ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងឱកាសអញ្ជើញសម្ពោធអគារសិក្សា និងសមិទ្ធផលនៅវិទ្យាល័យ ហ៊ុន សែន សេរីភាពក្រុងតាខ្មៅ នាព្រឹកថ្ងៃទី២១ ខែមីនា ឆ្នាំ២០២៥ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចកម្ពុជា បានលើកឡើងថា ជាគោលដៅក្នុងការពង្រឹងវិស័យអប់រំ រាជរដ្ឋាភិបាលនឹងធ្វើនៅគ្រប់ថ្នាក់ទាំងអស់ចាប់ពីមត្តេយ្យសិក្សា រហូតដល់ថ្នាក់ឧត្តមសិក្សា។ ប៉ុន្តែសម្រាប់អាណត្តិនេះ សម្តេចបញ្ជាក់ថា គឺជាអាណត្តិនៃការពង្រឹង ដូច្នេះរាជរដ្ឋាភិបាលនឹងផ្តោតទៅលើការពង្រឹងពីថ្នាក់បឋមសិក្សា រហូតដល់ថ្នាក់វិទ្យាល័យ ដែលជាមូលដ្ឋានក្នុងការបង្កើតធនធានមនុស្សមួយដ៏ល្អ ដែលមានចំណេះដឹងច្បាស់លាស់ ព្រមជាមួយនឹងឥរិយាបទដ៏ប្រពៃ។
បើតាមប្រសាសន៍របស់សម្តេចធិបតី ក្នុងអាណត្តិនេះ រាជរដ្ឋាភិបាលបានបង្កើត គណៈកម្មការពង្រឹងវិស័យអប់រំ ដោយផ្តោតទៅលើការងារសំខាន់ចំនួន៤ ដែលត្រូវអនុវត្តមុនគេ នោះ គឺ ការពង្រឹងអភិបាលកិច្ចសាលា, ពង្រឹងសីលធម៌ ឥរិយាបទ, ការយកចិត្តទុកដាក់លើសុខភាព និង ការចូលរួមរបស់អាណាព្យាបាល ក៏ដូចជាសហគមន៍។
សម្តេចនាយករដ្ឋមន្រ្តីលើកឡើងថា ការពង្រឹងអភិបាលកិច្ចសាលារៀន ពិសេសនៅបឋមសិក្សា គឺជាកិច្ចការសំខាន់ទី១ ដែលគណៈនាយក មន្រ្តី រួមទាំងបុគ្គលិកសិក្សាត្រូវអនុវត្ត។ សម្តេចមានប្រសាសន៍ថា សិស្សនឹងធ្វើទៅតាមអ្វីដែលពួកគេបានឃើញគ្រូធ្វើ ច្រើនជាងអ្វីដែលគ្រូនិយាយ, ដូច្នេះប្រសិនបើបង្រៀនពីអភិបាលកិច្ច ចង់ឱ្យសិស្សមកទាន់ម៉ោង គឺទាល់តែលោកគ្រូ អ្នកគ្រូមកទាន់ម៉ោង ហើយបើចង់ឱ្យសិស្សសំពះ គឺទាល់តែលោកគ្រូអ្នកគ្រូចេះសំពះដែរ ដែលនេះគឺជាការរៀននៅក្នុងការដឹកនាំ។
ដោយឡែក ការពង្រឹងចំណេះដឹង សីលធម៌ និងឥរិយាបទ សម្តេចនាយករដ្ឋមន្រ្តីមានប្រសាសន៍ដោយលើកយកសកម្មភាពសិស្សចេះសំពះអរគុណ នៅពេលដែលយានយន្តឈប់ឱ្យពួកគេឆ្លងថ្នល់, ចេះសំពះឪពុកម្តាយពេលទៅដល់ផ្ទះ, ចេះសំពះគ្រូបង្រៀន ថា នេះ គឺជាឥរិយាបទដ៏ប្រពៃនិងខ្ពង់ខ្ពស់។ សម្តេចបញ្ជាក់ថា អ្វីដែលយើងចង់បាន គឺយុវជនទៅថ្ងៃអនាគត ពួកគេមាន ឥរិយាបទល្អ សីលធម៌ និងគុណធម៌ ហើយទាំងនេះ គឺត្រូវមានការបង្រៀន និងតម្រង់ទិសពីលោកគ្រូអ្នកគ្រូ។
ជាមួយគ្នានេះ ការយកចិត្តទុកដាក់ទៅលើសុខភាពសិស្ស គឺជារឿងដែលត្រូវយកចិត្តទុកដាក់ ដោយបើតាមប្រសាសន៍របស់សម្តេចធិបតី កន្លងមកក្រសួងអប់រំ ក៏ដូចជាក្រសួងសុខាភិបាល បានធ្វើការណែនាំរួចមកហើយ ប៉ុន្តែសម្តេចស្នើឱ្យមានការចូលរួមពីគណៈគ្រប់គ្រង ឪពុកម្តាយ ពិសេសសហគមន៍ ក៏ដូចជាអាជីវករ ដោយត្រូវគិតគូរពីអាហារូបត្ថម្ភដល់សិស្ស។ សម្តេចមានប្រសាសន៍ថា អាជីវករមានសិទ្ធិសេរីភាពក្នុងការលក់ដូរ ក្នុងការប្រកបរបរ ប៉ុន្តែសូមឱ្យមានការចូលរួមកុំឱ្យមានការលក់ចំណីអាហារដែលធ្វើឱ្យប៉ះពាល់ដល់សុខភាពសិស្ស។
“បញ្ហាជំងឺដូចជាទឹកនោមផ្អែម ជំងឺលើសឈាមផ្សេងៗ ខ្លះគឺដោយសារតែអាហារូបត្ថម្ភ, អញ្ចឹងកិច្ចការទាំងអស់នេះ គឺជាអ្វីដែលរាជរដ្ឋាភិបាលបានអនុវត្តនៅក្នុងការពង្រឹងមូលដ្ឋាន”
ចំណុចចុងក្រោយ គឺការជំរុញការចូលរួមរបស់មាតាបិតា អាណាព្យាបាល សហគមន៍ នៅក្នុងការអប់រំ ស្របតាមអភិក្រម ឬពាក្យស្លោក ភាពជាដៃគូរវាងរដ្ឋ និងសហគមន៍ ដើម្បីការអប់រំ។ សម្តេចធិបតីនាយករដ្ឋមន្រ្តីលើកឡើងថា នេះគឺជាកិច្ចការងារសំខាន់ ក្នុងការជួយពង្រឹងមូលធនមនុស្សរបស់កម្ពុជា។ សម្តេចបញ្ជាក់ថា នៅក្នុងគោលនយោបាយពង្រឹងមូលដ្ឋាន គឺមានគោលដៅនៅក្នុងការពង្រឹងការចូលរួមរបស់សហគមន៍ (PCP) ពោលគឺភាពជាដៃគូរវាងរដ្ឋ និងសហគមន៍ ដើម្បីវិស័យអប់រំ ក៏ដូចជាដើម្បីអប់រំឱ្យសិស្សរបស់យើងបានល្អ។ “ការចូលរួមរបស់មាតាបិតា និងសហគមន៍ គឺជាគោលដៅដែលយើងបន្តធ្វើ សូមអំពាវនាវទៅដល់មាតាបិតាចូលរួមគាំទ្រទៅដល់សាលា ប្រទាក់ក្រឡាគ្នា និងទុកចិត្តដល់លោកគ្រូអ្នកគ្រូ ដើម្បីការអប់រំ…”៕
