ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ការវិនិយោគមួយមានផលប្រយោជន៍ដល់ក្រុមហ៊ុនឯកជន ឬក្រុមហ៊ុនផ្សេងៗ គឺជាការវិនិយោគនៅលើសៀវភៅ ក៏ដូចជាវិនិយោគលើការអានរបស់បុគ្គលិក ។ នៅពេលស្ថាប័នឯកជន ឬក្រុមហ៊ុនមានបណ្ណាល័យសម្រាប់ឱ្យបុគ្គលិកអាន គឺជួយបណ្ដុះបណ្ដាលធនធានមនុស្សក្នុងស្ថាប័នបានរយៈពេលវែង។ នេះជាការលើកឡើងរបស់លោក សុខ ឡាក់ ប្រធានយុទ្ធនាការសៀវភៅមួយសហគមន៍មួយ។
លោក សុខ ឡាក់ មានប្រសាសន៍ថា ការអាន គឺពិតជាមានសារៈសំខាន់ ហើយបើគិតជាវ័យអ្នកធ្វើការ ឬនៅកន្លែងធ្វើការ ឃើញថា ការអានគឺជាវិធីសាស្រ្តទាញព័ត៌មាន ឬចំណេះដឹង បច្ចេកទេសពីដូនតា អ្នកជំនាន់ក្រោយ ឬមេដឹកនាំចាស់ៗនៅក្នុងស្ថាប័ននោះ។ លោកថា បើស្ថាប័នមួយបានចងក្រងឯកសារ ឬរបាយការណ៍នោះ ការអានគឺមានសារៈសំខាន់ក្នុងការប្រាស្រ័យទាក់ទងចំណេះដឹងពីអ្នកជំនាន់មុនមកដល់បច្ចុប្បន្នដើម្បីយកទិន្នន័យទាំងអស់នោះធ្វើការវិភាគធ្វើផែនការនៅថ្ងៃអនាគត។ ពិសេសជាងនេះ គឺឧបសគ្គដែលអ្នកជំនាន់មុនបានធ្វើហើយ អ្នកជំនាន់ក្រោយនឹងអាចជៀសវាងធ្វើខុសម្ដងទៀត។
លោក សុខ ឡាក់ ប្រធានយុទ្ធនាការសៀវភៅមួយសហគមន៍មួយ
“ខ្ញុំអាចនិយាយបានថា បើអ្នកដឹកនាំចង់ឱ្យក្រុមហ៊ុនរបស់គាត់ មានផែនការរយៈពេលវែង ហើយមានបុគ្គលិកមានសមត្ថភាពខ្លាំង អ្នកដឹកនាំក្រុមហ៊ុនត្រូវបន្សុំាបរិយាកាសមួយដើម្បីឱ្យអ្នកចូលចិត្តអាននៅជាមួយ ហើយភាគច្រើនអ្នកចូលចិត្តអានចូលចិត្តសៀវភៅ ឬក៏អ្នកពូកែៗគាត់ចូលចិត្តអានសៀវភៅ”
លោក សុខ ឡាក់ បញ្ជាក់បន្ថែមថា មានមតិផ្ទុយមួយចំនួនលើកឡើងផងដែរថា នៅពេលបង្កើតវប្បធម៌អានសៀវភៅក្នុងក្រុមហ៊ុនអាចនាំឱ្យខាតពេលវេលាធ្វើការរបស់ពួកខ្លួន ។ លោកថា បញ្ហានេះអាស្រ័យលើថា ការរៀបចំពេលវេលារបស់អ្នកដឹកនាំក្នុងស្ថាប័នបែបណា ដើម្បីឱ្យបុគ្គលិកមានពេលក្នុងការអាន។ ភាគច្រើននៅក្នុងការធ្វើការយើងមិនអាចបង្ខំឱ្យបុគ្គលិកធ្វើការច្រើនម៉ោងនោះទេ ជាទូទៅប្រាកដជាមានម៉ោងសម្រាកថ្ងៃត្រង់ ឬម៉ោងសម្រាកថ្ងៃសៅរ៍ និងថ្ងៃអាទិត្យ។ ដូច្នេះ តើស្ថាប័នអាចរៀបចំវិធីសាស្រ្តធ្វើយ៉ាងណាឱ្យបុគ្គលិកអាចអានសៀវភៅដោយមិនប៉ះពាល់ដល់ម៉ោងការងារ?
