ក្រសួងអប់រំ យុវជន និងកីឡា ប្រកាសជ្រើសរើសកុមារី ចូលរួមកម្មវិធីប្រកួតប្រជែងកម្រិតអន្តរជាតិ កម្មវិធីអប់រំបង្កើតហ្គេម (Virtual Global Game Jam) ឆ្នាំ២០២៥ ដែល​នឹងប្រព្រឹត្តទៅចាប់ពីថ្ងៃទី០៨ ខែសីហា ឆ្នាំ២០២៥ រហូតដល់ថ្ងៃទី១៩ ខែកញ្ញា ឆ្នាំ២០២៥។

បើតាមក្រសួងអប់រំ កម្មវិធីនេះ មានគោលបំណងដើម្បីចូលរួមគាំទ្រការអប់រំបែបឌីជីថលសម្រាប់ប្រទេសកម្ពុជា និងពង្រីកវិសាលភាព នៃការចូលរួមរបស់កុមារីឱ្យចាប់យកការសិក្សាលើជំនាញកុំព្យូទ័រ, ជំរុញលើកទឹកចិត្តកុមារីឱ្យក្លាយជាអ្នកអភិវឌ្ឍហ្គេម, អ្នកច្នៃប្រឌិត, បង្កើតដំណោះស្រាយថ្មីដោយប្រើប្រាស់ហ្គេមក្នុងការផ្សព្វផ្សាយ, ចូលរួមដោះស្រាយបញ្ហាក្នុងសហគមន៍ និងបង្ហាញលទ្ធផលសម្រេចបានរបស់កុមារី តាមរយៈកម្មវិធីប្រកួតប្រជែងអន្តរជាតិ។

សម្រាប់កម្មវិធីនេះ អង្គការ UNICEF ផ្ដល់មេរៀនទាក់ទងកម្មវិធីអប់រំបង្កើតហ្គេមនៅលើគេហទំព័រ Agora ចាប់ពីថ្ងៃ១១ ដល់២២ ខែសីហា ឆ្នាំ២០២៥ លើជំនាញបង្កើតហ្គេម ដូចជាការសរសេរកូដ ការរចនាហ្គេម ការសរសេរសាច់រឿង ការប្រើប្រាស់បញ្ញាសិប្បនិម្មិត។ បន្ថែមពីនេះទៀត វគ្គបណ្តុះបណ្តាលត្រូវបានធ្វើឡើង ចំនួនពីរលើករយៈពេល ៥ថ្ងៃ ដោយលើកទី១ ចាប់ពីថ្ងៃទី២៥ ដល់ថ្ងៃទី២៩ ខែសីហា ឆ្នាំ២០២៥ និងលើកទី២ ចាប់ពីថ្ងៃទី០១ ដល់ថ្ងៃទី០៥ ខែកញ្ញា ឆ្នាំ២០២៥។ បន្ទាប់ពីបញ្ចប់វគ្គបណ្តុះបណ្តាល ក្រុមកុមារីទាំងអស់ត្រូវបញ្ជូនស្នាដៃរបស់ក្រុមរៀងខ្លួន ដើម្បីប្រកួតប្រជែងកម្រិតសកលនៅថ្ងៃទី០៨ ដល់ថ្ងៃទី១០ ខែកញ្ញា ឆ្នាំ២០២៥។

លក្ខខណ្ឌនៃការចូលរួម ៖ ក្មេងស្រីមានអាយុចាប់ពី ១៣ ដល់ ១៩ ឆ្នាំ ត្រូវបង្កើតជាក្រុមដែលមានសមាជិកចាប់ពី ៣ ទៅ ៥នាក់ ជាសិស្សដែលកំពុងរៀននៅតាមគ្រឹះស្ថានសិក្សាសាធារណៈ ឬឯកជន មានការប្តេជ្ញាចិត្តខ្ពស់ក្នុងការប្រើប្រាស់បច្ចេកវិទ្យា និងការសិក្សាស្រាវជ្រាវ, ត្រូវចូលរួមវគ្គបណ្តុះបណ្ដាលទាំងពីរលើក ដោយ​មានការគាំទ្រពីគណៈគ្រប់គ្រងសាលារៀន អាណាព្យាបាល ឱ្យចូលរួមកម្មវិធីប្រកួតប្រជែង។

អត្ថប្រយោជន៍ទទួលបានរួមមាន ៖ អភិវឌ្ឍជំនាញបច្ចេកវិទ្យា, ភាពច្នៃប្រឌិត, ការរចនា និងសហគ្រិនភាព ផ្តល់ជំនាញដល់កុមារីកម្ពុជាដើម្បីត្រៀមខ្លួនក្នុងការដោះស្រាយបញ្ហាជុំវិញការអភិវឌ្ឍសហគមន៍ ដោយប្រើប្រាស់បច្ចេកវិទ្យាបង្ហាញពីសក្តានុពលនៃភាពជោគជ័យរបស់ស្រ្តីវ័យក្មេង លើផ្នែកបច្ចេកវិទ្យា និងសហគ្រិនភាព, ចេះធ្វើការងារជាក្រុម និងអភិវឌ្ឍបំណិនសតវត្សទី២១, ទទួលបានពានរង្វាន់ជ័យលាភីថ្នាក់អន្តរជាតិ និងទទួលបានលិខិតសរសើរ ពីក្រសួងអប់រំ យុវជន និងកីឡា។

កុមារី និងយុវនារីដែលមានចំណាប់អារម្មណ៍ចង់ចូលរួមកម្មវិធីប្រកួតប្រជែង សូមដាក់ពាក្យស្នើសុំតាមរយៈ QR Code ខាងក្រោមចាប់ពីថ្ងៃផ្សាយដំណឹងនេះតទៅរហូត ដល់ថ្ងៃទី៣១ ខែកក្កដា ឆ្នាំ២០២៥ ។

គួរជំរាបជូនថា ចាប់ពីឆ្នាំ២០២៣មក ក្រោមកិច្ចសហការ រវាងក្រសួងអប់រំ យុវជន និងកីឡា ជាមួយអង្គការយូនីសេហ្វ ប្រទេសកម្ពុជាបានអនុវត្តកម្មវិធីនេះ ក្នុង ចំណោម៨ប្រទេស រួមមានប្រទេសអាមេនី ប្រទេសប្រេស៊ីល ប្រទេសឥណ្ឌា ប្រទេសកាហ្សាក់ស្ថាន ប្រទេសម៉ារ៉ុក ប្រទេសម៉ាឡេស៊ី និងប្រទេសអាហ្វ្រិកខាងត្បូង ដែលមានអ្នកចូលរួមជាង ១៥៤ ០០០ នាក់ ជុំវិញពិភពលោក៕