កាលពីដើមសប្តាហ៍នេះ នាយកដ្ឋានបរិវត្តកម្មឌីជីថល នៃក្រសួងអប់រំ យុវជន និងកីឡា បានដំឡើង និងបំពាក់ឧបករណ៍​ឌីជីថលសម្រាប់​គាំទ្រការរៀន និងបង្រៀននៅសាលារៀនបណ្ដោះអាសន្ន ក្នុងជំរំសុវត្ថិភាពចុងកាល់ និងជំរំ​សុវត្ថិភាព​វត្តបាត់ថ្កៅ។

ការបំពាក់ឧបករណ៍ឌីជីថលនេះ គឺដើម្បីធានាថា ការសិក្សា​របស់សិស្សានុសិស្ស​ដែលរងផលប៉ះពាល់ពីជម្លោះព្រំដែន នៅតែបន្ត​ដោយ​មិន​រអាក់រអួលឡើយ។ ក្នុងនោះ ក្រសួងអប់រំបានផ្តល់បន្ទប់ចល័តសម្រាប់រៀបចំជាបន្ទប់កុំព្យូទ័រចល័ត ដែលបំពាក់​នូវ​ដំណោះស្រាយ​បច្ចេកវិទ្យាសាមញ្ញទំនើប ដែលវាគឺជា​គំរូ នៃ “សាលារៀនឌីជីថលចល័ត” សម្រាប់​តំបន់​ដែលគ្មាន​អ៊ីនធឺណិត ឬមានការ​រំខាន​ដោយ​សារ​ជម្លោះ។

“សាលារៀនឌីជីថលចល័ត” នេះ រួមមានសមាសភាពដូចជា បណ្ណាល័យឌីជីថល​ក្រៅបណ្តាញ (Offline Content Server) ដែលផ្ទុកមាតិកា​សិក្សា​ទំហំ ២តេរ៉ាបៃ (សៀវភៅជាង ៣ពាន់ក្បាល និង​វីដេអូរាប់ពាន់) ដែលអនុញ្ញាត​ឱ្យ​គ្រុ និង​សិស្ស​ប្រើប្រាស់​តាមរយៈ​ Local Wi-Fi ដោយ​មិន​ចាំបាច់​មានអ៊ីនធឺណិត។ ការ​បំពាក់​គ្រឿងបរិក្ខា​របច្ចេកវិទ្យា រួមមាន​កុំព្យូទ័រ​យួរដៃ​សម្រាប់គ្រូ កុំព្យូទ័រចំនួន១០គ្រឿងសម្រាប់​សិស្ស​អនុវត្តផ្ទាល់ និង​ Smart TV សម្រាប់ជំនួយ​ដល់ការ​បង្រៀនឱ្យ​កាន់តែរស់រវើក។

ជាមួយគ្នានេះ ក្រុមការងារ ក៏​បានរៀបចំវគ្គបណ្តុះបណ្តាល​ជូនលោកគ្រូ អ្នកគ្រូ និង​សិស្សានុសិស្ស រួមទាំង​អាណាព្យាបាល ពីរបៀបប្រើប្រាស់ និង​ថែទាំឧបករណ៍ផងដែរ។

កម្មវិធីនេះ ទទួលបានកិច្ច​សហការ​ពីក្រុមហ៊ុន KOOMPI និងការគាំទ្រមូលនិធិពី ក្រុមហ៊ុន ISI Group, មូលនិធិ KMH Foundation និងអង្គការ Aide et Action (Action Education)។ ទោះយ៉ាងណា តាមរយៈបណ្តាញសង្គម ក្រសួងអប់រំ បានអំពាវនាវដល់ដៃគូអភិវឌ្ឍន៍ និង​សប្បុរសជននានា ឱ្យ​ចូលរួម​គាំទ្រ និង​ពង្រីកវិសាលភាព នៃ “សាលារៀនឌីជីថល” នេះបន្ថែមទៀត ទៅកាន់ជំរំសុវត្ថិភាពដទៃ​ទៀត ក៏​ដូចជា​សាលា​រៀន​ដាច់ស្រយាល​នៅទូទាំង​ប្រទេស ដើម្បីលុបបំបាត់​គម្លាតឌីជីថល និង​ផ្តល់សមធម៌ នៃការ​សិក្សា​សម្រាប់កុមារ​កម្ពុជា​គ្រប់រូប។

យោងតាមរបាយការណ៍របស់ក្រសួងមហាផ្ទៃ គិតត្រឹមថ្ងៃទី២៧ ខែមករា ឆ្នាំ២០២៦ នៅមានពលរដ្ឋភៀសសឹកបន្ត​ស្នាក់​អាស្រ័យតាមជំរំនានាចំនួន ១១៣ ០៤០នាក់ទៀត ក្នុងនោះ កុមារមានចំនួន ៣៧ ០៨៨នាក់៕