ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – អ្នកជំនាញក្នុងវិស័យអប់រំបានថ្លែងថា វិស័យអប់រំត្រូវមានផែនការបាញ់ឆ្ពោះទៅរកការលើកស្ទួយសេដ្ឋកិច្ចជាតិ ដើម្បីជំរុញប្រទេសកម្ពុជាឱ្យក្លាយជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០៣០។
ឧកញ៉ា ប៉ិច បូឡែន អគ្គនាយកបណ្តាញគ្រឹះស្ថានអប់រំ វេសឡាញ អេឌ្យូខេសិន គ្រុប បានមានប្រសាសន៍ថា គ្រប់វិស័យទាំងអស់ក្នុងប្រទេសមួយអាចរីកចម្រើនទៅបានត្រូវឆ្លងកាត់វិស័យអប់រំជាចម្បង រាប់ទាំងវិស័យកសិកម្ម ឧស្សាហកម្ម សុខាភិបាល ទេសចរណ៍ សំណង់ និងវិស័យដទៃទៀត។
លោកឧកញ៉ាបន្តទៀថា អ្នកធ្វើការងារក្នុងវិស័យអប់រំដើរតួយ៉ាងសំខាន់ ក្នុងការចូលរួមចំណែកអភិវឌ្ឍធនធានមនុស្សសម្រាប់សង្គមជាតិ ជាពិសេសបាននិងកំពុងចូលរួមបង្កើតប្រព័ន្ធ និងបង្កើនគុណភាពអប់រំមួយ ដើម្បីធានា និងផ្តល់ឱកាសដល់យុវជនអាចមានការងារសមរម្យមួយ ឬអាចចេញប្រកបមុខរបរអាជីវកម្មទទួលបានជោគជ័យរួមនឹងប្រាក់ចំណូលខ្ពស់។ ដូចនេះ ការបង្កើនប្រាក់ចំណូលដែលបានមកពី អាជីពការងារ អាជីវកម្ម និងសហគ្រិនភាពនេះហើយ ដែលជាលទ្ធផលនៃការអប់រំបាញ់ឆ្ពោះទៅរកការរីកចម្រើនសេដ្ឋកិច្ច ដើម្បីជំរុញប្រទេសកម្ពុជាក្លាយជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០៣០។
ការណ៍ដែលលោកលើកយកស្ថានភាពសេដ្ឋកិច្ចមកបង្ហាញនេះ លោកឧកញ៉ាចង់បញ្ជាក់ថា ព្រោះវិស័យអប់រំត្រូវមានគំនិតគិតទុកជាមុន រួមនឹងផែនការសកម្មភាពច្បាស់លាស់ ដើម្បីសម្រេចឱ្យបានទិសដៅសេដ្ឋកិច្ចជាតិដែលប្រជាពលរដ្ឋទទួលប្រាក់ចំណូលជាមធ្យមគុណនឹង២ដង ក្នុងអំឡុង៧ឆ្នាំទៀត។
លោកឧកញ៉ា ប៉ិច បូឡែន
“ខណៈពេលដែលលោកគ្រូ អ្នកគ្រូខ្វាយខ្វល់ពីអនាគតកូនចៅរបស់ខ្លួន ខ្ញុំសូមសំណូម លោកគ្រូ អ្នកគ្រូក៏ត្រូវគិតគូរពីជោគវាសនាកុមារ និងយុវជន ដែលជាសិស្សរបស់យើងផងដែរ ព្រោះពួកគេគឺជាទំពាំងស្នងឬស្សី និងជាកម្លាំងកងទ័ពសេដ្ឋកិច្ចយ៉ាងសំខាន់ក្នុងការចូលរួមចំណែកអភិវឌ្ឍសេដ្ឋកិច្ចជាតិ”
អ្នកជំនាញក្នុងវិស័យអប់រំរូបននេះបញ្ជាក់ថា គុណភាពអប់រំត្រូវការជ្រោមជ្រែងពីគ្រប់មជ្ឈដ្ឋានទាំងស្ថាប័នរដ្ឋ និងឯកជន ជាពិសេសការចូលរួមពីលោកគ្រូអ្នកគ្រូលើការផ្លាស់ប្តូរវិធីសាស្រ្តបង្រៀនបែបថ្មី និងឈ្វេងយល់ពីការប្រើប្រាស់បច្ចេកវិទ្យាអប់រំ៕
