនោះកម្រិតសញ្ញាបត្របច្ចេកទេសវិជ្ជាជីវៈ ១,២,៣ ប្រមាណ ៥ម៉ឺននាក់, សញ្ញាបត្របច្ចេកទេសជាន់ខ្ពស់ឯកទេសប្រមាណ ៣ម៉ឺននាក់, សញ្ញាបត្របច្ចេកទេសវិស្វករប្រមាណ៣ម៉ឺននាក់ និងការបណ្តុះបណ្តាលបច្ចេកទេសរយៈពេលខ្លីប្រមាណ ១៧ម៉ឺននាក់។
ពាក់ព័ន្ធនឹងការបណ្តុះបណ្តាលធនធានមនុស្សនេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ក៏បានលើកឡើងដែរថា ពីមួយថ្ងៃទៅមួយថ្ងៃ ធនធានមនុស្សសម្រាប់បម្រើឱ្យការអភិវឌ្ឍជាតិមានការកើនឡើងកាន់តែច្រើនទៅៗ ដែលទទួលបានផលប្រយោជន៍ពីការបញ្ចប់សង្រ្គាមនាំមកនូវសន្តិភាព ។ សម្តេចតេជោមានប្រសាសន៍បញ្ជាក់ថា កាលណាយើងមានអ្នកជំនាញកាន់តែច្រើន នោះអ្នកវិនិយោគទាំងក្នុងស្រុក ទាំងក្រៅស្រុក នឹងបង្កើននូវការវិនិយោគនៅក្នុងប្រទេសកម្ពុជាផងដែរ។
“យើងត្រូវតែបណ្តុះបណ្តាលជំនាញវិជ្ជាជីវៈទៅដល់យុវជនរបស់យើងឱ្យបានកាន់តែច្រើន កាលណាយុវជនយើងមានជំនាញវិជ្ជាជីវៈច្រើន ក៏ជាឱកាសមួយល្អ ខណៈដែលអ្នកវិនិយោគទាំងជាតិ និងអន្តរជាតិឱ្យកាន់តែមានចំនួនច្រើននៅកម្ពុជា”
គួរបញ្ជាក់ដែរថា ដើម្បីឆ្លើយតបទៅនឹងតម្រូវការទីផ្សារការងារ ជាពិសេស រួមចំណែកក្នុងការអភិវឌ្ឍវិស័យឧស្សាហកម្ម និងបង្កើតការងារសមរម្យ ព្រមទាំងធានាគុណភាព និងផលិតភាពខ្ពស់របស់កម្លាំងពលកម្មដែលអាចប្រកួតប្រជែងប្រសើរជាងមុនជាមួយបណ្តាប្រទេសក្នុងតំបន់ រាជរដ្ឋាភិបាលកម្ពុជាបានដាក់ចេញនូវគោលនយោបាយជាតិស្តីពីការអប់រំបណ្តុះបណ្តាលបច្ចេកទេស និងវិជ្ជាជីវៈ ឆ្នាំ២០១៧-២០២៥ ដោយមានចក្ខុវិស័យ លើកកម្ពស់ជីវភាពរស់នៅ សេចក្តីថ្លៃថ្នូររបស់ប្រជាពលរដ្ឋ បង្កើនបាននូវកម្លាំងពលកម្ម ឬធនធានមនុស្សកម្ពុជាប្រកបដោយចំណេះដឹង សមត្ថភាព ជំនាញ ឥរិយាបថការងារ សីលធម៌វិជ្ជាជីវៈ ផលិតភាពខ្ពស់ និងមានលក្ខណៈប្រកួតប្រជែងសម្រាប់ការងារពេញមួយជីវិត៕