ប្រធានយុទ្ធនាការសៀវភៅមួយសហគមន៍មួយ រូបនេះ បន្ថែមថា មានស្ថាប័នឯកជនមួយចំនួនបានបង្ហាញពីបច្ចេកទេសជំរុញឱ្យសាធារណៈជន ឬបុគ្គលិករបស់ខ្លួនមានទម្លាប់អានសៀវភៅ។ លោកបន្តថា ដើម្បីជំរុញការងារ ត្រូវបន្សុំាតាំងពីក្មេងមក ប៉ុន្តែចំពោះក្រុមហ៊ុនប្រហែលជាពិបាកក្នុងការបន្សុំាបន្តិច ហើយអ្វីដែលអាចទៅរួចរួមមាន ទី១.ការលើកទឹកចិត្ត មានន័យថា ក្រុមហ៊ុនគួររៀបចំគោលនយោបាយ ឬរៀបចំវិធីសាស្រ្តលើកទឹកចិត្តចំពោះអ្នកដែលមានសមត្ថភាពអានក្នុងរូបភាពណាមួយ ទី២.ជួយបុគ្គលិកចេះស្វែងរកព័ត៌មានដើម្បីរាយការណ៍ ឬបង្កើតក្លឹបអានសៀវភៅ ឬបណ្ណាល័យប្រចាំស្ថាប័ន ដើម្បីឱ្យបុគ្គលិកមានឱកាសអានសៀវភៅ។
លោក សុខ ឡាក់ ប្រធានយុទ្ធនាការសៀវភៅមួយសហគមន៍មួយ
“ខ្ញុំលើកទឹកចិត្តជាខ្លាំងឱ្យស្ថាប័នឯកជន ឬក្រុមហ៊ុនផ្សេងៗ គួរបង្កើតជាបណ្ណាល័យ ឬបង្កើតជាក្លិបអានសៀវភៅ ដើម្បីលើកទឹកចិត្តឱ្យបុគ្គលិករបស់ខ្លួនអានសៀវភៅ ព្រោះជាវិធីសាស្រ្តវិនិយោគមួយដែលមានប្រសិទ្ធភាពក្នុងការកាត់បន្ថយចំណាយ នៅលើការអភិវឌ្ឍធនធានមនុស្សក្នុងស្ថាប័ននីមួយៗ”
លោក សុខ ឡាក់ បញ្ជាក់បន្ថែមថា ការវិនិយោគលើការអានថ្លៃណាស់ ហើយនៅពេលដែលថ្លៃ ស្ថាប័នឯកជន ឬបុគ្គលពិបាកក្នុងការវិនិយោគ គឺទាមទារឱ្យស្ថាប័នឯកជន ឬបុគ្គលធ្វើការជាមួយស្ថាប័នជំនាញផ្នែកសៀវភៅ ឬស្ថាប័នផ្សេងៗធ្វើយ៉ាងណាឱ្យប្រសិទ្ធភាពក្នុងការវិនិយោគរបស់ខ្លួនមានប្រសិទ្ធភាពជាងមុន។ លើសពីនេះ ធ្វើយ៉ាងណាឱ្យបុគ្គលិក ឬអ្នកក្រោមឱវាទរបស់ខ្លួន ប្រើប្រាស់ធនធានតិចក្នុងការទាញយកសក្ដានុពលភាពនៃការអាន ឬសៀវភៅដែលល្អមានចំនួនច្រើននៅក្នុងស្ថាប័នរបស់ខ្លួន៕
