កុមារមានបញ្ហាកង្វះអាហារូបត្ថម្ភស្រួចស្រាលជារឿយៗតែងតែកើតឡើងចំពោះកុមារអាយុក្រោមប្រាំឆ្នាំ ហើយបញ្ហានេះជាកត្តាធំបំផុតដែលក្រសួងសុខាភិបាល ដៃគូពាក់ព័ន្ធ និងអង្គការនានាតែងតែយកចិត្តទុកដាក់ និងកែប្រែបញ្ហានេះ។ នេះជាការលើកឡើងរបស់លោកជំទាវវេជ្ជបណ្ឌិត ប្រាក់ សោភ័ណនារី រដ្ឋលេខាធិការក្រសួងសុខាភិបាល ក្នុងទស្សនៈកិច្ចអ្នកសារព័ត៌មានទៅកាន់កិច្ចកម្មវិធីការចាប់ផ្ដើមជាមួយសុខភាពល្អ នាស្រុកបន្ទាយស្រី ខេត្តសៀមរាប កាលពីពេលថ្មីៗនេះ។

លោកជំទាវវេជ្ជបណ្ឌិត ប្រាក់ សោភ័ណនារី បានលើកឡើងថា ការបញ្ចុកអាហារត្រឹមត្រូវដល់កូនជារឿងសំខាន់សម្រាប់សុខភាពកូន។ អាហារត្រឹមត្រូវគឺការផ្តល់អាហារដែលមានជីវជាតិសម្បូរអាហារូបត្ថម្ភ មានបន្លែបៃតង ត្រី សាច់ ស៊ុត ផ្លែឈើ និងទឹកស្អាត ដែលឪពុកម្តាយមួយចំនួនមិនទាន់បានគិតគូរដល់ចំណុចនេះទេពោលគឺឱ្យកូនហូបទៅតាមអាហាររបស់មនុស្សធំ និងឱ្យបានតែឆ្អែតដែលមិនមានអាហារូបត្ថម្ភគ្រប់ជីវជាតិ។

ជាមួយគ្នានេះ លោក ឈឿន ង៉ិក ជាជីតាដែលមានចៅស្រីមានបញ្ហាកង្វះអាហារូបត្ថម្ភស្រួចស្រាល និងជាក្មេងមិនសូវមានសុខភាពល្អ បានកែប្រែ និងព្យាបាលសុខភាពចៅស្រីឱ្យត្រឡប់មកមានសុខភាពល្អប្រសើរឡើងវិញតាមរយៈផ្ដល់អាហារត្រឹមត្រូវ មានបន្លែត្រីសាច់គ្រប់គ្រាន់ឡើងវិញ។ លោក ឈឿន ង៉ិក បានប្រាប់ឱ្យដឹងថា លោកបានធ្វើសួនដើម្បីដាំបន្លែនៅផ្ទះដោយខ្លួនឯង ដែលអាចផ្ដល់អត្ថប្រយោជន៍ជាច្រើនសម្រាប់គ្រួសារ ជាពិសេសសម្រាប់កូនៗ និងចៅៗក្នុងផ្ទះ។ អត្ថប្រយោជន៍ទាំងនោះរួមមាន ការចំណេញពីការចំណាយប្រចាំថ្ងៃលើបន្លែសម្រាប់បរិភោគ, មិនមានការព្រួយបារម្ភលើការចំណាយ, មានបន្លែហូបគ្រប់គ្រាន់រាល់ថ្ងៃ ហើយបច្ចុប្បន្ននេះចៅៗជាពិសេសចៅស្រីម្នាក់ដែលមានបញ្ហាកង្វះអាហារូបត្ថម្ភស្រួចស្រាលបានត្រឡប់មកមានសុខភាពល្អប្រសើរឡើងវិញ។

ជាមួយគ្នានេះ អ្នកស្រី ង៉ិក សុឃា ជាកូនស្រីរបស់លោក ឈឿន ង៉ិក និងជាម្ដាយរបស់កុមារដែលមានបញ្ហាកង្វះអាហារូបត្ថម្ភ បានឱ្យដឹងថា កូនស្រីរបស់ខ្លួនមានសភាពស្គមស្គាំង មិនមានភាពរីករាយ និងមិនរហ័សរហួនដូចក្មេងដទៃ តែដោយមានការជួយតាមដានសុខភាពពីអង្គការភ្លែនអន្តរជាតិកម្ពុជាទើបអ្នកស្រីបានដឹងថា កូនមានបញ្ហាកង្វះអាហារូបត្ថម្ភស្រួចស្រាល។

បញ្ហាទាំងនេះត្រូវបានដោះស្រាយបន្តិចម្ដងៗក្រោយលោក ឈឿន ង៉ិក ជាឪពុករបស់ខ្លួនបានដាំបន្លែក្នុងផ្ទះ ដែលធ្វើឱ្យ សុឃា ផ្លាស់ប្ដូររបបអាហារកូនដោយបំពេញបន្ថែមនូវអាហារដែលមានបន្ថែមបន្លែត្រីសាច់ និងរបរអាហារគ្រប់គ្រាន់។

បច្ចុប្បន្នកូនស្រីរបស់ សុឃា ត្រឡប់មកមានសុខភាពល្អ ជាក្មេងដែលលូតលាស់បានលឿនទាំងផ្នែកបញ្ញា ស្មារតី និងមានកម្លាំងមាំមួនជាងមុនផងដែរ។ លើសពីនេះ កូនស្រីរបស់ សុឃា ក៏មានសុខភាពល្អ និងមិនងាយមានជំងឺដូចកាលពីមុនទៀតឡើយ៕