ភ្នំពេញ – ថ្លែងក្នុងទិវាអន្តរជាតិអ្នកស្ម័គ្រចិត្ត ៥ ធ្នូ និងការប្រកួតវគ្គផ្ដាច់ព្រ័ត្រកម្មវិធី “ការស្ម័គ្រចិត្តដើម្បីសហគមន៍ខ្ញុំ” កាលពីថ្ងៃទី១៤ ខែធ្នូ ឆ្នាំ២០២២កន្លងទៅ ឯកឧត្ដម សេរី ជំនះ រដ្ឋលេខាធិការរសួងអប់រំ យុវជន និងកីឡា មានប្រសាសន៍លើក​ឡើងថា ការធ្វើការងារស្ម័គ្រចិត្តគឺជាឱកាសមួយ អាចជួយឱ្យយុវជន បានរៀនសូត្រ និងអភិវឌ្ឍខ្លួនឯង ទាំងជំនាញរឹង និងជំនាញទន់ និងស្មារតីស្នេហាជាតិ និងស្នេហាប្រជាជនរបស់ខ្លួន។

ឯកឧត្ដម សេរី ជំនះ រដ្ឋលេខាធិការរសួងអប់រំ យុវជន និងកីឡា បន្ថែមថា តម្លៃនៃការងារស្ម័គ្រចិត្ត គឺបានមកដោយសុទ្ធចិត្ត ដោយការប្ដេជ្ញាចិត្ត ដោយការចូលរួម និងការសាមគ្គីភាព។ ឯកឧត្ដមបន្តថា ការងារស្ម័គ្រចិត្ត គឺជួយដោយសន្តិភាព ជួយដោយក្ដីស្រឡាញ់ និងមិនសង្ឃឹមថានឹងទទួលបាននូវផលកម្រៃ ឬផលប្រយោជន៍តបស្នងមកវិញនោះឡើយ។

រដ្ឋលេខាធិការក្រសួងអប់រំ បន្ថែមទៀតថា យុវជនគឺជាធនធានមនុស្ស ជាទ្រព្យដ៏សំខាន់សម្រាប់កិច្ចអភិវឌ្ឍប្រទេសជាតិឱ្យមានការរីកចម្រើនប្រកបដោយចីរភាព និងនិរន្តរភាព។ ស្របគ្នានេះ យុវជនត្រូវតែចូលរួមគ្នាលើកកម្ពស់ការងារស្ម័គ្រចិត្តដោយចាត់ទុកថា ការរៀនសូត្រជាក់ស្ដែងមួយទៀតដែលផ្ដល់ដល់អ្នកស្ម័គ្រចិត្តនូវបទពិសោធន៍ដ៏មានតម្លៃ និងមានភាពសម្បូរបែប ដូចជាការកសាងនូវមូលដ្ឋានទំនាក់ទំនងក្នុងសង្គម ការពង្រឹង និងពង្រីកចំណងមិត្តភាព សាមគ្គីភាព ការងារជាក្រុម ការជួយគ្នាទៅវិញទៅមក និងចូលរួមអភិវឌ្ឍសហគមន៍របស់យើង។

ឯកឧត្ដម សេរី ជំនះ រដ្ឋលេខាធិការក្រសួងអប់រំ យុវជន និងកីឡា

“ការងារស្ម័គ្រចិត្តមិនត្រឹមតែជួយបង្កើននូវសាមគ្គីភាព ភាពស្និទ្ធស្នាលប៉ុណ្ណោះនោះទេ ប៉ុន្តែជួយឱ្យប្អូនៗយុវជនមានបំណិនជីវិត មានភាពជឿជាក់លើខ្លួនឯង ហើយតាមរយៈការងារស្ម័គ្រចិត្តនេះ ក៏បានចូលរួមចំណែកជួយអភិវឌ្ឍសហគមន៍ ក៏ដូចជាសង្គមជាតិទាំងមូលផងដែរ”

រដ្ឋលេខាធិការក្រសួងអប់រំ មានប្រសាសន៍ថា យុវជនត្រូវចាប់ផ្ដើមធ្វើការងារពីបន្តិចបន្តួចទៅ កុំប្រកាន់ ពីព្រោះថាការងារតូចតាចក៏តែងបង្រៀនយើងនូវអ្វីមួយដែលថ្មីៗជានិច្ច។ លើសពីនេះ ប្រសិនថ្ងៃណាមួយយើងបានក្លាយជាអ្នកដឹកនាំ ជាគ្រូបង្រៀន ជាវេជ្ជបណ្ឌិត ជាវិស្វករ នោះយើងនឹងក្លាយជាមនុស្សម្នាក់ដែលមានសក្ដានុពលនៅក្នុងការគ្រប់គ្រងអ្នកដ៏ទៃ។ ក្នុងនោះ ប្រសិនយុវជនមានបទពិសោធន៍ធ្វើការងារស្ម័គ្រចិត្ត នោះនឹងអាចធ្វើការងារជាក្រុមបានយ៉ាងងាយស្រួលជាមួយសមាជិកនៅក្នុងក្រុមរបស់ខ្លួន។

ឯកឧត្ដម សេរី ជំនះ រដ្ឋលេខាធិការក្រសួងអប់រំ យុវជន និងកីឡា

“ខ្ញុំជឿជាក់ថា កិច្ចការងារតូចតាចនៅថ្ងៃនេះពិតជាមានសារៈសំខាន់ខ្លាំងណាស់ក្នុងការជួយឱ្យកិច្ចការធំអាចសម្រេចទៅបានដោយជោគជ័យ ហើយអ្វីដែលសំខាន់គឺការចេះដាក់ខ្លួន និងមិនប្រកាន់ការងារតូចតាច”

