ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សន្ទានុក្រមបច្ចេកសព្ទឆ្នាំ២០២៤ ដែលមានបីភាសា គឺ ខ្មែរ-អង់គ្លេស-បារាំង រៀបចំចងក្រងដោយក្រុមប្រឹក្សាជាតិភាសាខ្មែរ នៃរាជបណ្ឌិត្យសភាកម្ពុជា ត្រូវបានប្រកាសដាក់ឱ្យប្រើប្រាស់ជាផ្លូវការ សម្រាប់ទម្រង់សៀវភៅ និងទម្រង់ឌីជីថល កាលពីថ្ងៃទី២១ ខែវិច្ឆិកា ឆ្នាំ២០២៤កន្លងទៅនេះ។
ឯកឧត្ដមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា មានប្រសាសន៍ថា សទ្ទានុក្រមបច្ចេកសព្ទទាំង ១២ឯកទេស សរុបមានចំនួន ៣ ៤០៥ពាក្យ ដែលក្រុមប្រឹក្សាជាតិភាសាខ្មែរបានសម្រេចបាន ពិតជាមានតម្លៃជាប្រវត្តិសាស្ត្រសម្រាប់ប្រទេស និងប្រជាជនកម្ពុជា។
ជាមួយគ្នានេះ ប្រធានរាជបណ្ឌិត្យសភាកម្ពុជា ក៏បានថ្លែងកោតសរសើរ និងវាយតម្លៃខ្ពស់ចំពោះព្រឹទ្ធាចារ្យ និងបញ្ញវន្តមួយចំនួនដែលមានវ័យចំណាស់ បានលះបង់ពេលវេលា និងខិតខំចូលរួមចំណែកយ៉ាងសកម្មនៅក្នុងការបង្កើត និងអនុម័តបច្ចេកសព្ទនានាសម្រាប់ជាប្រយោជន៍ប្រជាជាតិខ្មែរ។ ឯកឧត្ដមបណ្ឌិតក៏បានបង្ហាញមោទកភាពរបស់បញ្ញវន្ត ដែលបានការធ្វើការងាររួមគ្នាដើម្បីផលប្រយោជន៍មនុស្សជាតិទូទៅ ហេតុនេះហើយ ទើបសទ្ទានុក្រមនេះត្រូវបានរៀបចំបង្កើតឡើងតាមទម្រង់ឌីជីថល ដើម្បីងាយស្រួលនៅក្នុងដាក់បញ្ចូលបច្ចេកសព្ទថ្មីៗដែលត្រូវបានបង្កើត។
ឯកឧត្ដមបណ្ឌិតសភាចារ្យ សុខ ទូច បញ្ជាក់ថា សទ្ទានុក្រមនិងបច្ចេកសព្ទដែលសម្រេចបានទាំងនេះ គឺជាការចូលរួមចំណែកនៅក្នុងការជំរុញឯកភាពភាសាខ្មែរ។
“សមិទ្ធផលនេះពិតជាមានតម្លៃឥតកាត់ថ្លៃបាននោះទេ ហើយសមិទ្ធផលនេះនឹងបន្តអភិវឌ្ឍភាសាខ្មែរឱ្យយូរអង្វែង”
កញ្ញា ងយ រស្មី គរុនិស្សិតផ្នែកអក្សរសាស្រ្តខ្មែរ នៃវិទ្យាស្ថានជាតិអប់រំ និយាយថា រូបនាងធ្លាប់ប្រើប្រាស់សន្ទនុក្រមកន្លងមកដូចជា សទ្ទានុក្រមអក្សរសិល្ប៍ សទ្ទានុក្រមភាសាវិទ្យា និងសន្ទានុក្រមដែលដាក់នៅខាងខ្នងសៀវភៅជាដើម។ រស្មី បន្តថា ការប្រើប្រាស់សទ្ទានុក្រម បានជួយឱ្យយល់កាន់តែស៊ីជម្រៅពីខ្លឹមសារអត្ថបទ និងបង្កភាពងាយស្រួលដល់ការសិក្សា និងការងារ ពិសេសក្នុងករណីជួបប្រទះពាក្យថ្មីដែលខុសពីបរិបទការសិក្សា និងការងាររបស់យើង។
សម្រាប់សន្ទានុក្រមបច្ចេកសព្ទ របស់រាជបណ្ឌិត្យសភាកម្ពុជា ដែលត្រូវបោះពុម្ពជាសៀវភៅផង និងទម្រង់ឌីជីថល កញ្ញា រស្មី យល់ថា វានឹងផ្ដល់ភាពងាយស្រួលបានច្រើនសម្រាប់ការសិក្សា និងការងារ ជាពិសេសសម្រាប់សិស្សានុសិស្ស លោកគ្រូ អ្នកគ្រូ មន្រ្តីរាជការ និងសាធារណៈជនទូទៅ អាចទទួលបានអត្ថន័យពាក្យដែលចង់បានទាន់ចិត្ត និងអាចទុកចិត្តបាន ព្រមទាំងសម្បូរបែប គ្រប់ផ្នែក គ្រប់បរិបទ ទោះយើងមិនស្ថិតនៅក្នុងបរិបទការសិក្សា ឬការងារនោះទេ។
គួរជម្រាបជូនថា បច្ចុប្បន្ន ពាក្យសរុបរបស់គណៈកម្មការបច្ចេកទេសនៃក្រុមប្រឹក្សាជាតិភាសាខ្មែរមានចំនួន ១៧ ០៩៦ពាក្យ និងបានពិនិត្យអនុម័តរួចរាល់ចំនួន ៣ ៤០៥ពាក្យ និងនៅសល់ចំនួន ១៣ ៦៩១ពាក្យទៀតកំពុងបន្តពិនិត្យអនុម័ត។ លើសពីនេះ ក្រុមប្រឹក្សាជាតិភាសាខ្មែរ បានពិនិត្យសម្រេចពាក្យដែលស្នើពីស្ថាប័ននានាបានចំនួន ៩២ពាក្យ ព្រមទាំងបានបោះពុម្ពផ្សាយព្រឹត្តិបត្រចំនួន ១៤លេខ សទ្ទានុក្រមបច្ចេកសព្វចំនួន ១០ សៀវភៅវេយ្យាករណ៍ភាសាខ្មែរ គោលនយោបាយជាតិស្ដីពីភាសាខ្មែរ វចនានុក្រមខ្មែរឆ្នាំ២០២២ និងដំណើរការបច្ចុប្បន្នកម្មវចនានុក្រមខ្មែរឆ្នាំ២០២២ ដោយបានបញ្ចូលពាក្យដែលបានអនុម័តជាទម្រង់ឌីជីថល ដែលមានសុសវែរវចនានុក្រមខ្មែរឆ្នាំ២០២២ (ប្រើប្រាស់ក្នុងទូរសព្ទដៃនិងកុំព្យូទ័រ) សុសវែរសទ្ទានុក្រមបច្ចេកសព្ទខ្មែរ (ប្រើប្រាស់ក្នុងទូរសព្ទដៃនិងកុំព្យូទ័រ) និងសុសវែរតាមដានការប្រើប្រាស់ភាសាខ្មែរនៅលើរូបសញ្ញា (កំណែស្លាកនិងការផ្សព្វផ្សាយ) ផងដែរ៕
