ការធានាបាននូវសេដ្ឋកិច្ច សង្គម ប្រកបដោយចីរភាព និងបរិយាបន្ន ជាពិសេស នៅក្នុងបរិបទបច្ចុប្បន្នដែលបច្ចេកវិទ្យាជះឥទ្ធិពលស្ទើរតែគ្រប់សកម្មភាព ប្រចាំថ្ងៃ ត្រូវការចាំបាច់ឱ្យប្រជាពលរដ្ឋមានចំណេះដឹង និងជំនាញឌីជីថលគ្រប់គ្រាន់ ព្រមទាំងចេះប្រើប្រាស់ប្រព័ន្ធឌីជីថលក្នុងជីវភាពរស់នៅប្រចាំថ្ងៃ ប្រកបដោយ ប្រសិទ្ធភាព និងការទទួលខុសត្រូវខ្ពស់។ ក្នុងន័យនេះ ពលរដ្ឋឌីជីថល គឺជា គោលគំនិតដ៏សំខាន់ និងផ្តល់ឱ្យនូវអត្ថប្រយោជន៍ជាច្រើន ដែលនេះទាមទារឱ្យមាន ការគិតគូរ និងយកចិត្តទុកដាក់ក្នុងការជំរុញកិច្ចការងារនេះ។ ដូច្នេះ ខាងក្រោមនេះ នឹងបង្ហាញពីសារៈសំខាន់ នៃពលរដ្ឋឌីជីថល៖

ជំរុញការសម្របបានទៅនឹងការផ្លាស់ប្តូររចនាសម្ព័ន្ធកម្លាំងពលកម្ម និងការងារ

នាយុគសម័យឌីជីថល បច្ចេកវិទ្យាឌីជីថលបានបង្កើតជាប្រភេទការងារថ្មីៗជាច្រើន ដែលទាមទារឱ្យមានចំណេះដឹង និងជំនាញខ្ពស់ជាងមុន ជាពិសេសជំនាញឌីជីថល។ ក្នុងន័យនេះ កាលដែលពលរដ្ឋមានជំនាញឌីជីថល អាចធ្វើឱ្យពួកគេសម្របខ្លួន បានទាន់ពេលទៅនឹងការផ្លាស់ប្តូរនៃបរិបទការងារ, អាចរក្សាភាពប្រកួតប្រជែង របស់ខ្លួននៅក្នុងទីផ្សារការងារ និងជាពិសេសចូលរួមកាត់បន្ថយគម្លាតឌីជីថល ក្នុងចំណោមតួអង្គពាក់ព័ន្ធ ដែលបណ្តាលមកពីគម្លាតជំនាញឌីជីថល។

ជួយកាត់បន្ថយកម្រិតឧក្រិដ្ឋកម្ម និងការគំរាមកំហែងតាមប្រព័ន្ធ ICT

បច្ចេកវិទ្យាឌីជីថលពិតជាបានជួយសម្រួលការរស់នៅប្រចាំថ្ងៃរបស់យើង ប៉ុន្តែ ក៏នាំមកនូវហានិភ័យមួយចំនួន ដែលអាចធ្វើឱ្យប៉ះពាល់ដល់សុវត្ថិភាពរបស់អ្នក ប្រើប្រាស់ប្រព័ន្ធឌីជីថល ទាំងផ្នែកហិរញ្ញវត្ថុ និងផ្ទាល់ខ្លួន ព្រមទាំងបណ្តាលឱ្យបាត់បង់ភាពជឿជាក់ពីសំណាក់អ្នកប្រើប្រាស់។ ក្នុងន័យនេះ តម្រូវការជំនាញ ឌីជីថល ជាពិសេសចំណេះដឹងទាក់ទងនឹងសន្តិសុខសាយប័រពិតជាសំខាន់។

ដូច្នេះ នៅពេលពលរដ្ឋកាន់តែច្រើនមានចំណេះដឹងទាក់ទងនឹងសុវត្ថិភាពសាយប័រ នឹងជួយកាត់បន្ថយកម្រិតហានិភ័យដែលបង្កឡើងដោយជនខិលខូចនៅលើអ៊ីនធឺណិត និងជួយពួកគេចៀសវាងក្លាយជាជនរងគ្រោះដោយសារការគំរាមកំហែងតាមប្រព័ន្ធ ICT។

