ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ជាថ្មីម្តងទៀត តាមរយៈសេចក្តីណែនាំស្តីពីការពង្រឹងការអនុវត្តបទបញ្ជាផ្ទៃក្នុងនៅតាមគ្រឹះស្ថានសិក្សា, ក្រសួងអប់រំ បានធ្វើការហាមដាច់ខាត មិនឱ្យសិស្សប្រើប្រាស់ទូរស័ព្ទដៃក្នុងថ្នាក់រៀនឡើយ ទោះក្នុងម៉ោងរៀន ឬម៉ោងចេញលេង លើកលែងតែមានការអនុញ្ញាត។ ការហាមឃាត់ការប្រើប្រាស់ទូរស័ព្ទដៃក្នុងថ្នាក់រៀននេះ គឺក្នុងបំណងលើកកម្ពស់ចរិយាសម្បទារបស់សិស្ស។
ក្រសួងអប់រំលើកឡើងថា ការអប់រំចរិយាសម្បទារបស់អ្នកសិក្សា គឺជាភារកិច្ច និងទាមទារការចូលរួមរបស់អ្នកពាក់ព័ន្ធទាំងអស់ ដែលរួមមាន គណៈគ្រប់គ្រងសាលារៀន គ្រូបង្រៀន មាតាបិតា អ្នកអាណាព្យាបាល និងអាជ្ញាធរពាក់ព័ន្ធ ក៏ដូចជាសង្គមជាតិទាំងមូល។
ក្នុងសេចក្តីណែនាំ ក្រសួងអប់រំ បានរំលឹក សិស្សានុសិស្ស កុំឱ្យលេងល្បែងស៊ីសង ឬល្បែងភ្នាល់គ្រប់ប្រភេទនៅក្នុងគ្រឹះស្ថានសិក្សា ក៏ដូចជាមិនត្រូវជក់បារីគ្រប់ប្រភេទផងដែរ ដោយសិស្សានុសិស្ស ត្រូវរក្សាភាពថ្លៃថ្នូរ សីលធម៌ និងសុជីវធម៌, សិស្សានុសិស្ស ក៏ត្រូវចូលរួមអនុវត្តតាមកម្មវិធីសិក្សា និងសកម្មភាពក្រៅម៉ោងសិក្សា ដែលគ្រឹះស្ថានសិក្សាបានកំណត់ ដូចជា ចូលរួមស្តាប់កម្មវិធីសំដែងធម៌ទេសនា ឬបឋកថាអំពីសីលធម៌ ឬសុជីវធម៌។
ជាមួយគ្នានេះ ក្រសួងអប់រំ ក៏បានណែនាំទៅដល់មន្ទីរអប់រំ ត្រូវសហការសម្របសម្រួល និងជំរុញការអនុវត្តសកម្មភាពក្រៅម៉ោងសិក្សា ដូចជា កម្មវិធីអប់រំចិត្ត កម្មវិធីប្រឹក្សាយោបល់ បាឋកថាអំពីសីលធម៌ ឬសុជីវធម៌ប្រចាំសប្តាហ៍ កម្មវិធីអប់រំសីលធម៌ ការងារស្ម័គ្រចិត្ត កីឡា ក្លឹបសិក្សា សកម្មភាពបណ្ណាល័យ និងការសិក្សាស្រាវជ្រាវជាក្រុមជាដើម៕
