ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ឯកឧត្តមឧបនាយករដ្ឋមន្រ្តី ហ៊ុន ម៉ានី ប្រធានក្រុមប្រឹក្សាភិបាល នៃមជ្ឈមណ្ឌលកម្ពុជា ៤.០ បានលើកឡើងក្នុងវេទិកាកម្ពុជា ៤.០ ស្តីពី “ការប្រើប្រាស់បច្ចេកវិទ្យាក្នុងវិស័យសុខាភិបាល” ថា ការវិនិយោគលើវិស័យសុខាភិបាល គឺជាការវិនិយោគលើការកសាងមូលធនមនុស្ស ដែលជាមូលដ្ឋានគ្រឹះដ៏សំខាន់ សម្រាប់កំណើនសេដ្ឋកិច្ច ភាពប្រកួតប្រជែង និងការអភិវឌ្ឍប្រកបដោយចីរភាព ដោយរាជរដ្ឋាភិបាលមានការគិតគូរ ទាំងលើការអប់រំបណ្តុះបណ្តាល, ការថែទាំសុខភាព និងការបង្កើត និងបង្កើនឱកាសការងារសម្រាប់ប្រជាពលរដ្ឋគ្រប់រូប។
ឈរលើស្មារតី នៃការយកចិត្តទុកដាក់លើការងារនេះ បើតាមប្រសាសន៍របស់ឯកឧត្តមឧបនាយករដ្ឋមន្រ្តី ចាប់តាំងពីដើមអាណត្តិ រាជរដ្ឋាភិបាលនីតិកាលទី៧ នៃរដ្ឋសភា បានកំណត់គោលដៅច្បាស់លាស់ក្នុងការពង្រឹងសមត្ថភាពប្រព័ន្ធ និងបរិវត្តកម្មឌីជីថលក្នុងវិស័យសុខាភិបាល ដើម្បីលើកកម្ពស់សមត្ថភាពរបស់មូលដ្ឋានសុខាភិបាលសាធារណៈ។
ឯកឧត្តម ហ៊ុន ម៉ានី បញ្ជាក់ថា វត្តមានរបស់សុខាភិបាលឌីជីថល បានក្លាយជាធាតុផ្សំមួយដ៏មានសារៈសំខាន់ ជាយុទ្ធសាស្រ្តសម្រាប់កម្ពុជា ទាំងក្នុងពេលបច្ចុប្បន្ន និងទៅថ្ងៃអនាគត ក្នុងការជំរុញការពង្រឹងប្រព័ន្ធសុខាភិបាលជាតិ និងកែលម្អលទ្ធភាពទទួលបានសេវាសុខាភាពសាធារណៈនៅកម្ពុជា។
ជាមួយគ្នានេះ ឯកឧត្តមឧបនាយករដ្ឋមន្រ្តី ហ៊ុន ម៉ានី ក៏បានចែករំលែកនូវអនុសាសន៍ជាធាតុចូលមួយចំនួន ដូចជា ការជំរុញបន្តពង្រឹង និងបង្កើនចំណេះដឹង និងជំនាញផ្នែកសុខាភិបាលឌីជីថល ដល់ធនធានមនុស្សនៅក្នុងវិស័យសុខាភិបាល, ការបន្តជំរុញការបណ្តុះបណ្តាលអក្ខរកម្មឌីជីថល ដើម្បីឱ្យប្រជាពលរដ្ឋអាចមានសមត្ថភាព និងលទ្ធភាព ក្នុងការប្រើប្រាស់ថ្នាល កម្មវិធី និងសេវាសាធារណៈ, ការលើកទឹកចិត្តឱ្យមានការជំរុញការវិនិយោគលើហេដ្ឋារចនាសម្ព័ន្ធឌីជីថលសម្រាប់វិស័យសុខាភិបាល ដោយបំពាក់ និងជំរុញការប្រើប្រាស់នូវឧបករណ៍ និងបច្ចេកវិទ្យាវេជ្ជសាស្រ្តថ្មីៗ នៅតាមមូលដ្ឋានសុខាភិបាល, លើកកម្ពស់ការប្រើប្រាស់ថ្នាលបច្ចេកវិទ្យាឌីជីថលក្នុងស្រុក ដែលមានស្តង់ដាត្រឹមត្រូវ សំដៅជំរុញនវានុវត្តន៍ និងដំណោះស្រាយឌីជីថល ឱ្យស្របតាមតម្រូវការសេវាសាធារណៈ របស់ប្រជាពលរដ្ឋ និងការជំរុញការប្រើប្រាស់បច្ចេកវិទ្យាឌីជីថលទំនើបៗ ដូចជា បញ្ញាសិប្បនិម្មិត (AI), ម៉ាស៊ីនសិក្សា (Machine Learning), អ៊ីនធឺណិតនៃវត្ថុ (IoT) និងទិន្នន័យធំ (Big Data) ឱ្យបានកាន់តែច្រើននៅក្នុងវិស័យសុខាភិបាល៕