ឯកឧត្ដម សេរី ជំនះ បញ្ជាក់បន្ថែមថា ដើម្បីចូលរួមក្នុងកិច្ចអភិវឌ្ឍសហគមន៍របស់ខ្លួន ក្រសួងអប់រំបានបង្កើតកម្មវិធីមួយ ឈ្មោះថា «ការងារស្ម័គ្រចិត្តដើម្បីសហគមន៍ខ្ញុំ» ហើយជាបទពិសោធន៍ជាក់ស្ដែង ក្នុងរយៈពេល៦ខែ ប្អូនៗយុវជនបានបង្កើតគម្រោងសរុបចំនួន ៨៦ គម្រោង ទូទាំងប្រទេសនៅស្រុកកកងមាស។ ក្នុងនោះ យុវជនចំនួន ៦ក្រុម ត្រូវជ្រើសរើសមកប្រកួតវគ្គផ្ដាច់ព្រ័ត្រក្នុងកម្មវិធី “ការស្ម័គ្រចិត្តដើម្បីសហគមន៍ខ្ញុំ” ដែលជាសមិទ្ធផលក្នុងការជួយអភិវឌ្ឍដល់កសិករសហគមន៍ តាមរយៈការងារស្ម័គ្រចិត្ត។

តាមរយៈការប្រារព្ធទិវាអ្នកស្ម័គ្រចិត្តអន្តរជាតិ ៥ ធ្នូ ឯកឧត្ដម សេរី ជំនះ ជឿជាក់ថា នឹងជំរុញលើកទឹកចិត្តដល់ប្អូនៗយុវជន មានឆន្ទៈ កាន់តែក្លៀវក្លា ប្រឹងប្រែង ចូលរួមបម្រើ រួចផ្ដល់នូវគំនិត និងហ៊ានចំណាយពេលវេលារបស់ខ្លួនក្នុងការងារស្ម័គ្រចិត្តនូវគ្រប់ទីកន្លែង គ្រប់ពេលវេលាដែលជាការងារមួយដ៏មានតម្លៃសម្រាប់សង្គមជាតិ ក៏ដូចជាការកសាងលក្ខណៈសម្បត្តិល្អដល់យុវជនខ្លួនឯងផងដែរ។

លោក ជេន អ៊ីម៉ានូអេល ហ្គីនទីញ នាយកប្រចាំប្រទេស នៃអង្គការទស្សនៈពិភពលោកអន្តរជាតិប្រចាំកម្ពុជា មានប្រសាសន៍ថា តាមរយការ​អនុវត្តគម្រោងការស្ម័គ្រចិត្តដើម្បីសហគមន៍ខ្ញុំ យុវជនបានកាត់បន្ថយឧបសគ្គនៃការរារាំងការចូលរួមរបស់ក្មេងប្រុស និងក្មេងស្រី ក្នុងការធ្វើការងារជាមួយគ្នា ការដឹកនាំគម្រោងជាមួយគ្នា ក៏ដូចជាកាត់បន្ថយវិសមភាពយេនឌ័រ។

លោក ជេន អ៊ីម៉ានូអេល ហ្គីនទីញ បញ្ជាក់ថា គម្រោងការស្ម័គ្រចិត្តដើម្បីសហគមន៍ខ្ញុំ (VMC) ជាគម្រោងថ្នាក់ជាតិដែលបានដឹកនាំយុវជនទូទាំងប្រទេសកម្ពុជាដើម្បីឱ្យមានការផ្លាស់ប្រែជាវិជ្ជមានដល់សហគមន៍របស់ពួគេ។ លោកបន្តថា ក្នុងភាពជាដៃគូនេះ បានគាំទ្រឱ្យមានការអនុវត្តនៅទូទាំង២៥រាជធានី ខេត្តក្រុង ដែលមានការចូលរួមពីយុវជនស្ម័គ្រចិត្តប្រមាណ ៥០០នាក់ជាង ដែលអនុវត្តគម្រោងចំនួន ៨៤ក្រុម ផ្ដោតលើវិស័យអប់រំ បរិស្ថាន កសិកម្ម ទេសចរណ៍ សហគ្រិនភាព  និងបរិបទបដិវត្តន៍ឧស្សាហកម្ម៤.០។

នាយកប្រចាំប្រទេសនៃអង្គការទស្សនៈពិភពលោកអន្តរជាតិប្រចាំកម្ពុជា បន្តថា កាលពីឆ្នាំ២០១៩ អង្គការទស្សនៈពិភពលោក សហការជាមួយក្រសួងអប់រំយុវជណនិងកីឡា បានអនុវត្តកម្មវិធីយុវជន និងក្មេងវ័យជំទង់ក្នុងការងារអភិវឌ្ឍខ្លួន ។ ទន្ទឹមគ្នានេះ ក្នុងកម្មវិធីដែលដឹកនាំដោយយុវជន ក៏ដូចជាបំពាក់បំប៉ននូវចំណេះជីវិត បានបង្កើតនូវលទ្ធផលជាផ្លែផ្កា ក៏ដូចជាការដោះស្រាយបញ្ហាបែបវិជ្ជមាន ជាមួយដៃគូ ជាមួយគ្រូបង្រៀន ជាមួយសមាជិកសហគមន៍ក៏ដូចជាអ្នកនឹកនាំថ្នាក់ក្រោមជាតិផងដែរ៕