ការសម្រេចចិត្តជ្រើសរើសជំនាញសិក្សានៅសាកលវិទ្យាល័យ គឺជារឿងសំខាន់បំផុតសម្រាប់សិស្សានុសិស្សដែលមានបំណងចង់បន្ដការសិក្សា។ តែជាមួយគ្នានេះ ភាពស្រពិចស្រពិលនៃការជ្រើសរើសជំនាញសិក្សាឱ្យបានត្រឹមត្រូវនៅថ្នាក់មហាវិទ្យាល័យ ឬសាកលវិទ្យាល័យ តែងតែកើតមានចំពោះយុវជនដែលទើបបញ្ចប់ការសិក្សានៅថ្នាក់ទី១២ ឬទើបឈានជើងចូលជីវិតមហាវិទ្យាល័យដំបូងៗ ។ វាមិនមែនមានតែនៅប្រទេសកម្ពុជានោះទេ សូម្បីយុវជននៅប្រទេសអភិវឌ្ឍន៍នានាក៏មានបញ្ហានេះដែរ ។

ភាពមិនច្បាស់លាស់លើការជ្រើសរើសជំនាញនេះ បានបង្ហាញថា ៤៦% សិស្សបញ្ចប់ថ្នាក់វិទ្យាល័យ បានសិក្សាបន្តនៅមហាវិទ្យាល័យ, ៤១% មិនទាន់ប្រាកដប្រជាចំពោះការសម្រេចចិត្តរបស់ខ្លួន , និង ១៣% មិនចាប់អារម្មណ៍សិក្សានៅមហាវិទ្យាល័យទាល់តែសោះ ។ នេះបើតាមការសិក្សាស្ទង់មតិខ្លីមួយរបស់ស្ថាប័នវិភាគទិន្នន័យអប់រំ Inside Higher Ed អំពីការសម្រេចចិត្តជ្រើសរើសជំនាញសិក្សានៅមហាវិទ្យាល័យជាលក្ខណៈសកល ។

អ្នកឧកញ៉ាវេជ្ជបណ្ឌិត គួច ម៉េងលី អគ្គនាយកប្រតិបត្តិ នៃក្រុមហ៊ុន ម៉េងលី ជេ. គួច អេឌ្យូខេសិន មានប្រសាសន៍ថា ការសម្រេចចិត្តជ្រើសរើសជំនាញសិក្សារបស់យុវជន គឺជារឿងសំខាន់។ សំខាន់ត្រង់ថា នៅថ្នាក់ទី៩ សិស្សានុសិស្ស ត្រូវដឹងឱ្យច្បាស់ថា ចង់ធ្វើអ្វីនៅថ្ងៃអនាគត ទើបអាចសម្រួចគោលដៅឆ្ពោះទៅមុខងាយស្រួល ។ អ្នកឧកញ៉ា បន្តថា សាលារៀននៅបរទេសតែងនាំសិស្សានុសិស្សទៅទស្សនកិច្ចសិក្សានៅកន្លែងការងារនីមួយៗតាំងពីក្មេងដូចជា ពេទ្យធ្មេញ ពេទ្យវះកាត់ ការលក់ដូរ ការរកស៊ី ជាដើម ដើម្បីឱ្យសិស្សានុសិស្សដឹងពីរៀបធ្វើការងារទាំងនោះ និងដឹងថា ខ្លួនចង់រៀនអ្វី ហើយចង់ក្លាយជាអ្វី តាំងពីថ្នាក់ទី៩ឡើងទៅ។

អ្នកឧកញ៉ា វេជ្ជបណ្ឌិត គួច ម៉េងលី បញ្ជាក់ថា ដោយសារសិស្សានុសិស្សបច្ចុប្បន្ន មិនទាន់មានអ្នកណែនាំក្នុងការប្រឹក្សាយោបល់តាំងពីថ្នាក់ក្រោមឱ្យបានទូលំទូលាយអំពីជំនាញសិក្សា ដើម្បីដឹងថាក្រោយប្រឡងបាក់ឌុបចប់ ត្រូវបន្តការសិក្សាទៅសាកលវិទ្យាល័យមួយណា? រៀនជំនាញអ្វី? ដូច្នេះដើម្បីអាចជួយឱ្យការសម្រេចចិត្តបានត្រឹមត្រូវ សិស្សានុសិស្សទាំងអស់ត្រូវសួរខ្លួនឯងថា តើខ្ញុំចូលចិត្តអ្វី ? ខ្ញុំពូកែខាងអ្វី ? លើសពីនេះ រៀនស្វែងយល់ដោយខ្លួនឯង និងស្រាវជ្រាវបន្ថែមអំពីមុខជំនាញដែលកំពុងមានតម្រូវការទីផ្សារការងារ តាមបណ្ដាញអ៊ីនធឺណិត (Google) និងសួរសិស្សច្បងបន្ថែម ដើម្បីឱ្យដឹងច្បាស់ថា យើងចង់រៀនអ្វី និងចង់ធ្វើអ្វី។

បើតាម អគ្គនាយកប្រតិបត្តិ នៃក្រុមហ៊ុន ម៉េងលី ជេ. គួច ការប្រឹក្សាមហាវិទ្យាល័យ និងការប្រឹក្សារកការងារឱ្យត្រូវជំនាញ នៅតាមសាលារៀន ក៏ដូចជាសាកលវិទ្យាល័យ អាចជួយបំភ្លឺផ្លូវសិស្សឱ្យរើសជំនាញសិក្សាបានត្រឹមត្រូវ។ អ្នកឧកញ៉ា បន្តថា សិស្សនុសិស្សអាចចំណាយពេលវេលា ដើរមើល សាលកលវិទ្យាល័យ ក៏ដូចជាស្វែងយល់អំពីមុខជំនាញនីមួយៗ។ ប្រសិនបើមានឱកាសមកទីក្រុងភ្នំពេញជាមួយឪពុកម្ដាយ ឬមិត្តភក្ដិដែលទុកចិត្ត គឺអាចទៅមើលផ្ទាល់អំពីរបៀបធ្វើការក្នុងវិស័យនីមួយៗ ដើម្បីមានបទពិសោធន៍ និងចំណេះដឹងមួយចំនួន សម្រាប់ជាការសម្រេចិត្ត។

អ្នកឧកញ៉ា វេជ្ជបណ្ឌិត គួច ម៉េងលី បញ្ជាក់បន្ថែមថា បើតាមការសិក្សា អ្នករៀនចប់មុខវិជ្ជា A ហើយចេញមកធ្វើការជំនាញ A មានតែ៤៦% កាលពីជំនាន់មុន ប៉ុន្តែឥឡូវនេះ អ្នករៀនជំនាញ A មកធ្វើការលើជំនាញ A មានត្រឹមតែ ២៩% ប៉ុណ្ណោះ។ នេះមានន័យថា ការសម្រេចចិត្តជ្រើសរើសជំនាញបន្តការសិក្សានៅសាកលវិទ្យាល័យពិតជាសំខាន់ ប្រសិនបើយុវជន ចង់រៀនជំនាញមួយដែលខ្លួនស្រឡាញ់ ហើយចាប់យកអាជីពមួយដែលស្រមជាមួយមុខជំនាញនោះ។ យ៉ាងណាមិញ ការចំណាយពេលសិក្សា ៤ឆ្នាំនៅសាកលវិទ្យាល័យ ក៏ផ្ដល់ជាចំណេះដឹង បទពិសោធន៍ និងមេរៀនជិវីតជាច្រើនសម្រាប់យុវជនឱ្យមានភាពឯករាជ្យផងដែរ៕