ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
និយ័តករមូលបត្រកម្ពុជា (ន.ម.ក.) នៃអាជ្ញាធរសេវាហិរញ្ញវត្ថុមិនមែនធនាគារ បានប្រកាសជ្រើសរើសមន្រ្តីលក្ខន្តិកៈ សម្រាប់បម្រើការងារចំនួន ២០ (ម្ភៃ) រូប ដែលមានសញ្ញាបត្រសញ្ញាបត្រ ត្រូវនឹងជំនាញដែលជ្រើសរើសចំនួន៣ គឺជំនាញសេដ្ឋកិច្ច និងហិរញ្ញវត្ថុ, ជំនាញបច្ចេកវិទ្យាព័ត៌មាន និងជំនាញនីតិសាស្រ្ត។
ជំនាញសេដ្ឋកិច្ច និងហិរញ្ញវត្ថុ ៖ ចំពោះបេក្ខជន បេក្ខនារី ដែលមានបំណងបម្រើការងារលើជំនាញសេដ្ឋកិច្ច និងហិរញ្ញវត្ថុ ត្រូវមានលក្ខណសម្បត្តិ និងភារកិច្ចទទួលខុសត្រូវ ដូចជា ៖ មានសញ្ញាបត្រសេដ្ឋកិច្ច គណនេយ្យ ហិរញ្ញវត្ថុ ធុរកិច្ចអន្តរជាតិ ឬបច្ចេកវិទ្យាហិរញ្ញវត្ថុ, មានចំណេះដឹងស្រាវជ្រាវ ចងក្រង និងវិភាគទិន្នន័យ, សិក្សាស្រាវជ្រាវ និងរៀបចំរបាយការណ៍លើការអភិវឌ្ឍផលិតផលថ្មីៗពាក់ព័ន្ធនឹងមូលបត្រ, សិក្សាស្រាវជ្រាវ និងរៀបចំរបាយការណ៍ពាក់ព័នធនឹងឧបករណ៍ហិរញ្ញវត្ថុនានា, សិក្សាស្រាវជ្រាវ និងរៀបចំរបាយការណ៍ពាក់ព័ន្ធនឹងការជំរុញការចូលរួមរបស់វិនិយោគិនស្ថាប័ន និងវិនិយោគិនបរទេស, វិភាគ និងវាយតម្លៃស្ថានភាព នៃការជួញដូរ និងស្នើឡើងគំនិតផ្តួចផ្តើមដើម្បីជំរុញការជួញដូរក្នុងទីផ្សារមូលបត្រ, ពិនិត្យ និងរៀបចំរបាយការណ៍វាយតម្លៃពាក្យស្នើសុំអាជ្ញាបណ្ណ ការអនុញ្ញាត ការទទួលស្គាល់, ពិនិត្យ និងរៀបចំរបាយការណ៍ពាក់ព័ន្ធ និងការអនុវត្តកាតព្វកិច្ចផ្សេងរបស់តួអង្គក្នុងទីផ្សារមូលបត្រ។
ជំនាញបច្ចេកវិទ្យាព័ត៌មាន ៖ ចំពោះបេក្ខជន បេក្ខនារី ដែលមានបំណងបម្រើការងារជំនាញបច្ចេកវិទ្យាព័ត៌មាន ត្រូវមានលក្ខណសម្បត្តិ និងភារកិច្ចទទួលខុសត្រូវដូចជា ៖ មានសញ្ញាបត្រថ្នាក់បរិញ្ញាបត្រផ្នែកវិទ្យាសាស្រ្តកុំព្យូទ័រ និងបច្ចេកវិទ្យាព័ត៌មាន, មានចំណេះដឹងក្នុងការរចនាផ្ទាំងកម្មវិធី, មានសមត្ថភាពយល់ដឹងពីប្រព័ន្ធសុវត្ថិភាព, រៀបចំរបាយការណ៍សិក្សាឧត្តមានុវត្តអន្តរជាតិ តាមដានបច្ចេកវិទ្យាពាក់ព័ន្ធនឹងការវិវត្តបទប្បញ្ញត្តិពាក់ព័ន្ធនឹងបច្ចេកវិទ្យាដែលលេចឡើងថ្មី ដូចជា បញ្ញាសិប្បនិមិត្ត បច្ចេកវិទ្យាឌីអិលធី បច្ចេកវិទ្យាប្លុកឆេន ទិន្នន័យធំ ក្លោដ ម៉ាស៊ីនស្វ័យសិក្សា វែប៣ (Web3) បច្ចេកវិទ្យាកង់ទិច (Quantum Technology) ជីវមាត្រ និងបច្ចេកវិទ្យាផ្សេងទៀតសម្រាប់ជាករណីប្រើប្រាស់នៅក្នុងវិស័យមូលបត្រ។
