ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
កុមារតាមបណ្តោយព្រំដែននៃស្រុកជាំក្សាន្ត ខេត្តព្រះវិហារជាង៦០០នាក់ ដែលពួកគេបានភៀសខ្លួនមកជាមួយឪពុកម្តាយមកកាន់ជំរំសុវត្ថិភាព ដោយភ័យខ្លាចនឹងការប៉ះទង្គិចដោយប្រដាប់អាវុធ ពេលនេះ បានចូលរៀននៅសាលាបឋមសិក្សាដែលនៅជិតជំរំ ស្ថិតនៅវត្តពោធិ៍៥០០០ដើម ស្រុកគូលែន បន្ទាប់ពីមានការសម្របសម្រួលពីក្រសួងអប់រំ យុវជន និងកីឡា។
បើយោងតាមរបាយការណ៍របស់មន្ទីរអប់រំ យុវជន និងកីឡាខេត្តព្រះវិហារ កុមារតូចៗ និងសិស្សប្រមាណ ១៤០០នាក់ បានមកតាមឳពុកម្តាយ ដែលធ្វើឱ្យកុមារជាសិស្សានុសិស្សមិនបានទទួលការសិក្សានោះទេ។ ក្រោយពីមានការសម្របសម្រួលពីថ្នាក់ដឹកនាំនាយកដ្ឋានបឋមសិក្សា រដ្ឋបាលស្រុក និងការិយាល័យអប់រំ យុវជន និងកីឡានៃរដ្ឋបាលស្រុកគូលែន សិស្សានុសិស្សថ្នាក់ទី១ ដល់ថ្នាក់ទី៦ ចំនួន ៣៤៣នាក់ ស្រី ១៦៧នាក់ បានបន្តទទួលសិក្សា ដោយប្រើប្រាស់បន្ទប់រៀន ៦បន្ទប់ នៃសាលាបឋមសិក្សាដែលនៅជិតជំរំសុវត្ថិភាព ដោយកំណត់ពេលព្រឹកចាប់ពីម៉ោង ៧:០០ ដល់ម៉ោង ១១:០០ និងពេលរសៀលចាប់ពីម៉ោង ១៤:០០ នាទី ដល់ម៉ោង ១៧:០០ នាទី។
លោកជំទាវបណ្ឌិត ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា សម្រាប់សិស្សានុសិស្សនៅតាមព្រំដែន ពិសេសតំបន់ប្រាសាទព្រះវិហារ ក្រសួងបានរៀបចំបន្ទប់រៀនដោយបំពាក់សម្ភារឧបទេសនានា ព្រមទាំងប្រើប្រាស់ថ្នាល PLP ក្នុងការរៀន និងបង្រៀន។
ថ្នាល PLP គឺជាថ្នាលមួយដែលក្រសួងអប់រំបានរៀបចំឡើងដើម្បីគាំទ្រការសិក្សាកម្រិតបឋមសិក្សាផ្តោតលើអំណានដំបូង គណិតដំបូង និង វិទ្យាសាស្ត្រ។ ថ្នាលនេះ មានទាំងសកម្មភាពសិក្សា វាយតម្លៃ ពិនិត្យតាមដានការសិក្សារបស់ប្អូនៗ និងការផ្តល់អន្តរាគមន៍របស់គ្រូ។ នេះជាការបញ្ជាក់បន្ថែមរបស់ លោកជំទាវ ឃួន វិច្ឆិកា។
កាលពីថ្ងៃទី២០ ខែមិថុនា ឆ្នាំ២០២៥ លោកបណ្ឌិត កាន់ ពុទ្ធី ប្រធាននាយកដ្ឋានបឋមសិក្សា បាននាំយកអំណោយរបស់ ឯកឧត្តមបណ្ឌិតសភាចារ្យ ហង់ជួន ណារ៉ុន រួមមាន សម្ភារៈសិក្សានៃកញ្ចប់សម្ភារៈអំណាន និងគណិតវិទ្យាថ្នាក់ដំបូងចំនួន ៦០០ក្បាល ម៉ាស៊ីន LCD ១គ្រឿង ថេប្លេត ១០គ្រឿង សៀវភៅសរសេរ ៥០០ក្បាល និងប៊ិក ៥០០ដើម ដើម្បីផ្តល់ជូនដល់សិស្សានុសិស្ស និងលោកគ្រូ អ្នកគ្រូ ព្រមទាំងបានឧបត្ថម្ភថវិកា ២០០ដុល្លារ សម្រាប់លើកទឹកចិត្តគ្រូបង្រៀន ដើម្បីដំណើរការបង្រៀននិងរៀន ជាពិសេសការបន្តអនុវត្តថ្នាលបឋម PLP។
តាមសេចក្តីរាយការណ៍ រហូតដល់ព្រឹកថ្ងៃទី២៧ ខែមិថុនា ឆ្នាំ២០២៥ មានសិស្ស ២៦៣នាក់ ស្រី ១០២នាក់ បន្តមកសាលារៀន និងទទួលបានការសិក្សាដោយផ្ទាល់ជាមួយលោកគ្រូ អ្នកគ្រូ ព្រមទាំងបន្តរៀនតាមរយៈការអនុវត្តថ្នាលបឋម PLP ផងដែរ៕
