ក្នុងសន្និសីទសារព័ត៌មាននារសៀលថ្ងៃទី២៧ ខែតុលា ឆ្នាំ២០២៣ ឯកឧត្តម ហង់ជួន ណារ៉ុន ឧបនាយករដ្ឋមន្រ្តី និងជារដ្ឋមន្រ្តីក្រសួងអប់រំ យុវជន និងកីឡា បាន​ឱ្យ​ដឹងថា ការប្រឡងសញ្ញាបត្រមធ្យមសិក្សា​ទុតិយភូមិ ឬបាក់ឌុប ឆ្នាំ​សិក្សា​២០២២-២០២៣ ដែលមានសម័យប្រឡងថ្ងៃទី០៦ វិច្ឆិកា មានបកេ្ខជនចុះឈ្មោះប្រឡងសរុបចំនួន ១៣៧៤១២នាក់ កើនឡើង ៩២៧៧នាក់។

បើតាម​ប្រសាសន៍បញ្ជាក់របស់ ឯកឧត្តម ហង់ជួន ណារ៉ុន ចំនួនបេក្ខជនដែលចុះឈ្មោះប្រឡង​ទាំងជាង១៣ម៉ឺននាក់នេះ ក្នុងនោះបេក្ខជនថ្នាក់វិទ្យាសាស្រ្តមានចំនួន ៤១៣៧៩នាក់ បេក្ខនារី ២៤៧៨៩នាក់, បេក្ខជនថ្នាក់វិទ្យាសាស្រ្តសង្គមមានចំនួន ៩៦០៣៣នាក់​ បេក្ខនារី ៤៨៤៨៩នាក់។

សម្រាប់ការដាក់ពាក្យប្រឡង គឺមានបេក្ខជនចំណេះទូទៅ ចំនួន ១១៩៩៣៧នាក់ បេក្ខនារី ៦៤១៦៦នាក់, បេក្ខជនស្វ័យរិន មានចំនួន ១៥៥០១នាក់ បេក្ខនារី ៧៦២២នាក់, បេក្ខជនបំពេញវិជ្ជា មានចំនួន ៣៣៤២នាក់ បេក្ខនារី ១១៧២នាក់, បេក្ខជនស្វ័យនរិនបំពេញវិជ្ជា មានចំនួន ១៦៣២នាក់ បេក្ខនារី ៣១៧នាក់, បេក្ខជនដែលប្រឡងយកភាសាអង់គ្លេសជាភាសាបរទេសមានចំនួន ១៣៦៨១១នាក់ បេក្ខនារី ៧២៩១៣នាក់, បេក្ខជនដែលយកភាសាបារាំងជាភាសាបរទេស មានចំនួនត្រឹមតែ ៦០១នាក់ប៉ុណ្ណោះ ហើយបេក្ខនារីមានចំនួន ៣៦៥នាក់។ បេក្ខជនពិការ និងគរថ្លង់មានចំនួន ១៨នាក់ (បេក្ខនារី៦នាក់) ក្នុងនោះបេក្ខជនពិការភ្នែកចំនួន៦នាក់ បេក្ខជនគថ្លង់ចំនួន១២នាក់។

ដោយឡែកសម្រាប់មណ្ឌលប្រឡង ត្រូវ​បានរៀបចំប្រមូលផ្តុំនៅតាមរាជធានី និង​ទីរួមខេត្ត និងទីរួមស្រុកធំៗមួយចំនួន នៃខេត្តមួយចំនួន ដោយបែងចែកជាមណ្ឌលប្រឡងមធ្យម មណ្ឌលប្រឡងធំ និងមណ្ឌលប្រឡងតូច ទៅតាមភូមិសាស្រ្ត និង​ស្ថានភាពរបស់បេក្ខជន។ បើតាមប្រសាសន៍របស់ឯកឧត្តមរដ្ឋមន្រ្តី នៅឆ្នាំនេះ មណ្ឌលសំណេមានចំនួន ២២៧មណ្ឌល កើតឡើងចំនួន ៦មណ្ឌល ដោយសារបេក្ខជនកើនឡើង ដោយមានចំនួនថ្នាក់ត្រូវជា ៥៥៤៣បន្ទប់ ក្នុងនោះ ថ្នាក់វិទ្យាសាស្រ្តមានចំនួន ៧២មណ្ឌល និង​វិទ្យាសាស្រ្តសង្គម ១៥៥មណ្ឌល។

យ៉ាងណាក៏ដោយ​បើតាម​ប្រសាសន៍​បញ្ជាក់របស់ឯកឧត្តម ហង់ជួន ណារ៉ុន ការប្រឡង​សញ្ញាបត្រមធ្យមសិក្សា​ទុតិយភូមិ ឬបាក់ឌុប សម័យប្រឡង ៦ វិច្ឆកា ២០២៣ នឹងត្រូវប្រព្រឹត្ត​ទៅ​ដោយ​គោរព​តាម​គោលការណ៍ទាំង៤ នៃការប្រឡង គឺ គោលការណ៍ច្បាប់ យុត្តិធម៌ តម្លាភាព និង​លទ្ធផលទទួលយកបាន ពោលគឺ «អ្នកចេះជាប់»៕