ជំនាញនីតិសាស្រ្ត ៖ ចំពោះបេក្ខជន បេក្ខនារី ដែលមានបំណងបម្រើការងារជំនាញនីតិសាស្រ្ត ត្រូវមានលក្ខណសម្បត្តិ និងភារកិច្ចទទួលខុសត្រូវ ដូចជា ៖ មានចំណេះដឹងមូលដ្ឋានអំពីនីតិពាណិជ្ជកម្ម នីតិរដ្ឋប្បវេណី នីតិព្រហ្មទណ្ឌ ព្រមទាំងនីតិវិធីព្រហ្មទណ្ឌ នៃព្រះរាជាណាចក្រកម្ពុជា, មានចំណេះដឹងជាមូលដ្ឋានសិក្សាស្រាវជ្រាវ រៀបចំចងក្រង និងតាក់តែងលិខិតបទដ្ឋានគតិយុត្ត និងលិខិតរដ្ឋបាលផ្សេងៗ, មានគំនិតផ្តួចផ្តើម និងភាពវាងថៃក្នុងការវិភាគ និងដោះស្រាយវិវាទ ដោយផ្សារភ្ជាប់និងក្របខណ្ឌបទប្បញ្ញត្តិ និងលិខិតបទដ្ឋានគតិយុត្តពាក់ព័ន្ធ, តាមដាន និងធ្វើបច្ចុប្បន្នភាពទៅតាមការវិវត្តន៍ទៅនៃបទប្បញ្ញត្តិនៅក្នុងយុត្តថាធិការបរទេស។
លក្ខខណ្ឌទូទៅ នៃការជ្រើសរើស ៖ បេក្ខជនត្រូវមានសញ្ជាតិជាខ្មែរ, មានអាយុច្រើនបំផុត ៤៥ឆ្នាំ គិតដល់ថ្ងៃប្រឡង, មានសញ្ញាបត្រចាប់ពីបរិញ្ញាបត្រ ឬសញ្ញាបត្រសមមូលឡើងទៅ លើជំនាញនីមួយៗ, មិនបានប្រាសចាកសិទ្ធិខាងរដ្ឋប្បវេណី សិទ្ធិពលរដ្ឋ និងសិទ្ធិខាងនយោបាយ, មិនធ្លាប់មានទោសពីបទមជ្ឈិម ឬបទឧក្រិដ្ឋ, បទពិសោធន៍ការងារពាក់ព័ន្ធយ៉ាងតិច ១ឆ្នាំ, មានចំណេះដឹងភាសាអង់គ្លេសអាចប្រើប្រាស់ផ្លូវការបាន, ចំពោះបេក្ខនារី និងជនពិការត្រូវបានផ្តល់អាទិភាព។
ការជ្រើសរើស នឹងត្រូវធ្វើឡើងតាមរយៈការធ្វើតេស្តសមត្ថភាពលើវិញ្ញាសាសរសេរ និងការធ្វើសម្ភាសន៍ផ្ទាល់មាត់ពីគណៈកម្មការជ្រើសរើស។ មានតែបេក្ខជន ឬបេក្ខនារីដែលជាប់ដំណាក់កាលជ្រើសរើសដំបូងប៉ុណ្ណោះដែលអាចចូលរួមធ្វើតេស្តលើវិញ្ញាសាសរសេរ ហើយមានតែបេក្ខជនដែលជាប់វិញ្ញាសាសរសេរតែប៉ុណ្ណោះ ទើបអាចចូលរួមធ្វើតេស្តសមត្ថភាពលើការសម្ភាសន៍ផ្ទាល់មាត់។
បេក្ខជន បេក្ខនារី ដែលមានចំណាប់អារម្មណ៍ សូមទាញយកពាក្យសុំចូលរួមប្រឡង ចាប់ពីថ្ងៃជូនដំណឹងនេះ រហូតដល់ត្រឹមថ្ងៃទី១៥ ខែមិថុនា ឆ្នាំ២០២៤។ ចំពោះកាលបរិច្ឆេទប្រឡង និងបញ្ជីរាយនាមបេក្ខចន នឹងត្រូវផ្សព្វផ្សាយនៅលើទំព័រ facebook របស់និយ័តករមូលបត្រកម្ពុជា៕
