ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រសួងអប់រំ យុវជន និងកីឡា និងក្រសួងប្រៃសណីយ៍ និងទូរគមនាគមន៍ បានបង្ហាញពីគម្រោងសហការគ្នាក្នុងការបង្កើតមជ្ឈមណ្ឌលស្រាវជ្រាវបញ្ញាសិប្បនិម្មិត (AI) ដើម្បីជំរុញគុណភាពក្នុងវិស័យអប់រំ។
យោងតាមសេចក្តីប្រកាសរបស់ក្រសួងអប់រំ រដ្ឋមន្ត្រីនៃក្រសួងទាំងពីរបានជួបពិភាក្សាគ្នាកាលពីថ្ងៃព្រហស្បត្តិ៍ដោយបានពិភាក្សាគ្នាអំពីសារៈសំខាន់ នៃដំណើរការរបស់មជ្ឈមណ្ឌលនេះ សម្រាប់សក្តានុពលក្នុងការបង្កើនគុណភាពអប់រំ ដោយមានជំនួយពីកម្មវិធី AI សម្រាប់បង្កើតវិធីសាស្ត្របង្រៀន និងវិធីសាស្ត្ររៀនរបស់សិស្សនៅតាមសាលារៀន។
ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា លើកឡើងថា គម្រោងនេះនឹងក្លាយជាកត្តាដ៏សំខាន់ក្នុងការបង្កើនប្រសិទ្ធភាពការបង្រៀន និងការរៀនសូត្រនៅកម្ពុជាឱ្យឈានដល់កម្រិតខ្ពស់ស្របតាមនិន្នាការពិភពលោក។
ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ លើកឡើងថា ការបញ្ចូលជំនាញឌីជីថលទៅក្នុងប្រព័ន្ធអប់រំ គឺជាតម្រូវការចាំបាច់មួយសម្រាប់ការកសាងរដ្ឋាភិបាលឌីជីថល និងការអភិវឌ្ឍសេដ្ឋកិច្ចឌីជីថលរបស់ប្រទេស។
បើតាម ឯកឧត្តមបណ្ឌិត សាន វឌ្ឍនា រដ្ឋលេខាធិការ ក្រសួងអប់រំ យុវជន និងកីឡា និងជាប្រធានលេខាធិការដ្ឋានមជ្ឈមណ្ឌលសម្រាប់ការអប់រំឌីជីថល និងការអប់រំពីចម្ងាយ មជ្ឈមណ្ឌលស្រាវជ្រាវបញ្ញាសិប្បនិម្មិត (AI) គ្រោងនឹងដាក់ទីតាំងស្ថិតនៅក្នុងបរិវេណបណ្ឌិត្យសភាបច្ចេកវិទ្យាឌីជីថលកម្ពុជា ហើយមជ្ឈមណ្ឌលមួយនេះ គ្រោងនឹងប្រកាសជាផ្លូវការនៅខែវិច្ឆិកា ឆ្នាំ២០២៥ ខាងមុខនេះហើយ។
ឯកឧត្តមបណ្ឌិត សាន វឌ្ឍនា មានប្រសាសន៍ថា មជ្ឈមណ្ឌលស្រាវជ្រាវបញ្ញាសិប្បនិម្មិត (AI) នឹងជាជំនួយដល់គ្រូបង្រៀន និងសិស្សានុសិស្ស ឱ្យប្រើប្រាស់ប្រព័ន្ធបញ្ញាសិប្បនិម្មិតសមស្របនឹងសីលធម៌នៃការប្រើប្រាស់, គាំទ្រដល់ការបង្កើនគុណភាពអប់រំ ធ្វើឱ្យការរៀនសូត្រកាន់តែមានលក្ខណៈផ្ទាល់ខ្លួន និងមានប្រសិទ្ធភាព, ផ្តល់ដំណោះស្រាយនិងផលិតផលដល់គ្រូបង្រៀនក្នុងការបង្កើតមាតិកាមេរៀន ធ្វើឱ្យមេរៀនងាយស្រួលយល់ និងចំណេញពេលវេលា ក្នុងគោលដៅឱ្យគ្រូបង្រៀនមានពេលវេលាគ្រប់គ្រាន់ក្នុងការស្រាវជ្រាវ និងបណ្តុះបណ្តាលគុណភាពបង្រៀនរបស់ខ្លួន។
ជាមួយគ្នាមជ្ឈមណ្ឌលនេះ ក៏នឹងសិក្សាគំរូនៃការវិភាគទិន្នន័យ ដើម្បីវាស់ស្ទង់និងវាយតម្លៃសមត្ថភាពសិស្សលើសពីពិន្ទុរបស់សិស្ស ដូចជាការកំណត់ចំណុចខ្លាំង និងចំណុចខ្សោយ ងាយស្រួលក្នុងការពង្រឹងចំនុចខ្វះខាតរបស់សិស្ស, ផ្សារភា្ជប់ការស្រាវជ្រាវពីឧត្តមសិក្សា ជាមួយមធ្យមសិក្សា និងបឋមសិក្សាក្នុងការដាក់បញ្ចូលក្នុងកម្មវិធីអប់រំ កំណត់មុខជំនាញដែលមានសារៈសំខាន់ពាក់ព័ន្ធនឹង AI ដើម្បីឆ្លើយតបនឹងទីផ្សារការងារនាពេលបច្ចុប្បន្ន និងនាពេលអនាគត។
ក្នុងកិច្ចប្រជុំរដ្ឋមន្រ្តីអាស៊ាន ផ្នែកវិទ្យាសាស្រ្ត បច្ចេកវិទ្យា និងនវានុវត្តន៍ ថ្ងៃទី៧ មិថុនា ក្នុងខេត្តសៀមរាប សម្តេចនាយករដ្ឋមន្ត្រី ហ៊ុន ម៉ាណែត មានប្រសាសន៍ថា ការប្រើប្រាស់បញ្ញាសិប្បនិម្មិត (AI) មានសារៈសំខាន់យ៉ាងខ្លាំងដែលត្រូវជំរុញការផ្លាស់ប្តូរឥរិយាបថរបស់អ្នករៀបចំគោលនយោបាយ, អ្នកស្រាវជ្រាវ និងស្ថាប័នឯកជនផងដែរ។យ៉ាងណាក៏ដោយសម្តេចនាយករដ្ឋមន្ត្រី ទាញចំណាប់អារម្មណ៍ថា បញ្ញាសិប្បនិមិត្ត អាចបង្កការព្រួយបារម្ភ ការភ័យខ្លាចពីការរំលោភលើសិទ្ធិ និងឯកជនភាពបុគ្គលដោយសមត្ថភាពដ៏ខ្លាំងសម្បើម នៃកម្មវិធីAI នេះ។ ដូច្នេះសម្តេចក៏បានអំពាវនាវឲ្យប្រើប្រាស់បញ្ញាសិប្បនិម្មិត AI ក្នុងដែនកំណត់មួយដែលគិតគូរពីសីលធម៌ និងតម្លៃសង្គម៕