ជំរុញល្បឿននៃការត្រៀមខ្លួនឌីជីថល និងជំរុញដំណើរការបរិវត្តកម្មឌីជីថល

ការត្រៀមខ្លួនឌីជីថលសម្រាប់ពលរដ្ឋ ផ្តោតសំខាន់លើធាតុផ្សំសំខាន់ៗ រួមមាន ការប្រើប្រាស់បច្ចេកវិទ្យាឌីជីថល, អក្ខរកម្មឌីជីថល និងការចូលរួមឌីជីថលជាដើម។ ធាតុផ្សំសំខាន់ៗទាំងនេះអាចសម្រេចកំណើននៃការចូលរួមរបស់ពលរដ្ឋបាន លុះត្រា តែពលរដ្ឋមានចំណេះដឹងទាក់ទងនឹងឌីជីថល។ ការណ៍នេះបង្ហាញថា ចំនួនពលរដ្ឋ ឌីជីថលកាន់តែច្រើននៅក្នុងប្រទេស អាចជំរុញល្បឿននៃការត្រៀមខ្លួនឌីជីថល របស់ប្រទេសនោះជារួម។

លើសពីនេះ ប្រសិនបើពលរដ្ឋមិនមានចំណេះដឹងឌីជីថល ដំណើរការបរិវត្តកម្មពលរដ្ឋឌីជីថលដែលជួយជំរុញដំណើរការបរិវត្តកម្មឌីជីថលនៅក្នុងប្រទេស ក៏មិនអាចសម្រេចបានជោគជ័យទាំងស្រុងនោះទេ។ ជាក់ស្តែង អាជីវកម្ម ឬស្ថាប័នមិនអាចជំរុញបរិវត្តកម្មឌីជីថលបានទេ ប្រសិនបើបុគ្គលិកក្នុងស្ថាប័នមិនមានសមត្ថភាពប្រើប្រាស់បច្ចេកវិទ្យាឌីជីថល។

ជំរុញការកសាងសង្គមឌីជីថល

ការកសាងសង្គមឌីជីថល ត្រូវការការចូលរួមពីកោសិកាសង្គមទាំងអស់ ពោល គឺបុគ្គលគ្រប់រូបអាចប្រើប្រាស់បច្ចេកវិទ្យាឌីជីថល ក្នុងការប្រាស្រ័យទាក់ទងរវាង បុគ្គល ក្រុមគ្រួសារ និងសហគមន៍, ការបំពេញកិច្ចការងារ និងការធ្វើអាជីវកម្ម ជាដើម។ នៅពេលពលរដ្ឋមានជំនាញឌីជីថលសមស្រប ពួកគេនឹងអាចទទួល បានសេវាសង្គមកាន់តែងាយស្រួល និងទូលំទូលាយ តាមរយៈថ្ពាលបច្ចេកវិទ្យា ឌីជីថល, អាចពង្រឹងទំនាក់ទំនង និងចែករំលែកក្នុងសង្គមបានកាន់តែត្រឹមត្រូវ និងការទទួលបានការកម្សាន្ត និងព័ត៌មានពីសង្គមតាមតម្រូវការជាដើម។

ជំរុញការកសាងសេដ្ឋកិច្ចឌីជីថល

ការកសាងសេដ្ឋកិច្ចឌីជីថលដែលរឹងមាំ មិនមែនពឹងផ្អែកតែលើបច្ចេកវិទ្យាទំនើប ឬហេដ្ឋារចនាសម្ព័ន្ឋនោះទេ ប៉ុន្តែអាស្រ័យយ៉ាងខ្លាំងលើពលរដ្ឋឌីជីថល ដែលជា កម្លាំងចលករដ៏សំខាន់។ ពលរដ្ឋឌីជីថលគឺជាឆ្អឹងខ្នងដ៏សំខាន់ក្នុងការជំរុញសេដ្ឋកិច្ច ឌីជីថល ដោយសារពួកគេគឺជាកម្លាំងពលកម្មដែលមានបំណិនបច្ចេកវិទ្យាខ្ពស់ អាចបង្កើតនវានុវត្តន៍ និងបង្កើនផលិតភាពការងារបានយ៉ាងរហ័ស។

លើសពីនេះ តាមរយៈការយល់ដឹងពីការប្រើប្រាស់សេវាហិរញ្ញវត្ថុអនឡាញ និង ការទិញ-លក់តាមប្រព័ន្ធអេឡិចត្រូនិក ប្រកបដោយទំនុកចិត្ត និងសុវត្ថិភាព ពួកគេ បានជួយជំរុញសកម្មភាពពាណិជ្ជកម្ម និងធុរកិច្ច (ការធ្វើពាណិជ្ជកម្មតាមប្រព័ន្ធ អេឡិចត្រូនិក), ជំរុញនវានុវត្តន៍នៅក្នុងសេដ្ឋកិច្ច និងបង្កើនតម្លាភាពក្នុងចរន្ត សេដ្ឋកិច្ចជាតិទាំងមូល ដែលធ្វើឱ្យការអភិវឌ្ឍសង្គម សេដ្ឋកិច្ចទំនើបមាននិរន្តរភាព និងភាពប្រកួតប្រជែងខ្ពស់៕

ប្រភព ៖ មជ្ឈមណ្ឌលកម្ពុជា ៤.០