ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ក្រុមហ៊ុនធំៗប្រមាណ៣០ បានចូលរួមបង្ហាញឱកាសការងារក្នុងពិព័រណ៍ការងារ និងមគ្គុទេសក៍អាជីព មានរយៈពេលពីរថ្ងៃ គិតចាប់ពីថ្ងៃទី១៣ ដល់ថ្ងៃទី១៤ ខែមិថុនា ។ ពិព័រណ៍ការងារនេះ មានមុខតំណែងការងារសរុបប្រមាណជាង ៤៥០០កន្លែងកំពុងរង់ចាំសាធារណជន ធ្វើឡើងនៅអគារ KAMPUS ជិតស្ពានអាកាសក្បាលថ្នល់ សហការរៀបចំដោយទីភ្នាក់ងារជាតិមុខរបរ និងការងារ (NEA), សហភាពសហព័ន្ធយុវជនកម្ពុជា រាជធានីភ្នំពេញ, និងគាំទ្រដោយអង្គការអន្តរជាតិខាងការងារ (ILO ) ព្រមទាំងក្រុមហ៊ុនឯកជននានា ។
ឱកាសការងារសំខាន់ៗទាំងនោះ ដូចជា វិស័យធនាគារ និងធានារ៉ាប់រង, ការលក់ដុំ និងលក់រាយ, ព័ត៌មានវិទ្យា និងទំនាក់ទំនង, អេឡិចត្រូនិច, ផលិតទុយយោ, ផលិតចំណីសត្វ, បណ្តុះបណ្តាល និងសេវាកម្មផ្សេងៗ ។ គោលបំណងសំខាន់នៃពិព័រណ៍ការងារពីរថ្ងៃនេះ កំពុងបង្កើតជាវេទិកាប្រាស្រ័យទាក់ទងគ្នាដោយផ្ទាល់នៅមួយកន្លែង ដើម្បីស្វែងយល់ពីតម្រូវការងារ, ការជ្រើសរើសកម្លាំងពលកម្ម និងការដាក់ពាក្យស្នើសុំការងារ និងសម្ភាសន៍ការងារដោយផ្ទាល់នៅនឹងកន្លែង ។
លោកស្រី ឌី ចង្កុលណី អនុប្រធានទីភ្នាក់ងារជាតិមុខរបរ និងការងារ មានប្រសាសន៍ថា ពិព័រណ៍ការងារ និងមគ្គុទេសក៍អាជីព បានអនុវត្តស្របតាមគោលនយោបាយរបស់រាជរដ្ឋាភិបាល ដើម្បីពង្រីកការបើកចំហឱកាសការងារទៅសាធារណជនប្រកបដោយតម្លាភាព និងសមធម៌ សំដៅប្រែក្លាយឱកាសការងារទាំងអស់ទៅជាមុខរបរកាន់តែប្រសើរសម្រាប់ប្រជាពលរដ្ឋគ្រប់រូប ។
តំណាងទីភ្នាក់ងារជាតិមុខរបរ និងការងារ លោកស្រី ឌី ចង្កុលណី មានប្រសាសន៍បន្តថា ក្រៅពីទទួលបានឱកាសការងាររាប់ពាន់កន្លែងក្នុងមុខតំណែងខុសៗជាច្រើន យុវជន សិស្សនិស្សិត និងអ្នកស្វែងរកការងារ ក៏អាចទទួលបានគន្លឹះត្រៀមខ្លួនចូលទីផ្សារការងារនៅក្នុងសិក្ខាសាលាចែករំលែកចំណេះដឹង និងបទពិសោធន៍ដែលមានការចូលរួមពីសំណាក់វាគ្មិនជំនាញជាច្រើនរូប ។
សូមជម្រាបថា សម្រាប់យុវជន សិស្ស និស្សិត និងអ្នកស្វែងរកការងារដែលមានបំណងស្វែងរកការងារ ឬចង់ផ្លាស់ប្តូរការងារ អញ្ជើញចូលរួមពិព័រណ៍ការងារ និងមគ្គុទេសក៍អាជីពដោយផ្ទាល់ ព្រមទាំងត្រៀមប្រវត្តិរូបសង្ខេប (CV) ដើម្បីដាក់ពាក្យតាមមុខតំណែងក្នុងក្រុមហ៊ុនដែលខ្លួនពេញចិត្ត ៕
