សុភមង្គលមិនមែនជាអ្វីដែលយើងត្រូវរត់តាមរហូតនោះទេ ប៉ុន្តែចាំបាច់ទាមទារឱ្យមានការកត់សម្គាល់រាល់សកម្មភាពដែលកើតមានប្រចាំថ្ងៃនៅជុំវិញខ្លួន។ ក្នុងកាលៈទេសៈខ្លះ មនុស្សត្រូវបានបង្រៀនថា សុភមង្គលគឺជាជម្រើសដែលមនុស្សអាចជ្រើសបានដោយខ្លួនឯង។

ជារឿយៗ យើងត្រូវបានបង្រៀនថា ភាពរីករាយរមែងទទួលបានពីមនុស្សជាទីស្រឡាញ់ ឬក៏សមាជិកគ្រួសារ និងមានការងារល្អសង្គមទទួលស្គាល់ រួមទាំងប្រភពចំណូលមានស្ថិរភាព។ ប៉ុន្តែហេតុអ្វី មនុស្សមួយចំនួនមានគ្រប់យ៉ាងដូចដែលបានរៀបរាប់ខាងលើហើយ តែមានអារម្មណ៍ថា មិនទទួលបានអារម្មណ៍រីករាយ? ក្នុងករណីខ្លះ យើងខ្លួនឯងផ្ទាល់នៅតែមិនដឹងថា តើកត្តាអ្វីទើបផ្តល់ឱ្យនូវអារម្មណ៍គ្រប់គ្រាន់? ទន្ទឹមគ្នានោះមានមនុស្សមួយចំនួន បានទទួលរងនូវឥទ្ធិពលអំពីការរំពឹងបាននូវជីវិតមួយដែលល្អ ដូចជាប្តេជ្ញាធ្វើតែសកម្មភាពដែលគេបង្ហាញថា នាំឱ្យជីវិតរុងរឿង ឬសកម្មភាពអ្វីខ្លះដែលយើងមិនគួរធ្វើជាដើម ទាំងដែលដំណើរជីវិតរបស់មនុស្សម្នាក់ៗមានភាពខុសគ្នា។

តាមរយៈគេហទំព័រ yourtango បានបង្ហាញរឿងរ៉ាវ៥ចំណុច ដែលជាកត្តានាំបាននូវសុភមង្គល និងភាពរីករាយក្នុងរយៈពេលយូរ ៖

១. អាជីព  ៖ ត្រូវធ្វើការតិចជាមុន? ហេតុផលនេះមិនមែនជាអ្វីដែលលើកទឹកចិត្តទេ! ប៉ុន្តែអាជីព ត្រង់ចំណុចនេះ គឺចង់សំដៅលើការធ្វើការដោយយកចិត្តទុកដាក់អំពីផលិតភាព និងប្រសិទ្ធភាព។ ធ្លាប់ចាប់អារម្មណ៍ដែរទេ មនុស្សមួយចំនួនគិតថា ប្រសិនបើការងារតិច អាចនឹងផ្តល់ភាពរីករាយ ប៉ុន្តែនៅពេលដែលពួកគេស្ថិតក្នុងវិស្សមកាលយូរពេក បែរជាហាក់មានអារម្មណ៍ថារសាប់រសល់ចង់ត្រឡប់ទៅការិយាល័យវិញ។

យ៉ាងណាមិញ ការងារតិចក៏មិនមែនជាបញ្ហាដែរ តែអ្វីដែលសំខាន់គឺរៀនអំពីបែបបទធ្វើការឱ្យប្រសើរជាងមុន ដោយត្រូវចាប់ផ្តើមពីការមានទម្លាប់កំណត់ពេលប្រចាំថ្ងៃ មានវិន័យតឹងរឹង និងមានស្មារតីផ្តោតជាប្រចាំ។

២. មិត្តភាព ៖ ក្នុងទំនាក់ទំនងមិត្តភាព តើអ្វីដែលជំរុញឱ្យអ្នករីករាយ? ត្រូវមានមិត្តច្រើន? ការបង្កើនក្ដីស្រឡាញ់ និងរក្សាទំនាក់ទំនងឱ្យកាន់តែស៊ីជម្រៅជាអ្វីដែលអ្នកគួរតែផ្តោតជាមួយមិត្តដែលស្គាល់គ្នាស្រាប់។ ពេលដែលយើងស្រមៃនូវរូបភាពពាក់ព័ន្ធនឹងជីវិតរីករាយ យើងតែងតែឃើញខ្លួនឯងនៅជុំវិញមិត្តកុះករ ឬមនុស្សជាទីស្រឡាញ់ណាម្នាក់។ យ៉ាងណាមិញចំនួននៃមិត្តច្រើនមិនបានមានន័យថា គ្រប់គ្នាសុទ្ធតែដឹងអំពីទុក្ខធុរៈ ឬក៏ភាពជិតស្និតនោះទេ និងមិនអាចក្លាយជាបុគ្គលដែលអាចជាទីពឹងពំនាក់បានទាំងអស់ឡើយ។ ជំនួសឱ្យការមានមិត្តច្រើន គឺត្រូវការពង្រឹងទំនាក់ទំនងឱ្យកាន់តែស៊ីជម្រៅបន្ថែម និងរក្សាភាពស្និទ្ធស្នាលជាមួយមនុស្សសំខាន់ៗក្នុងជីវិត ដោយសំដៅលើគុណភាពជាជាងបរិមាណ។

