នៅក្នុងឆ្នាំសិក្សា​២០២៣-២០២៤នេះ វិទ្យាល័យគោលដៅ​នៅទូទាំងប្រទេស នឹងត្រូវ​ដាក់​ឱ្យ​អនុវត្តការបង្រៀន​មុខ​វិជ្ជាបច្ចេកវិទ្យាព័ត៌មាន និង​សារគមនាគមន៍ថ្នាក់ទី១០ តាមសៀវភៅសិក្សាគោលថ្មី ដែលអភិវឌ្ឍឡើងដោយក្រសួងអប់រំ យុវជន និងកីឡា តាមរយៈគម្រោងអភិវឌ្ឍបច្ចេកវិទ្យាព័ត៌មាន និងសារគមនាគមន៍សម្រាប់ការអប់រំនៅកម្ពុជាក្រោមជំនួយរបស់សាធារណរដ្ឋប្រជាមានិតចិន។

បើតាមការបញ្ជាក់របស់ក្រសួងអប់រំ សៀវភៅសិក្សាគោលមុខវិជ្ជាបច្ចេកវិទ្យាព័ត៌មាន និងសារគមនាគមន៍ថ្នាក់ទី១០នេះចងក្រងឡើងស្របតាមខ្លឹមសារកម្មវិធីសិក្សាលម្អិតថ្មី ២០១៨-២០២៣ ដើម្បីផ្ដល់ឱ្យសិស្សនៅគោលគំនិតចាំបាច់ទាក់ទងនឹងបំណិនវិជ្ជាជីវៈរួមមានការត្រិះរិះពិចារណាបានស៊ីជម្រៅការប្រាស្រ័យទាក់ទងការដោះស្រាយបញ្ហានិងបំណិនបច្ចេកទេសក្នុងការរៀបចំខ្លួន ដើម្បីអាចធ្វើការនៅក្នុងបរិយាកាសការងារដែលប្រើប្រាស់បច្ចេកវិទ្យាសម្រាប់ជាជំនួយដល់ការទំនាក់ទំនងការរៀបចំឯកសារអត្ថបទការងារការប្រើប្រាស់អ៊ីនធឺណិត និងអ៊ីមែលក្រមសីលធម៌ នៃការប្រើប្រាស់អ៊ីនធឺណិត និងការសិក្សាពីចម្ងាយតាមប្រព័ន្ធអេឡិចត្រូនិក (e-Learning)។

នៅក្នុងអារម្ភកថា នៃសៀវភៅសិក្សាគោលមុខវិជ្ជាបច្ចេកវិទ្យាព័ត៌មាន និងសារគមនាគមន៍ ក្រសួងអប់រំលើកឡើងថា បច្ចុប្បន្ននេះ បច្ចេកវិទ្យាព័ត៌មាន​កំពុង​រីកចម្រើន​យ៉ាងឆាប់រហ័ស ជាមួយ​នឹង​ការ​ច្នៃប្រឌិតសម្បូរ​បែប ដូចជា ការប្រើប្រាស់​បច្ចេកវិទ្យាឧបករណ៍​ភ្ជាប់អ៊ីនធឺណេត (IoT), ទិន្នន័យធំ (Big Data) និងបញ្ញាសិប្បនិម្មិត (AI) បានផ្លាស់ប្តូរ​យ៉ាងខ្លាំងពីរបៀបដែលមនុស្សរស់នៅ សិក្សា និង​ធ្វើការងារជាប្រចាំថ្ងៃ ។ នៅ​ក្នុងសង្គមព័ត៌មាន យើងជួបប្រទះ និង​ប្រើប្រាស់បច្ចេកវិទ្យាព័ត៌មានដោយជៀសមិនរួច ហើយ​អ្នក​ខ្លះថែមទាំង​អាច​បង្កើតបច្ចេកវិទ្យាថ្មីៗទៀតផង ដូច្នេះ ក្នុងនាមជា​សិស្សវិទ្យាល័យ ការ​ទទួលបានជំនាញវិជ្ជាជីវៈបច្ចេកវិទ្យាព័ត៌មាន និង​សារគមនាគមន៍ (ICT) គឺចាំបាច់ និង​មានសារៈសំខាន់ ដើម្បីជោគជ័យ​នៅ​ក្នុងទីផ្សារ​ការងារបច្ចុប្បន្ន ក៏​ដូចជា​ជោគជ័យ​ក្នុងការអប់រំនៅ​កម្រិតឧត្តមសិក្សា។

គួរបញ្ជាក់ដែរថា នៅអំឡុងខែតុលា ដល់ ខែវិច្ឆិកា ឆ្នាំ២០២៣ ក្រសួងអប់រំ យុវជន និងកីឡាតាមរយៈនាយកដ្ឋានបច្ចេកវិទ្យាព័ត៌មាន បានផ្ដល់ការបណ្ដុះបណ្ដាលស្ដីពីវិធីសាស្ត្របង្រៀនសៀវភៅសិក្សាគោល ICTថ្នាក់ទី១០នេះ ដល់លោកគ្រូអ្នកគ្រូចំនួន៣០០នាក់ មកពីវិទ្យាល័យចំនួន១៥០ នៅទូទាំងប្រទេសដើម្បីទទួលបានចំណេះដឹង និងបំណិនបច្ចេកទេសក៏ដូចជាវិធីសាស្ត្របង្រៀនតាមបែបសតវត្សទី២១ ក្នុងការបន្តបង្រៀនសិស្សនៅតាមសាលារៀនគោលដៅនីមួយៗប្រកបដោយប្រសិទ្ធភាពខ្ពស់៕