ភ្នំពេញ – យុវជន​​ចំនួន​៧រូប ដែល​មក​ពីវិទ្យាល័យ​នានា​នៅ​ក្នុង​ប្រទេស​កម្ពុជា នឹងទៅ​ចូលរួម​កម្មវិធីអ្នកដឹកនាំយុវជនអាស៊ី​ ឆ្នាំ២០២៣ ដែលគ្រោង​​ប្រព្រឹត្ត​ទៅ​ពីថ្ងៃទី២១ រហូត​ដល់ថ្ងៃទី២៦ ខែសីហា នៅទីក្រុងតូក្យូ ប្រទេស​ជប៉ុន ក្រោម​មូលបទ “The Future of Food from the Perspective of Sustainable Food Consumption”។

យុវតី ឆាយ ពេជជេស៊ីកា អាយុ​១៧ឆ្នាំ មកពីសាលារៀនវ៉េស្ទឡាញន៍ សាខាសន្ធរម៉ុក ដែលជាបេក្ខជនមួយរូបជាប់ក្នុងការ​ជ្រើសរើសជាតំណាងយុវជន​កម្ពុជា ទៅ​ចូលរួម​កម្មវិធី «អ្នកដឹកនាំយុវជនអាស៊ី២០២៣» និយាយថា ខ្លួន​ពិតជាមានអារម្មណ៍រំភើប និងមានមោទនភាពក្នុងនាមជាយុវជនតំណាងកម្ពុជា ចូលរួមជាមួយ​យុវជន​ផ្សេងៗ​ទៀត​មក​ពី​តំបន់អាស៊ី ។

បើតាម ពេជជេស៊ីកា កម្មវិធី អ្នកដឹកនាំយុវជនអាស៊ី​២០២៣ នេះ រូបនាង រួមជាមួយ​យុវជន​កម្ពុជាផ្សេងទៀត នឹង​ចូលរួមធ្វើការជជែកដេញដោល ឬពិភាក្សា​ជាមួយ​យុវជន​ពីតំបន់អាស៊ីទាក់ទងទៅនឹងបញ្ហាបរិស្ថាន ក៏​ដូចជា​សុវត្ថិភាពចំណីអាហារជាដើម។ ជាមួយ​គ្នា​នេះ ជេស៊ីកា ក៏បានត្រៀម​ខ្លួន​រួចហើយដែរ ក្នុងការបង្ហាញពីសមត្ថភាព​ ក៏​ដូចជាបង្ហាញវប្បធម៌ សីលធម៌របស់ខ្មែរតាមរយៈ​ការ​សំពះ ការ​និយាយស្តីនៅ​ក្នុងការជជែកដេញដោលជាដើម។

យុវជន ហេង មុនីរៀម ដែលក៏ជា​សិស្ស​មក​ពី​​សាលារៀនវ៉េស្ទឡាញន៍ និង​ក៏ជាបេក្ខជន​ត្រូវជ្រើសរើស​ឱ្យ​ចូលរួម​កម្មវិធី «អ្នកដឹកនាំយុវជនអាស៊ី២០២៣» នៅប្រទេស​ជប៉ុនដែរនោះ និយាយថា កម្មវិធីនេះ គឺជាឱកាស​ដែលអនុញ្ញាត​ឱ្យ​យុវជនកម្ពុជា​បានបង្ហាញនូវសក្តានុពល​ទៅ​កាន់អន្តរជាតិ ។ មុនីរៀម បានត្រៀម​ខ្លួនរួចហើយដែរ ដោយប្រឹងប្រែងឱ្យ​អស់ពីលទ្ធភាពដើម្បីបង្ហាញនូវអ្វីដែល​ជាសក្តានុពលរបស់ខ្មែរ ជាពិសេស​ទាក់ទងជាមួយប្រធានបទនៅ​ក្នុងកិច្ចពិភាក្សា ឬជជែកដេញដោល។

