ក្រុមរ៉ូបូតដែលមកពី Toyohashi University of Technology តំណាងឱ្យប្រទេសជប៉ុន បានឈ្នះ​ជ័យលាភីលេខ១ ខណៈចំណាត់ថ្នាក់លេខ២ បានទៅ​លើ​ក្រុម​មក​ពី​ចិនហុងកុង ក្នុងការប្រកួតរ៉ូបូតអន្តរជាតិ (ABU ROBOCON 2023) នាល្ងាចថ្ងៃទី២៧ ខែសីហា ឆ្នាំ២០២៣ នៅពហុកីឡដ្ឋានជាតិមរតកតេជោ រាជធានីភ្នំពេញ។

ព្រឹត្តិការណ៍ប្រកួតរ៉ូបូតថ្នាក់អន្តរជាតិ (ABU Robocon 2023) ដែល​កម្ពុជាធ្វើជាម្ចាស់ផ្ទះ បានប្រព្រឹត្ត​ទៅពេញ​មួយថ្ងៃ នៅថ្ងៃទី២៧ ខែសីហា ឆ្នាំ​២០២៣ ដោយមានក្រុមនិស្សិតចំនួន ១៤ក្រុម មកពីប្រទេស និងដែនដីចំនួន១៣ ចូលរួមប្រកួតរួមមាន ៖ កម្ពុជា (២ក្រុម) ចិន អេហ្សីប ដែនដីហុងកុងនៃប្រទេសចិន ឥណ្ឌា ឥណ្ឌូនេស៊ី ជប៉ុន ម៉ាឡេស៊ី ម៉ុងហ្គោលី នេប៉ាល់ ស្រីលង្កា ថៃ និងវៀតណាម ។ ក្រុមទាំងអស់ នឹងប្រកួតប្រជែងនៅលើទីលានតទល់គ្នាដោយផ្ទាល់ ក្រោមវិញ្ញាសារបស់ព្រះរាជាណាចក្រកម្ពុជា ពោលគឺ “រ៉ូបូតបាចផ្កាលើប្រាសាទអង្គរវត្ត ឬ រ៉ូបូតបោះកងចូលក្នុង បង្គោល” ។

គួរបញ្ជាក់ផងដែរកម្មវិធី ABU Asia-Pacific Robot Contest (ABU Robocon) គឺជាការប្រកួតប្រជែងរ៉ូបូត ដែលបង្កើតឡើងតាំងពីឆ្នាំ 2002 ដោយសហភាពផ្សព្វផ្សាយអាស៊ីប៉ាស៊ីហ្វិក។ ការប្រកួតនេះត្រូវបានបង្កើតឡើងដោយមានគោលបំណងបង្កើតមិត្តភាពក្នុងចំណោមយុវជនដែលមានចំណាប់អារម្មណ៍ស្រដៀងគ្នាដើម្បីជួយជំរុញវិស្វកម្ម និងបច្ចេកវិទ្យានៅក្នុងតំបន់។

លោក ឃឹម វុទ្ធី អគ្គនាយកទូរទស្សន៍​ជាតិ​កម្ពុជា មានប្រសាសន៍ថា ចាប់តាំងពីឆ្នាំ ២០១៧មក ផលិតករទូរទស្សន៍ជាតិកម្ពុជា បានដឹកនាំក្រុមរ៉បូតកម្ពុជា ទៅចូលរួមប្រកួតប្រជែងថ្នាក់តំបន់ ដោយទទួលបានការចាប់អារម្មណ៍ពីមជ្ឈដ្ឋានជាតិ និងអន្តរជាតិ ហើយក្នុងឆ្នាំបន្តបន្ទាប់ ថ្វីត្បិតតែក្រុមនិស្សិតកម្ពុជា មិនទទួលបានចំណាត់ថ្នាក់ល្អ តែលទ្ធផលដែលទទួលបាន គឺគួរជាទីពេញចិត្តសម្រាប់កម្ពុជា រហូតដល់កម្ពុជា មានសមត្ថភាព ទទួលបានសិទ្ធិធ្វើជាម្ចាស់ផ្ទះក្នុងការរៀបចំការប្រកួតប្រជែងរ៉ូបូតថ្នាក់តំបន់ក្នុង ឆ្នាំ២០២៣នេះ៕