ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងសមាជព្រឹទ្ធសភា-រដ្ឋសភា កាលពីពេលថ្មីៗនេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានលើកឡើងថា បញ្ហាសុវត្ថិភាពចំណីអាហារ គឺជាបញ្ហាដ៏ធំមួយ ដែលរាជរដ្ឋាភិបាលតែងយកចិត្តទុកដាក់ ដើម្បីធានាដល់ការហូបចុករបស់ប្រជាពលរដ្ឋប្រកបដោយសុវត្ថិភាព។
សម្តេចធិបតីមានប្រសាសន៍ថា បន្លែ ផ្លែឈើ ឬអាហារដែលមានសារធាតុគីមី នឹងធ្វើឱ្យប្រជាពលរដ្ឋមានបញ្ហាសុខភាពទ្រុធទ្រោម ដែលវានឹងក្លាយជាបន្ទុករយៈពេលវែង, ហេតុនេះហើយទើបរាជរដ្ឋាភិបាល តាំងតែពីអាណត្តិមុនៗ គឺតែងយកចិត្តទុកដាក់ទៅលើការគ្រប់គ្រងសុវត្ថិភាពចំណីអាហារ ដោយបានខិតខំរៀបចំការងារ និងយន្តការជាច្រើន ប៉ុន្តែក៏នៅមានភាពឆកល្វែង ដែលទាមទារឱ្យពិនិត្យមើលយន្តការនេះឡើងវិញ។
បើតាមប្រសាសន៍របស់សម្តេចនាយករដ្ឋមន្រ្តី យន្តការមួយចំនួន កំពុងត្រូវបានរាជរដ្ឋាភិបាលពិចារណាជ្រើសរើស រួមទាំងការរៀបចំយន្តការដឹកនាំសម្របសម្រួលរួម ក្នុងគោលដៅលុបបំបាត់នូវបញ្ហាជាន់គ្នា បញ្ហាឆកល្វែង ឈានទៅដល់ការបង្ការនូវបញ្ហាចំណីអាហារ ឬថ្នាំសង្កូវដែលខូចគុណភាព។ សម្តេចក៏បានបញ្ជាក់ដែរថា យន្តការនេះ មិនត្រឹមតែធានាដល់សុវត្ថិភាពនៃការហូបចុករបស់ប្រជាពលរដ្ឋ តែក៏ធានាថា ប្រព័ន្ធពាណិជ្ជកម្ម និងផលិតផល ត្រូវបានទទួលស្គាល់ពីប្រជាពលរដ្ឋ ក៏ដូចជាអន្តរជាតិ។
“អញ្ចឹងការធានារបស់យើងមិនត្រឹមតែការហូបចុករបស់យើងទេ ប៉ុន្តែធានាថាប្រព័ន្ធពាណិជ្ជកម្មរបស់យើង និងផលិតផលរបស់យើង ដែលទទួលស្គាល់ពីប្រជាពលរដ្ឋ បូកជាមួយនឹងអន្តរជាតិ គឺត្រូវធ្វើយ៉ាងណាធានានូវបច្ចេកទេសទាំងអស់ ទាំងការដាំដុះ ទាំងសុវត្ថិភាពចំណីអាហារ…”
ដោយគិតគូរចំពោះបញ្ហាសុវត្ថិភាពចំណីអាហារនេះ កាលពីដើមខែឧសភា ក្នុងពិធីប្រកាសដាក់ឱ្យអនុវត្តផែនការជាតិប្រយុទ្ធនឹងជំងឺមហារីក ២០២៥-២០៣០ សម្តេចធិបតី ក៏បានស្នើដល់ក្រសួងស្ថាប័នពាក់ព័ន្ធ ពិសេសក្រសួងពាណិជ្ជកម្ម ក្រសួងសុខាភិបាល ក្រសួងកសិកម្ម រុក្ខាប្រមាញ់ និងនេសាទ អគ្គនាយកដ្ឋានគយ និងរដ្ឋាករ និងអាជ្ញាធរពាក់ព័ន្ធ ពិនិត្យឱ្យបានតឹងរឹងចំពោះការនាំចូលបន្លែ សាច់ ការប្រើប្រាស់ជាតិគីមីផ្សេងៗឱ្យបានហ្មត់ចត់ ដើម្បីកាត់បន្ថយនូវហានិភ័យ នៃជំងឺមហារីកដោយសារអាហារូបត្ថម្ភ, ជាមួយគ្នាក្រសួងសុខាភិបាល ក៏ត្រូវសហការជាមួយក្រសួងអប់រំ ក្នុងការអប់រំនៅតាមសាលាដើម្បីឱ្យយល់ពីការបង្ការ ឬវិធីជៀសវាង។
ចំពោះបញ្ហានេះដែរ ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ក៏បានបង្ហាញពីចំណាត់ការដ៏តឹងរឹងរបស់ក្រសួងកសិកម្ម ក្នុងការទប់ស្កាត់ការនាំចូលនូវបន្លែ ផ្លែឈើ មានសារធាតុគីមី មកប្រទេសកម្ពុជា។ បើតាមប្រសាសន៍របស់ ឯកឧត្តម ឌិត ទីណា កន្លងមកនេះ ក្រសួងកសិកម្ម តែងសហការជាមួយក្រសួងពាណិជ្ជកម្ម ក៏ដូចជា អគ្គនាយកដ្ឋានការពារអ្នកប្រើប្រាស់ ដោយតែងតែយកសំណាកនៃបន្លែ ផ្លែឈើ នាំចូលពីប្រទេសជិតខាងមកពិនិត្យ មុននឹងអនុញ្ញាតឱ្យនាំចូល ដើម្បីធានាដល់សុវត្ថិភាពសុខភាពរបស់ប្រជាពលរដ្ឋ។
យោងតាមរបាយការណ៍របស់អង្គការស្បៀង និងកសិកម្ម នៃអង្គការសហប្រជាជាតិ (FAO) បានបង្ហាញថា បញ្ហាអាហារគ្មានសុវត្ថិភាព បានធ្វើឱ្យមនុស្សប្រមាណ៤២០ពាន់នាក់ បាត់បង់ជីវិតនៅទូទាំងសកលលោកជារៀងរាល់ឆ្នាំ, បញ្ហាសុវត្ថិភាពចម្ហូបអាហារនេះ ក៏បានធ្វើឱ្យប៉ះពាល់ដល់សុខភាពសាធារណៈ សេដ្ឋកិច្ច និងសូម្បីតែវិស័យទេសចរណ៍។
ក្នុងការគិតគូរពីសុវត្ថិភាពចំណីអាហារនេះ ប្រទេសកម្ពុជាកាលពីឆ្នាំ២០២២ បានបង្កើតច្បាប់ស្តីពីសុវត្ថិភាពម្ហូបអាហារ ដើម្បីការពារសុខមាភាព ជូនប្រជាពលរដ្ឋទូទៅ ហើយច្បាប់នេះ ក៏នឹងដើរតួនាទីសំខាន់ ក្នុងការួមចំណែកអភិវឌ្ឍន៍សេដ្ឋកិច្ច តាមរយៈការទាក់ទាញអ្នកវិនិយោគ និងភ្ញៀវទេសចរ៕
