ភ្នំពេញ – នៅក្នុងសន្និសីទអប់រំស្តីពី “អ្វីដែលខ្ញុំរៀន និងអ្វីដែលខ្ញុំអនុវត្ត” ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ដ្រីក្រសួងអប់រំ យុវជន និងកីឡា មានប្រសាសន៍ថា ការពង្រឹងគុណភាពគ្រូបង្រៀន និងកំណែទម្រង់គ្រឹះស្ថានបណ្តុះបណ្តាលគ្រូបង្រៀន គឺជាអាទិភាពមួយក្នុងចំណោមអាទិភាពចំពោះមុខចំនួនប្រាំបីនៃកំណែទម្រង់អប់រំ យុវជន និងកីឡា ។ បណ្តុះបណ្តាលសមត្ថភាពគ្រូបង្រៀនមានគោលដៅលើកកម្ពស់គុណភាពអប់រំ ពិសេសការអប់រំនៅក្នុងសតវត្សទី២១ ឆ្លើយតបនឹងតម្រូវការអភិវឌ្ឍសេដ្ឋកិច្ច និងសង្គម ។

ស្របគ្នានេះ ឯកឧត្តមបណ្ឌិតសភាចារ្យរដ្ឋមន្ត្រីអប់រំ មានប្រសាសន៍បញ្ជាក់ថា ការបណ្តុះបណ្តាលធនធានមនុស្សដែលមានគុណភាព (គ្រូបង្រៀន) ចាំបាច់ត្រូវកែលម្អប្រព័ន្ធអប់រំជាប្រចាំ រួមមាន ការធ្វើកំណែទម្រង់គ្រឹះស្ថានបណ្តុះបណ្តាលគ្រូបង្រៀន ការលើកកម្ពស់គុណភាពបណ្តុះបណ្តាលគ្រូបង្រៀន ការអភិវឌ្ឍកម្មវិធីបណ្តុះបណ្តាលគ្រូបង្រៀន ព្រមទាំងការកែលម្អបរិស្ថានអប់រំឱ្យស្របតាមស្តង់ដារជាតិ និងអន្តរជាតិ ។

គុណភាពគ្រូនៅតែស្ថិតក្នុងចំណោម អាទិភាពកំពូលរបស់ក្រសួងអប់រំ យុវជន និងកីឡា ដែលបានបង្កប់នៅក្នុងយុទ្ធសាស្ត្រកំណែទម្រង់វិស័យអប់រំ យុវជន និងកីឡា គាំទ្រដោយយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលកម្ពុជាអាណត្តិទី៦ ។ យុទ្ធសាស្ត្រចតុកោណដំណាក់កាលទី៤ ដែលបានចាត់ទុកថា ការអភិវឌ្ឍធនធានមនុស្សជាអាទិភាពទី១ ។

ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ដ្រីក្រសួងអប់រំ បានលើកឡើងថា កន្លងទៅតាមរយៈការគាំទ្រពីអង្គការ JICA ក្រសួងអប់រំ យុវជន និងកីឡា បានសង់អគារសិក្សា និងបំពាក់សម្ភារៈសិក្សាទំនើបនៅវិទ្យាស្ថានគរុកោសល្យរាជធានីភ្នំពេញ និងវិទ្យាស្ថានគរុកោសល្យបាត់ដំបង ព្រមទាំងសង់អន្តេវាសិកដ្ឋានសម្រាប់គ្រូបង្រៀនផងដែរ ។ ជាមួយគ្នានេះ ក្រសួងអប់រំក៏បានកែលម្អកម្មវិធីបណ្តុះបណ្តាល និងលើកកម្ពស់គុណវុឌ្ឍគ្រូឧទ្ទេសកម្រិតបឋមសិក្សា និងអនុវិទ្យាល័យ (១២+២ ទៅជា ១២+៤) និងសម្រាប់ឧត្តមសិក្សាកំណត់យកកម្រិតបរិញ្ញាបត្រជាន់ខ្ពស់ឡើងទៅ ។

ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ដ្រីក្រសួងអប់រំ

“គោលដៅកំណែទម្រង់គ្រូបង្រៀនដើម្បីពង្រឹងគុណភាពគ្រូ និងលើកកម្ពស់កិត្តិយសគ្រូបង្រៀននៅក្នុងសង្គម ! ដើម្បីឱ្យម្តាយឪពុក ឬអាណាព្យាបាលសិស្សមានទំនុកចិត្តលើគ្រូបង្រៀន គ្រូបង្រៀនចាំបាច់ត្រូវមានចំណេះដឹងទូទៅទូលំទូលាយ ស្របតាមស្តង់ដារវិជ្ជាជីវៈគ្រូបង្រៀន ”

ផ្អែកតាមការសិក្សាស្រាវជ្រាវរបស់ UNESCO ការបណ្តុះបណ្តាល និងជួយគាំទ្រគ្រូបង្រៀននៅក្នុងអំឡុងពេលប្រាំឆ្នាំដំបូង នៃការបង្រៀនក្នុងថ្នាក់ គឺជាវិធីសាស្ត្រមួយដ៏មានប្រសិទ្ធភាព ដើម្បីជំរុញការវិវត្តវិជ្ជាជីវៈរបស់គ្រូបង្រៀន ។ ចំណែកការគាំទ្រវិជ្ជាជីវៈគ្រូបង្រៀន រួមមាន ផ្តល់ឱកាសសិក្សាសម្រាប់គ្រូបង្រៀន រៀបចំសិក្ខាសាលាបណ្តុះបណ្តាល ទទួលបានការគាំទ្រពីអ្នកប្រឹក្សា អធិការវិក្រិតការ ដំណើរទស្សនកិច្ចផ្លាស់ប្ដូរបទពិសោធរវាងសាលា និងការផ្តល់ប្រឹក្សារវាងគ្រូក្នុងក្រុមគ្រូបង្រៀនដូចគ្នា ។

សូមជម្រាបថា សន្និសីទអប់រំស្តីពី “អ្វីដែលខ្ញុំរៀន និងអ្វីដែលខ្ញុំអនុវត្ត” រៀបចំឡើងមានគោលបំណងរៀនសូត្រពីការចែករំលែកចំណេះដឹង ទ្រឹស្តីសិក្សា ការស្រាវជ្រាវ តាមរយៈបទពិសោធន៍អនុវត្តជាក់ស្តែង និងឧត្តមានុវត្តដែលអ្នកធ្វើបទបង្ហាញជាវាគ្មិន និងអ្នកចូលរួមទាំងអស់។ ឧត្តមានុវត្តដែលទទួលបានពីសន្និសីទនេះ នឹងជួយពង្រឹងដល់ការអភិវឌ្ឍន៍ របៀបវារៈនានាដែលមានក្នុងកម្មវិធីកំណែទម្រង់ការអប់រំគ្រូបង្រៀនរបស់ក្រសួងអប់រំ យុវជន និងកីឡា។

សន្និសីទអប់រំស្តីពី “អ្វីដែលខ្ញុំរៀន និងអ្វីដែលខ្ញុំអនុវត្ត” បានប្រព្រឹត្តិទៅកាលពីថ្ងៃទី២៦-២៧ ខែមិថុនា ឆ្នាំ២០២៣ ក្រោមកិច្ចសហការរវាងក្រសួងអប់រំ យុវជន និងកីឡា និងអង្គការដៃគូអភិវឌ្ឍវិស័យអប់រំនៅកម្ពុជា តាមរយៈគម្រោងមូលនិធិភាពជាដៃគូសម្រាប់អភិវឌ្ឍសមត្ថភាព វិស័យអប់រំ (CDPFIII) ធ្វើឡើងនៅសណ្ឋាគារភ្នំពេញ និងតាមរយៈប្រព័ន្ធអនឡាញមានអ្នកចូលរួមប្រមាណ ៥០០នាក់ ៕