ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ថ្លែងក្នុងពិធីប្រគល់សញ្ញាបត្រ ជូននិស្សិតជ័យលាភី នៃសាកលវិទ្យាល័យវេស្ទើន សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានស្នើសុំទៅដល់លោកគ្រូអ្នកគ្រូ គួរតែកែប្រែពីឥរិយាបទ ពីការប្រើវិធីបង្ខំសិស្ស ទៅជាការអប់រំណែនាំវិញ ។ ការស្នើនេះ ធ្វើឡើងក្រោយប៉ុន្មានថ្ងៃមកនេះ មានការចែកចាយ និងវែកញែកយ៉ាងផុសផុលនៅលើបណ្តាញសង្គមពីករណីគ្រូបង្រៀននៅវិទ្យាល័យសំពៅលូន បានអនុវត្តពិន័យដោយកាត់សក់សិស្សនៅក្នុងថ្នាក់រៀន។
សម្តេចតេជោនាយករដ្ឋមន្ត្រី មានប្រសាសន៍ថា គ្រូ និងសិស្ស គឺមិនខុសពីឪពុកម្តាយ និងកូននោះទេ ដូច្នេះ ការដាក់ពិន័យលើសិស្សគឺគួរធ្វើដោយភាពសមស្រប ចៀសវាងការកាត់សក់សិស្សកណ្តាលចំណោមសិស្សក្នុងថ្នាក់ដូច្នេះ ។
សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា
“កូនសិស្សរបស់យើងដូចកូនរបស់យើង សក់នឹងវាមិនទាន់ត្រូវខ្នាតទេ ចឹងយើងរៀបចំកាត់សក់ឱ្យសិស្សទៅបើគង់តែមានត្រង់ឌឺកាត់ដែរនោះ”
សម្រាប់លោកបណ្ឌិត យ៉ង់ ពៅ អគ្គលេខាធិការ នៃរាជបណ្ឌិត្យសភាកម្ពុជា មានប្រសាសន៍ថា សិស្សនៅមធ្យមសិក្សា គឺជាវ័យដែលកំពុងស្រឡាញ់ខ្លួន ដូច្នេះប្រសិនបើមិនមានអភិក្រម នៃការកាត់សក់សិស្សមិនជាវែងខ្លាំង គឺហាក់ដូចជាមិនសូវសមនោះឡើយ។
លោកអគ្គលេខាធិការ នៃរាជបណ្ឌិត្យសភាកម្ពុជាបន្ថែមថា ការគោរពវិន័យរបស់សិស្សមិនផ្អែកទៅលើសក់តែមួយមុខទេ ពោលគឺមានវិន័យផ្សេងៗទៀតរបស់សាលា ឬរបស់ក្រសួងអប់រំដែលបានចែង តែសំខាន់ការបង្រៀន និងការរៀនអនុឡោមទៅតាមគោលវិធី នៃវិធីសាស្រ្តបង្រៀន និងរៀន។
លោកបណ្ឌិត យ៉ង់ ពៅ អគ្គលេខាធិការ នៃរាជបណ្ឌិត្យសភាកម្ពុជា
“ឥឡូវនេះ សង្គមយើងបើកទូលាយ សិស្សអាចទទួលបានភាពស៊ីវិល័យតាមបណ្ដាញសង្គមមក ការធ្វើបែបនេះ មិនប្រាកដថាឱ្យសិស្សគោរពទេ សិស្សខ្លាចមួយពេលក្នុងថ្នាក់ ប៉ុន្តែវាអាចប៉ះពាល់ផ្លូវចិត្តរបស់សិស្សទៅវិញ”
យ៉ាងណាក៏ដោយ បើតាមលោកបណ្ឌិត យ៉ង់ ពៅ ដើម្បីឱ្យសិស្សគោរពវិន័យ គឺត្រូវផ្អែកទៅលើ៣ចំណុច ទី១.មានច្បាប់អភិក្រម បទបញ្ជារផ្ទៃក្នុងរបស់សាលាដែលអនុឡោមតាមច្បាប់អប់រំ, ទី២.ជំរុញលើកទឹកចិត្តសិស្សឱ្យព្យាយាមរៀនសូត្រតាមរយៈវិធីសាស្រ្តថ្មីៗ ដែលឱ្យសិស្សចូលចិត្តរៀនកុំឱ្យបោះបង់ការសិក្សា និង ៣. ព្យាយាមពន្យល់សិស្សអំពីគុណភាពជីវិតដែលផ្អែកលើចំណេះដឹង ដែលចំណុចនេះជារឿងសំខាន់ជាងការអនុវត្តវិន័យម្ដងម្កាលដែលធ្វើឱ្យប៉ះពាល់ផ្លូវចិត្តរបស់សិស្ស៕
