ភ្នំពេញ- ផ្លែងក្នុងពិធីប្រកាសផ្លូវការ កម្មវិធីបញ្ញវ័នឌីជីថល (Digital Talents) កាលពីចុងសប្តាហ៍កន្លងទៅនេះ ឯកឧត្តម ជា វ៉ាន់ដេត ​រដ្ឋមន្ត្រីក្រសួងប្រៃសណីយ៍និងទូរគមនាគមន៍ បានមានប្រសាសន៍ លើកទឹកចិត្តដល់សិស្សានុសិស្សទាំងអស់ចូលរួមប្រកួតប្រជែងក្នុងកម្មវិធីបញ្ញវន្តឌីជីថល ដើម្បីបង្ហាញទេពកោសល្យ និងពង្រីកសក្ដានុពលរបស់ខ្លួន។

ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍  បានមានប្រសាសន៍ថា កម្មវិធីបញ្ញវន្តឌីជីថលនេះ នឹងជួយលើកកម្ពស់កសាងធនធានមនុស្សឆ្នើមរបស់កម្ពុជាយើង ជាពិសេសការជំរុញដល់សិស្សានុសិស្សថ្នាក់វិទ្យាល័យអាចស្វែងយល់ពីការប្រើប្រាស់បច្ចេកវិទ្យាឌីជីថលតាមរយៈការចូលរួមប្រកួតប្រជែង និងទទួលបានការហ្វឹកហាត់ពីអ្នកជំនាញ។ ឯកឧត្តម​បន្តថា ការកសាងធនធានមនុស្សគឺជាបេសកកម្មដ៏សំខាន់របស់ក្រសួងអប់រំ យុវជន និងកីឡា ហើយក្រសួងប្រៃសណីយ៍និងទូរគមនាគមន៍ បានចូលរួមជាផ្នែកមួយលើការកសាងធនធានមនុស្សក្នុងវិស័យឌីជីថល។

បញ្ញវន្តឌីជីថល ជាកម្មវិធីប្រកួតប្រជែងថ្មីផលិតដោយក្រសួងប្រៃសណីយ៍និងទូរគមនាគមន៍ គាំទ្រដោយក្រសួងអប់រំយុវជន និងកីឡា ដែលផ្តល់ឱកាសដល់សិស្សានុសិស្សកំពុងសិក្សាថ្នាក់វិទ្យាល័យចាប់ពីថ្នាក់ទី១០ ដល់ថ្នាក់ទី១២ទូទាំងប្រទេសកម្ពុជា ចូលរួមប្រកួតប្រជែងចំណេះដឹង បង្ហាញពីភាពច្នៃប្រឌិត និងសមត្ថភាពដោះស្រាយបញ្ហា ទៅលើប្រធានបទអំពីចំណេះដឹងផ្នែកឌីជីថល។

តាមការបញ្ជាក់របស់ ឯកឧត្តម ជា វ៉ាន់ដេត សម្រាប់សិស្សានុសិស្សចូលរួមប្រកួតដែលទទួលបានជ័យលាភីលេខ១ នឹងទទួលបានទឹកប្រាក់ចំនួន ១៥លានរៀល, ជ័យលាភីលេខ២ ទទួលបានទឹកប្រាក់ ១០លានរៀល និងជ័យលាភីលេខ៣ ទទួលបានទឹកប្រាក់ ៥លានរៀល។ ជាពិសេស ព្រមទាំងទទួលបានអាហារូបករណ៍សិក្សាថ្នាក់បរិញ្ញាបត្រ និងឱកាសទៅទស្សនកិច្ចសិក្សាជាមួយក្រុមហ៊ុនបច្ចេកវិទ្យានៅក្រៅប្រទេស។ ដោយឡែកជ័យលាភីលេខ៤ ដល់លេខ២០ ទទួលបានកុំព្យូទ័រយួរដៃ ១គឿង និងប្រាក់ឧបត្ថមផងដែរ។

ប្អូនៗសិស្សានុសិស្សដែលចាប់អារម្មណ៍អាចចុះឈ្មោះ តាមតំណភ្ជាប់: https://forms.gle/37Hd5nrSAQU4bFCp6 ដែលចាប់ផ្តើមជ្រើសរើសខេត្តចំនួន៦ ដូចជា រាជធានីភ្នំពេញ ខេត្តបាត់ដំបង ខេត្តសៀមរាប ខេត្តកំពង់ចាម ខេត្តតាកែវ និងខេត្តកណ្តាល ចាប់ពីថ្ងៃទី២ ខែមិថុនា ឆ្នាំ២០២៣ និងបិទទទួលពាក្យនៅថ្ងៃទី១៩ ខែមិថុនា ឆ្នាំ២០២៣។ សម្រាប់ព័ត៌មានបន្ថែម https://t.me/DigitalTalentsShow ៕