៣. ភាពប្រកួតប្រជែងក្នុងជីវិត ៖ ត្រូវរត់គេចរាល់បញ្ហាក្នុងជីវិតមែនទេ? អត់ទេ! គួរតែពង្រឹងទំនុកចិត្តក្នុងការគ្រប់គ្រងបញ្ហាដែលកើតមាន ក៏ដូចជាការរៀបចំជីវិតបន្តដំណើរទៅមុខ។ បញ្ហាដែលបណ្តាលឱ្យស្រ្តេស មិនមែនមកពីបញ្ហាដែលបានកើតនោះទេ ប៉ុន្តែវាបណ្តាលមកពី ការគិតឬក៏ផ្នត់គំនិតចំពោះបញ្ហាទាំងនោះបង្កប់នូវភាពវិជ្ជមានដោយគិតថាមិនអាចទៅរួចមិនអាចដោះស្រាយបាន។

អាការថប់បារម្ភពីភាពប្រកួតប្រជែងក្នុងជីវិត បានជះទាំងផលវិជ្ជមាន និងអវិជ្ជមាន។ ព្រោះពេលខ្លះវាក្លាយជាកត្តាជំរុញចិត្ត ហើយពេលខ្លះទៀតក្លាយជាការបំបាក់ទឹកចិត្ត។ ការកាត់បន្ថយបញ្ហា មិនបានធ្វើឱ្យអ្នករីករាយជាងមុនទេ ប៉ុន្តែកាលដែលមានសមត្ថភាពបន្ថែមក្នុងការដោះស្រាយបញ្ហា ទើបជាការនាំជីវិតឱ្យដើរចូលវិថីសុភមង្គល។ ដូច្នេះកត្តាដែលជំរុញជីវិតឱ្យមានភាពរីករាយ មិនមែនកាត់បន្ថយបញ្ហា ប៉ុន្តែគឺជាការកសាងទំនុកចិត្ត និងពង្រឹងសមត្ថភាពដោះស្រាយបញ្ហាចម្រុះដែលបានកើតមាន ឬក៏បញ្ហាដែលគង់នឹងកើតមាន។

៤. ភាពជោគជ័យ ៖ ទស្សនៈដែលមានជំនឿជឿជាក់ថា ទាល់តែប្រសើរជាងអ្នកដទៃទើបជាភាពជោគជ័យ បណ្តាលឱ្យមនុស្សចាប់ផ្តើមផ្តាច់ទំនាក់ទំនងពីគ្នា ឬរក្សាគម្លាតពីគ្នា ខណៈទស្សនៈបែបនេះ វាពុំរក្សាស្ថិរភាពផ្លូវចិត្តក្នុងការរស់នៅនោះទេ។ ផ្នែកមួយនៃសុភង្គមដ៏សំខាន់របស់មនុស្សគឺ ការប្រាស្រ័យទាក់ទង និងជួយគ្នាទៅវិញទៅមក។

៥. ផ្តោតលើរូបរាងខាងក្រៅ ៖ រូបរាងអាចបង្កើនសុភមង្គលបានក្នុងរយៈពេលវែងទេ? តើត្រូវផ្លាស់ប្តូរដោយព្យាយាមសម្រកគីឡូ ឬក៏រៀនអំពីការស្រឡាញ់ខ្លួនឯង ទោះបីមិនស្ថិតក្នុងស្តង់ដារមួយដែសង្គមកំណត់ ឬមនុស្សភាគច្រើនយល់ឃើញ? ការព្យាយាមសម្រកគីឡូក្លាយជាចំណោទបញ្ហាមួយសម្រាប់មនុស្សជាច្រើន រហូតឈានដល់ការប្រើប្រាស់ឱសថមិនត្រឹមត្រូវនិងបង្កហានិភ័យដល់អាយុជីវិត រួមទាំងជំរុញឱ្យកើតមានអាការៈថប់បារម្ភទៀតផង។ ការសម្រកគីឡូ គួរតែអនុវត្តន៍ក្នុងករណីពង្រឹងសុខភាព ឬក៏តម្រូវការនៃរាងកាយផ្ទាល់ខ្លួន និងធ្វើប្រកបដោយការគិតអំពីសុវត្ថិភាពជាចម្បង ដូច្នេះចាំបាច់ស្រឡាញ់ខ្លួនឯងនាពេលបច្ចុប្បន្ន ឱ្យបានច្រើនជាងការយកចិត្តទុកដាក់ពីការសម្លឹងមើលមកពីខាងក្រៅ។

យ៉ាងណា បើក្នុងករណីចង់ផ្លាស់ប្តូរ គឺត្រូវប្រាកដចិត្តថា ធ្វើដោយផ្តើមចេញពីតម្រូវការសុខភាពខ្លួនឯង ឬការចង់បានរបស់ខ្លួនទើបអាចរក្សាលំនឹងផ្លូវចិត្តបានយូរ។ ស្គាល់ពីគុណតម្លៃជីវិតខ្លួនឯងពុំមែនជារឿងងាយស្រួល ប៉ុន្តែជាទ្រព្យមួយដ៏មានតម្លៃ៕