ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រោយពីការប្រកួតប្រជែងដេញដោលយ៉ាងស្វិតស្វាញក្នុងវគ្គពាក់កណ្តាលផ្តាច់ព្រ័ត្រកាលពីថ្ងៃអាទិត្យ (២៩ មិថុនា) ទីបំផុតក្រសួងអប់រំ បានរកឃើញបេក្ខជនចំនួន២ក្រុម ដើម្បីបន្តចូលវគ្គផ្តាច់ព្រ័ត្រ នៃកម្មវិធីជជែកដេញដោលយុវជនថ្នាក់ជាតិ២០២៥ ដែលគ្រោងនឹងប្រារព្ធឡើងនៅថ្ងៃទី៦ ខែសីហា ឆ្នាំ២០២៥។
បេក្ខជន២ក្រុម ដែលនឹងបន្តទៅប្រកួតក្នុងវគ្គផ្ដាច់ព្រ័ត្រក្នុងកម្មវិធីជជែកដេញដោលយុវជនថ្នាក់ជាតិ២០២៥ គឺក្រុមបេក្ខជនមកពីវិទ្យាល័យពោធិ៍សាត់ ខេត្តពោធិ៍សាត់ និងក្រុមបេក្ខជនមកពីវិទ្យាល័យ សម្តេចតេជោ ហ៊ុន សែន សំពៅលូន ខេត្តបាត់ដំបង។ ក្រុមទាំង២ នឹងប្រកួតជជែកដេញដោលលើប្រធានបទ “យុវជនកម្ពុជាត្រូវមានចំណេះដឹងបញ្ញាសិប្បនិម្មិតជាអាទិភាព ដើម្បីចូលរួមប្រកបដោយប្រសិទ្ធភាពក្នុងការធ្វើពិពិទកម្មសេដ្ឋកិច្ចកម្ពុជា”។
ឯកឧត្តម សេរី ជំនះ រដ្ឋលេខាធិការ ក្រសួងអប់រំ យុវជន និងកីឡា មានប្រសាសន៍ថា កម្មវិធីជជែកដេញដោលយុវជនថ្នាក់ជាតិ រៀបចំឡើងក្នុងគោលបំណងបណ្តុះបណ្តាលសមត្ថភាពយុវជនកម្ពុជា លើបំណិនសតវត្សរ៍ទី២១ ពោលគឺពង្រឹងបំណិនស្រាវជ្រាវ បំណិនត្រឹះរឹះពិចារណា នវានុវត្តន៍ ការនិយាយជាសាធារណៈ មូលដ្ឋានចំណេះដឹង ឌីជីថល ការដោះស្រាយបញ្ហា ការធ្វើការងារជាក្រុម ការប្រាស្រ័យទាក់ទងប្រកបដោយសន្តិសហវិជ្ជមាន ដើម្បីក្លាយខ្លួនជាពលរដ្ឋល្អដែលមានទំនួលខុសត្រូវក្នុងសង្គមជាតិ។
ជាមួយគ្នានេះ ឯកឧត្តម សេរី ជំនះ ក៏សម្តែងក្តីសង្ឃឹមថា ការប្រកួតជជែកដេញដោលនេះ នឹងក្លាយជាមេរៀនដ៏ពិសេសសម្រាប់ប្អូនៗ ក្នុងការឈានជើងចូលទៅក្នុងសង្គមជាក់ស្ដែង និងក្លាយជាបទពិសោធន៍មួយដ៏អស្ចារ្យសម្រាប់អនាគតរបស់ខ្លួនផងដែរ។ “ធម្មតាការប្រកួតប្រជែងតែងមានឈ្នះ មានចាញ់ មានឱកាសឈានបន្តទៅវគ្គបន្ទាប់រៀងៗខ្លួន ដូច្នេះប្អូនៗត្រូវចាត់ទុកថា ការប្រកួតនេះ ជាបទពិសោធន៍ដ៏អស្ចារ្យ ជាមេរៀនដ៏ពិសេស ចាញ់ក្ដី ឈ្នះក្ដី យើងត្រូវព្រមឯកភាពគ្នា ទទួលស្គាលនូវលទ្ធផលទាំងអស់នោះ”។
ឯកឧត្តមរដ្ឋលេខាធិការ ក៏បានបញ្ជាក់ដែរថា សម្រាប់ការប្រកួតជជែកដេញដោលនេះ គណៈកម្មការដាក់ពិន្ទុពុំមែនផ្ដោតតែទៅលើវោហាសព្ទ សកម្មភាពក្នុងការធ្វើបទបង្ហាញ ឬការចូលរួមទះដៃអបអរសារទរថា អាចកំណត់ការចាញ់ឈ្នះនោះទេ ពោលគឺគណៈកម្មការដាក់ពិន្ទុផ្ដោតលើខ្លឹមសារប្រធានបទ ទាំងវិធីសាស្រ្តបកស្រាយ ឥរិយាបទក្នុងការសម្ដែងមតិ និងការសហការក្រុម។
សូមជំរាបជូនថា កម្មវិធីជជែកដេញដោលយុវជនថ្នាក់ជាតិ ត្រូវបានក្រសួងអប់រំ យុវជន និងកីឡា រៀបចំឡើងក្នុងគោលបំណងផ្តល់ជូននូវ «វេទិកាសម្តែងមតិរបស់យុវជនកម្ពុជា» និងជា «សង្វៀនវោហារសព្ទ» ដើម្បីបណ្តុះបណ្តាល និងពង្រឹងបំណិនស្រាវជ្រាវ ការនិយាយជាសាធារណៈ ការដោះស្រាយបញ្ហា ការធ្វើការងារជាក្រុម ការច្នៃប្រឌិត ការវិភាគ និងសំយោគ ការប្រាស្រ័យទាក់ទងប្រកបដោយសន្តិសហវិជ្ជមាន ដើម្បីអភិវឌ្ឍន៍សមត្ថភាពយុវជននៅក្នុងកម្រិតមធ្យមសិក្សាក្នុងប្រទេសកម្ពុជា ឱ្យក្លាយខ្លួនជាពលរដ្ឋ មានទំនួលខុសត្រូវក្នុងសង្គមជាតិ៕
