ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
បន្ទាប់ពីទម្លាក់អម្រែកក្នុងការងារដឹកនាំប្រទេស សម្តេចអគ្គមហាសេនាបតីតេជោ ហ៊ុន សែន នឹងបន្តធ្វើការងារជួយអភិវឌ្ឍធនធានមនុស្សតាមរយៈការចែករំលែកបទពិសោធន៍ក្នុងការដឹកនាំ ក៏ដូចជាការធ្វើការងារទៅដល់មនុស្សជំនាន់ក្រោយ ក៏ដូចជាមន្រ្តីជាមន្រ្តីជាន់ខ្ពស់ ឬក៏មន្រ្តីមធ្យម។
សម្តេចតេជោមានប្រសាសន៍ថា កិច្ចការធំរបស់សម្តេច គឺជាការសរសេរនូវរឿងរ៉ាវ ក៏ដូចជាការចងក្រងនូវឯកសារទាក់ទងទៅនឹងការវិឌ្ឍន៍ចាប់តាំងពីថ្ងៃទី២០ ខែមិថុនា ឆ្នាំ១៩៧៧ រហូតមកដល់បច្ចុប្បន្ន និងបន្តទៅមុខទៀត។ សម្តេចបញ្ជាក់ថា គ្មាននរណាស្គាល់សម្តេច និងការងាររបស់សម្តេច ជាសម្តេចនោះទេ ដូច្នេះកិច្ចការអាទិភាពរបស់សម្តេច គឺការចងក្រងឯកសារដើម្បីទុកឱ្យក្មេងជំនាន់ក្រោយបានដឹកអំពីវិធីសាស្រ្តដឹកនាំ និងការធ្វើការងារ។
… ខ្ញុំមិនចង់នាំយកទៅជាមួយអាថ៌កំបាំងនោះទេ ខ្ញុំមានរួចស្រេចទៅហើយ នៅពេលដែលខ្ញុំបាននិយាយក្នុងវីដេអូឃ្លីបចំនួនជាង៤០ម៉ោង ហើយត្រូវបានចម្លងចេញជាសៀវភៅ ប៉ុន្តែមានផ្នែកដែលខ្ញុំត្រូវយកវាមកលម្អិត ដូច្នេះខ្ញុំត្រូវធ្វើការងារទាក់ទងនឹងការចងក្រងឯកសារ…
សម្តេចអគ្គមហាសេនាបតីតេជោ ហ៊ុន សែន
កិច្ចការបន្ទាប់ទៀតនោះ សម្តេចតេជោ ហ៊ុន សែន នឹងចូលរួមឧទ្ទេសនាមក្នុងឋានៈជាគ្រូ នៃមន្រ្តីជាន់ខ្ពស់ ឬមន្រ្តីមធ្យម ។ បើតាមប្រសាសន៍របស់សម្តេចតេជោ សម្តេចមានមុខវិជ្ជាចំនួន៣ ដើម្បីផ្តល់ជាការត្រិះរិះពិចារណាសម្រាប់ក្រុមមន្រ្តី ដោយ ទី១ គឺសម្ភារៈនិយមវិចារវិទ្យា ដែលជាចំណុចពិសេសខ្លាំងទៅលើការត្រិះរិះពិចារណា ។ ទី២ សម្ភារៈនិយមប្រវត្តិសាស្រ្ត, សម្តេចមានប្រសាសន៍ថា មនុស្សដែលគ្មានការចេះដឹង ឬតភ្ជាប់ប្រវត្តិសាស្រ្ត គឺតែងតែជាការគិតខុស ដូច្នេះសម្តេចនឹងចែករំលែកនូវបទពិសោធន៍ ក៏ដូចជាចំណេះដឹងដែលសម្តេចមានចែករំលែកដល់ពួកគេជាទ្រឹស្តី ។
ឯទី៣ វិធីសាស្រ្តដឹកនាំ និងធ្វើការងារ, សម្តេចតេជោបញ្ជាក់ថា សម្តេចមានគម្រោងរៀបចំការបណ្តុះបណ្តាលវគ្គខ្លីៗ ក៏ដូចជាចូលឧទ្ទេសនាមក្នុងឋានៈជាគ្រូ នៃមន្រ្តីជាន់ខ្ពស់ ឬមន្រ្តីមធ្យម។
សូមបញ្ជាក់ថា ប្រសាសន៍លើកឡើងរបស់សម្តេចតេជោ បានធ្វើឡើងនៅក្នុងសន្និសីទសារព័ត៌មាន បន្ទាប់ពីកិច្ចប្រជុំរដ្ឋសភានីតិកាលទី៧ លើកទី១ នៅវិមានរដ្ឋសភា នាព្រឹកថ្ងៃទី២២ ខែសីហា ឆ្នាំ២០២៣៕
