ភ្នំពេញ – ខណៈ​ដែលសង្គម​សេដ្ឋកិច្ច​កំពុងតែវិវឌ្ឍ​ទៅមុខ ដែល​តម្រូវ​ឱ្យ​បុគ្គលិក និយោជិត​ត្រូវមាន​កម្រិតជំនាញ​កាន់តែខ្ពស់ជាង​មុន គេសង្កេត​ឃើញថា វិស័យ​ឯកជនកាន់តែច្រើន​ចាប់ផ្តើម​ធ្វើការ​អភិវឌ្ឍ​សមត្ថភាព​បុគ្គលិក​ និងថ្នាក់ដឹកនាំ ក្នុង​ទិដៅ​រក្សា​និរន្តរភាព​ស្ថាប័នរបស់ខ្លួន។

លោក គុជ សាវ៉ាត នាយកគ្រប់គ្រងវិទ្យាស្ថានអភិវឌ្ឍវិស័យអប់រំ (EDI) លើកឡើងថា កន្លងមក EDI បាន​ផ្តល់សេវាកម្មវគ្គបណ្តុះបណ្តាលដល់ក្រុមហ៊ុន ស្ថាប័នរដ្ឋ អង្គការជាតិ និងអន្តរជាតិជាច្រើន ដោយ​ឡែក​នៅ​ក្នុងថ្ងៃកម្មវិធីប្រកាសផែនការវគ្គបណ្តុះបណ្តាល និងជប់លៀងថ្លែងអំណរគុណដៃគូអាជីវកម្មកាលពីពេលថ្មីៗនេះ មានក្រុមហ៊ុនជាង១០ បានសម្រេចចិត្តបន្តធ្វើកិច្ចសន្យា ក្នុងការទទួលសេវាកម្មបណ្តុះបណ្តាល និងប្រឹក្សាយោបល់ជាមួយ EDI សម្រាប់ឆ្នាំ២០២៣នេះបន្តទៀត  ចំណែកស្ថាប័នមួយចំនួនទៀតក៏កំពុងគិតពិចារណាចុះកិច្ចសន្យាជាមួយ EDI ផងដែរ។

លោកបន្តថា ចំពោះវគ្គបណ្តុះបណ្តាលដល់ស្ថាប័នដៃគូរមានដូចជា ការគ្រប់គ្រងធនធានមនុស្ស គ្រប់គ្រងធុរៈកិច្ច ជំនាញផ្នែកលក់និងទីផ្សារ ភាពជាអ្នកដឹកនាំ គណនេយ្យនិងហិរញ្ញវត្ថុ ការគ្រប់គ្រងគំរោងនិងស្រាវជ្រាវ ការបណ្តុះបណ្តាលនិងអភិវឌ្ឍបុគ្គលិក ។

តាមប្រសាសន៍លើក​ឡើងរបស់ ឯកឧត្តម ជា កុកហុក ប្រធានគម្រោងមូលនិធិអភិវឌ្ឍជំនាញ នៃក្រសួងសេដ្ឋកិច្ច និងហិរញ្ញវត្ថុ បានលើក​ឡើងថា ក្នុងរយៈពេល​៥ឆ្នាំចុងក្រោយនេះ សេដ្ឋកិច្ច​កម្ពុជា​ហាក់​មានកំណើន​ខ្ពស់ ដែល​រុញ​ច្រាន​ឱ្យ​មានការ​ប្រើប្រាស់​សេវាកាន់តែមាន​កម្រិត​ជំនាញ​ខ្ពស់ជាង ។ បើតាម ឯកឧត្តម ជា កុកហុក បច្ចុប្បន្ន​បើមើល​ទៅ​លើ​និន្នាការ​ពិភពលោក ពីមួយ​ឆ្នាំទៅ​មួយ​ឆ្នាំ គឺមាន​ការ​ផ្លាស់ប្តូរ ​គួបផ្សំ​នឹង​វិបត្តិសេដ្ឋកិច្ច ពីនេះទៅមុខ គឺនឹង​មានការ​ប្រកួតប្រជែង ដែលចាំបាច់​ស្ថាប័ន​​នីមួយៗ​ត្រូវ​តែ​ពង្រឹង​ជំនាញ​បុគ្គលិក ដែលជា​យុទ្ធសាស្រ្ត​វែងឆ្ងាយ ក្នុង​ការ​អភិវឌ្ឍស្ថាប័ន​ទៅមុខ​ទៀត។

សូមជម្រាបថា វិទ្យាស្ថានអភិវឌ្ឍវិស័យអប់រំ ចាប់ដំណើរការតាំងពីឆ្នាំ២០០៧ ក្នុងការផ្តល់នូវសេវាកម្មអប់រំ ប្រឹក្សាយោបល់ និងសិក្សាស្រាវជ្រាវ ក្នុងគោលបំណងអភិវឌ្ឍសមត្ថភាពរបស់បុគ្គលិក អ្នកគ្រប់គ្រង និងអ្នកជំនួញនៅក្នុងប្រទេសកម្ពុជា ។ វិទ្យាស្ថានបានទទួលនូវសិទ្ធផ្តាច់មុខក្នុងការប្រើប្រាស់ និងចែកចាយនូវកម្មវិធីអប់រំ “ទម្លាប់ទាំង៧ របស់បុគ្គលឆ្នើម” នៃក្រុមហ៊ុន Franklin Covey Education មកពីសហរដ្ឋអាមេរិកផងដែរ៕