ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ថ្លែងក្នុងកិច្ចប្រជុំក្រុមប្រឹក្សាភិបាលវិទ្យាស្ថានគរុកោសល្យបាត់ដំបង កាលពីពេលថ្មីៗកន្លងទៅ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា មានប្រសាសន៍ដោយជំរុញឱ្យគ្រប់គ្រឹះស្ថានបណ្តុះបណ្តាលគ្រូទាំងអស់ត្រូវកែលម្អវិធីសាស្រ្តបង្រៀនផ្ដោតសំខាន់លើគណិតដំបូង អំណានដំបូង និងវិទ្យាសាស្រ្ត។
គួរបញ្ជាក់ថា គោលបំណងនៃកិច្ចប្រជុំនេះ គឺពិនិត្យមើលអំពីការអនុវត្តកម្មវិធីសិក្សា នៅវិទ្យាស្ថានគរុកោសល្យ ដើម្បីឆ្លើយតបទៅនឹងកំណែទម្រង់សាលារៀន ជាពិសេសកំណែទម្រង់វិធីសាស្ត្របង្រៀន។
ឯកឧត្តមបណ្ឌិតសភាចារ្យ ហង់ជួន ណារ៉ុន មានប្រសាសន៍បន្ថែមថា គរុនិស្សិតដែលត្រូវចុះកម្មសិក្សាគរុកោសល្យចាំបាច់ត្រូវតែមានសៀវភៅណែនាំគ្រូដើម្បីជាជំនួយក្នុងការបង្រៀន ហើយ គ្រូឧទ្ទេសគប្បីបន្ដការសិក្សាស្រាវជ្រាវបន្ថែម និងសហការជាមួយនឹងសាលាជំនាន់ថ្មីដើម្បីផ្លាស់ប្ដូរបទពិសោធន៍គ្នាទៅវិញទៅមកលើវិធីសាស្ត្របង្រៀន ជាពិសេសទៅលើគណិតដំបូង អំណានដំបូង និងវិទ្យាសាស្ត្រ។ សាលាគរុកោសល្យ ត្រូវអភិវឌ្ឍសមត្ថភាព ចំណេះដឹង ជំនាញ និងគំនិតច្នៃប្រឌិតថ្មីៗ ដើម្បីឆ្ពោះទៅរកស្ដង់ដារសាលាគរុកោសល្យគំរូ។
ជាមួយគ្នាឯកឧត្តមរដ្ឋមន្ត្រីក៏បានស្នើដល់គណៈគ្រប់គ្រង លោកគ្រូ អ្នកគ្រូ ត្រូវយកចិត្តទុកដាក់ខ្ពស់ចំពោះការបណ្តុះបណ្តាលគរុនិស្សិត ដើម្បីទទួលបាននូវគរុនិស្សិតដែលមានសមត្ថភាពបរិបូណ៌ក្នុងគោលបំណងជំរុញការអភិវឌ្ឍកំណែទម្រង់វិស័យអប់រំនៅកម្ពុជាឱ្យកាន់តែរីកចម្រើនទៅមុខទៀត។
គួរជម្រាបជូនថា បច្ចុប្បន្ន វិទ្យាស្ថានគរុកោសល្យបាត់ដំបង បាននិងកំពុងអភិវឌ្ឍសមត្ថភាពស្រាវជ្រាវរបស់គ្រូឧទ្ទេស ដោយផ្សារភ្ជាប់ទ្រឹស្តីទៅនឹងការអនុវត្តកម្មវិធីសិក្សាគរុកោសល្យ។ បន្ថែមពីនេះ វិទ្យាស្ថានក៏បានរៀបចំដំណើរការកម្មវិធីអភិវឌ្ឍវិជ្ជាជីវៈជាប្រចាំ (CPD) និងវគ្គសិក្សាភាសាបរទេសផ្សេងៗផងដែរ៕
