ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
នៅក្នុងគោលដៅ នៃការសិក្សា គឺមិនត្រឹមតែឱ្យយុវជនមានចំណេះដឹងប៉ុណ្ណោះទេ ប៉ុន្តែពួកគេចាំបាច់ត្រូវតែមានបំណិន និងសហគ្រិនភាពបន្ថែមទៀត ដើម្បីអាចចេះពិចារណា ដោះស្រាយបញ្ហា មានភាពជាអ្នកដឹកនាំ អាចរស់នៅក្នុងសង្គមជាតិបាន។
ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា មានប្រសាសន៍ថា ការសិក្សារៀនសូត្រ គឺបានត្រឹមតែចំណេះ ប៉ុន្តែមិនមានបំណិនគ្រប់គ្រាន់នោះទេ ។ ឯកឧត្តមបញ្ជាក់ថា គោលដៅនៃការសិក្សា គឺត្រូវមានចំណេះដឹង វិជ្ជាសម្បទា បំណិនសម្បទារ ដែលមានដូចជា បំណិនទន់ បំណិនវិជ្ជាជីវៈ ឬចរិយាសម្បទា ដោយសរុបជារួម យើងហៅថា បំណិនសតវត្សទី២១ ដើម្បីយុវជនមានទាំងចំណេះដឹង ចេះពិចារណាដោះស្រាយបញ្ហា មានភាពជាអ្នកដឹកនាំ និងចេះបច្ចេកវិទ្យាឌីជីថលផងដែរ។
បើតាមប្រសាសន៍ ឯកឧត្តម ហង់ជួន ណារ៉ុន ពាក់ព័ន្ធជាមួយបំណិន គឺទាមទារឱ្យមានការអនុវត្ត ដោយនៅក្នុងកម្មវិធីសិក្សារបស់ក្រសួងអប់រំសម្រាប់មធ្យមសិក្សា គឺចែកចេញជាមធ្យមសិក្សាចំណេះទូទៅ និងអប់រំបច្ចេកទេស ដោយមានដូចជា បំណិនក្នុងការចិញ្ចឹមសត្វ ដាំបន្លែ ហើយបំណិនវិជ្ជាជីវៈ មានដូចជា ការកែច្នៃម្ហូបអាហារ ឬជួសជុលម៉ាស៊ីនជាដើម, ចំណែកបំណិននៅកម្រិតក្រោយមធ្យមសិក្សា ក្រសួងបានរៀបចំនៅវិទ្យាស្ថានបច្ចេកវិទ្យាកម្ពុជា ដោយមាន៥មុខជំនាញធំៗ។
ពាក់ព័ន្ធនឹងសហគ្រិនភាពវិញ នៅក្នុងកម្មវិធីសិក្សាក្រសួងតែងរៀបចំជាវេទិកាតស៊ូមតិ ឬក៏លើកជាគម្រោងណាមួយ ដែលជាការបង្រៀនសិស្សឱ្យចេះគិត ដើម្បីដោះស្រាយបញ្ហា ក៏ដូចជាការប្រើប្រាស់នូវចំណេះដឹងដើម្បីចូលរួមចំណែកនៅក្នុងការដោះស្រាយបញ្ហាជាដើម ។ តាមប្រសាសន៍របស់ ឯកឧត្តមរដ្ឋមន្រ្តីក្រសួងអប់រំ កន្លងមកក្រសួងធ្លាប់ដាក់ឱ្យមានការប្រឡងប្រណាំងជាគំនិត រៀបចំជាគំនិតដើម្បីដោះស្រាយរកទីផ្សារសម្រាប់កសិផលរបស់កសិករជាដើម ។ ហើយនៅពេលបានគំនិតហើយ គឺត្រូវប្រឡងជ្រើសរើសថា គំនិតណាដែលល្អជាងគេ ទើបចូលដល់ដំណាក់កាលរៀបចំចាត់ចែងបង្កើតជាក្រុមហ៊ុនជាក់ស្តែង។
ជារួមត្រឡប់មកវិញ បើតាមប្រសាសន៍របស់ ឯកឧត្តមបណ្ឌិតសភាចារ្យ ហង់ជួន ណារ៉ុន ប្រសិនជារៀនគ្រាន់តែដឹង ហើយមិនចេះធ្វើ គឺមិនចេះអ្វីនោះទេ ហើយការរៀនដែលធ្វើឱ្យយើងចេះបំផុតនោះ គឺការរៀនដោយខ្លួនឯង ចេះរៀនពីបរាជ័យ ។ « បើសិនជារៀន គ្រាន់តែដឹង ហើយអត់ធ្វើ គឺអត់ចេះអីទេ សំខាន់ដែលចេះបំផុត គឺរៀនដោយខ្លួនឯង បានន័យថា បរាជ័យច្រើនដងទៅ រៀនកាន់តែច្រើនដង កាន់តែចេះ…»៕
