ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – «ខ្ញុំចាប់អាជីពជាបណ្ណារក្សនេះ ព្រោះក្ដីស្រឡាញ់ ចូលចិត្តរៀបចំតុបតែង ទុកដាក់សៀវភៅនៅក្នុងបណ្ណាល័យឱ្យបានស្អាត ទាក់ទាញសិស្ស និងគ្រូបង្រៀនឱ្យចូលអានសៀវភៅ និងស្រាវជ្រាវ»។ នេះជាការលើកឡើងរបស់ អ្នកស្រី សុត សេរីម៉ាច ជាបណ្ណារក្សនៃវិទ្យាល័យព្រែកលាប សាលារៀនជំនាន់ថ្មី។
អ្នកស្រី សុត សេរីម៉ាច មានទឹកមុខរីករាយ និយាយមួយៗដោយស្នាមញញឹមថា ដើម្បីឱ្យសិស្សចូលមកអាចសៀវភៅនៅក្នុងបណ្ណាល័យ ទាល់តែបណ្ណារក្សមានភាពរួសរាយរាក់ទាក់ ចេះនិយាយទាក់ទាញសិស្ស និងចេះរៀបចំបណ្ណាល័យឱ្យស្អាត ទើបនាំឱ្យសិស្សចង់អាន និងចង់ធ្វើកិច្ចការស្រាវជ្រាវ។
អ្នកស្រី សុត សេរីម៉ាច
“បណ្ណារក្សចាំបាច់ត្រូវចេះទំនាក់ទំនងល្អជាមួយសិស្ស ចេះនិយាយទន់ភ្លន់ សុភាពរាបសារ មិននិយាយពាក្យសម្ដីពំរោះគំរើយ ទើបសិស្សមានអារម្មណ៍កក់ក្ដៅពេលចូលមកអានសៀវភៅនៅក្នុងបណ្ណាល័យ”
អ្នកស្រី សេរីម៉ាច បន្ថែមថា ក្រៅពីចេះរៀបចំបណ្ណាល័យឱ្យស្អាត បណ្ណារក្សក៏មានតួនាទីជាអ្នកណែនាំ និងប្រាប់សិស្សពីទីតាំងសៀវភៅដែលពួកគេចង់អាន ឬប្រភេទសៀវភៅដែលសិស្សគួរអានតាមកម្រិតថ្នាក់។ លើសពីនេះ នៅពេលមានសៀវភៅថ្មីចូលមក បណ្ណារក្សជួយផ្សព្វផ្សាយទៅលោកគ្រូ អ្នកគ្រូ សិស្សានុសិស្ស អាណាព្យាបាលសិស្ស និងសហគមន៍ផងដែរ។
អ្នកស្រី សុត សេរីម៉ាច ជាបណ្ណារក្សនៃវិទ្យាល័យព្រែកលាប សាលារៀនជំនាន់ថ្មី
“នៅបណ្ណាល័យនេះ សិស្សស្ម័គ្រចិត្តចូលអានសៀវភៅដោយខ្លួនឯង គ្មានការបង្ខិតបង្ខំនោះទេ ហើយសិស្សខ្លះចេះប្រើថេបប្លេត កុំព្យូទ័រ និងសម្ភារៈផ្ទាល់ខ្លួនមកប្រើក្នុងបណ្ណាល័យក៏មាន”
ការងារជាបណ្ណារក្សក៏មានការលំបាករបស់ខ្លួនផងដែរ បើតាមអ្នកស្រី សុត សេរីម៉ាច ការលំបាករបស់បណ្ណារក្សគឺ នៅពេលសិស្សខ្ចីសៀវភៅយកទៅអានហើយពួកគាត់ឈប់រៀន គឺលំបាកយកសៀវភៅមកវិញ ដោយជួនទាក់ទងបានក៏បានសៀវភៅមកវិញ ហើយបើទាក់ទងមិនបានក៏តាមនោះតែម្ដង។
បើទោះជាមានការលំបាកមួយចំនួនក្នុងការងារជាបណ្ណារក្សក៏ពិតមែន តែដោយសារក្ដីស្រឡាញ់ និងពេញចិត្តក្នុងការរៀបចំបណ្ណាល័យឱ្យមានសោភ័ណភាពស្អាតដូចជានៅផ្ទះ អ្នកស្រី សុត សេរីម៉ាច នៅតែរីករាយនៅក្នុងការបំពេញតួនាទីមួយនេះឱ្យបានល្អ។ ជាពិសេស បរិស្ថានបណ្ណាល័យស្អាតនឹងរួមចំណែកជំរុញសិស្សចូលចិត្តអានសៀវភៅ។
គួរជម្រាបជូនថា បណ្ណាល័យនៃវិទ្យាល័យព្រែកលាប សាលារៀនជំនាន់ថ្មី បើកទូលាយសម្រាប់សិស្សានុសិស្ស និងសាធារណៈជនអាចចូលទៅអានសៀវភៅបានដោយឥតគិតថ្លៃ ព្រមទាំងអាចខ្ចីសៀវភៅយកទៅបានផងដែរ។ បណ្ណាល័យនេះ មានសៀវភៅច្រើនប្រភេទចម្រុះតាមមុខវិជ្ជា និងមានជាឯកសារជាភាបរទេសផងដែរ៕