ជាមួយគ្នានេះ ការទៅប្រទេសជប៉ុននេះ មុនីរៀម រំពឹងថា នឹងទទួលបាននូវបទពិសោធន៍ថ្មីៗល្អជាច្រើន ដូចជាការសិក្សា​ពីបរិស្ថាននៅប្រទេសជប៉ុន ជាពិសេសទទួលបានទំនាក់ទំនងល្អជាមួយនឹងយុវជនមកពីបណ្តាប្រទេស​ផ្សេងៗ​ទៀត។ ហើយក្រោយបញ្ចប់កម្មវិធី​ត្រឡប់​មក​កម្ពុជាវិញ ខ្លួននឹងចែករំលែកបទពិសោធន៍​ទាំងនោះ​ទៅដល់យុវជនដែលត្រៀមខ្លួនបន្តនៅពេលក្រោយ ឬក៏អ្នក​ដែល​នៅសិក្សា​ជុំវិញខ្លួន។

សូម​បញ្ជាក់ថា កម្មវិធី «អ្នកដឹកនាំយុវជនអាស៊ី» (Asia Youth Leaders) គឺជាកម្មវិធីមួយដែលផ្ដល់ឱកាសឱ្យយុវជនមកពីបណ្តាប្រទេសអាស៊ីនានាចូលរួមក្នុងការសង្កេត និងមានការធ្វើបាឋកថាដោយអ្នកឯកទេសលើប្រធានបទបញ្ហាសង្គមនៅក្នុងប្រទេសម្ចាស់ផ្ទះ។ បន្ទាប់ពីបានចូលរួមក្នុងបាឋកថា យុវជនដែលបានចូលរួមត្រូវបង្កើតកិច្ចពិភាក្សាជាក្រុម ដើម្បីស្វែងរកដំណោះស្រាយលើបញ្ហាអ្វីមួយ ដែលគេបានលើកឡើង។

យុវជន​ដែល​ត្រូវចូលរួម​ក្នុងកម្មវិធីនេះ ត្រូវបានជ្រើសរើមកពីប្រទេសចំនួនក្នុងតំបន់អាស៊ី ដែលក្នុងនោះរួមមានដូចជា ប្រទេសកម្ពុជា ចិន ឥណ្ឌូនេស៊ី ជប៉ុន ឡាវ ម៉ាឡេស៊ី មីយ៉ាន់ម៉ា ថៃ និងប្រទេសវៀតណាមជាដើម ដោយ​ពួកគេ​ចូលរួមក្នុងការជជែកដេញដោលដោយប្រើភាសាអង់គ្លេស។

សម្រាប់យុវជនដែលអាចដាក់ពាក្យ ត្រូវ​មានលក្ខខណ្ឌដូនជា ត្រូវជាសិស្សវិទ្យាល័យ មានអាយុចន្លោះ ១៥ ទៅ​១៧ឆ្នាំ មានកាយសម្បទាមាំមួន មានការសិក្សា​ល្អ និង​មានកម្រិតភាសាអង់គ្លេស IELT 5.0 ឬ​ TOEFL 500 ។ ជាពិសេស សិស្ស​ត្រូវ​មានចំណាប់អារម្មណ៍​ពាក់ព័ន្ធនឹង​បញ្ហាបរិស្ថាន និង​បញ្ហា​ដែល​កើត​មានក្នុងសង្គម។

យ៉ាងណាក៏ដោយ សម្រាប់យុវជន ហេង មុនីរៀម ក៏ដូចជាយុវតី ឆាយ ពេជជេស៊ី ពួកគេលើកទឹកចិត្តដល់យុវជនផ្សេងៗទៀតដែលចង់ចូលរួមកម្មវិធីនេះ ឬអ្នកដែលបានចូលរួមហើយតែបរាជ័យ សូមបន្តចូលរួមទៀត ដោយថា វាជាឱកាសដែលកម្រក្នុងនាមជា​សិស្ស​កម្រិតវិទ្យាល័យ ។ ក្នុងនោះ ក្រៅពីភាសាអង់គ្លេស ភាពក្លាហាន និង​ការជឿជាក់លើខ្លួនឯង គឺជាគន្លឹះដើម្បីទទួលបានជោគជ័យក្នុងការដាក់ពាក្យ​ចូលរួមកម្មវិធីមួយនេះ៕