ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ក្នុងពិធីបើកសន្និបាតបូកសរុបលទ្ធផលការងារ ឆ្នាំ២០២៥ និងលើកទិសដៅការងារ ឆ្នាំ២០២៦ របស់ក្រសួងការងារ ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានលើកឡើងថា ក្នុងឆ្នាំ២០២៥កន្លងទៅនេះ ចំនួនអ្នកមានការងារធ្វើក្នុងប្រទេសកម្ពុជា បានកើនឡើងដល់ប្រមាណ ១០,៧លាននាក់ ឬកើនប្រមាណ ៨០ម៉ឺននាក់ ធៀបនឹងឆ្នាំ២០២៤។ ដោយឡែកអតីតពលករខ្មែរមកពីប្រទេសថៃ សរុបប្រមាណ ៦២ម៉ឺននាក់ បានទទួលការងារធ្វើ ដែលជាការប្រែក្លាយបញ្ហាប្រឈម ទៅជាការបំពេញតម្រូវការកម្លាំងពលកម្មក្នុងប្រទេស ជំរុញកំណើនសេដ្ឋកិច្ចជាតិ។
បើតាម ឯកឧត្តម ហេង សួរ ក្នុងចំណោមអ្នកមានការងារធ្វើទាំងប្រមាណជាង១០លាននាក់នោះ វិស័យសេវាកម្ម មានអ្នកធ្វើការងារច្រើនជាងគេ គឺប្រមាណ ៤,៩លាននាក់ ខណៈវិស័យឧស្សាហកម្មមានប្រមាណ ៣លាននាក់ ហើយវិស័យកសិកម្ម មានតែប្រមាណ ២,៨លាននាក់។
ជាមួយគ្នានេះ ឯកឧត្តមរដ្ឋមន្រ្តី ក៏បានសម្តែងនូវមោទនភាព ចំពោះចំនួនសហគ្រាសដែលបានចុះបញ្ជី បានកើនឡើងដល់ ៤៦ ៦៤៩សហគ្រាស (កើន ១៨៥១) ដោយមានកម្មករនិយោជិតសរុបប្រមាណ ២,២លាននាក់ (កើន ៤០១,៤៧៩នាក់)។ កំណើននៃចំនួនសហគ្រាសដែលបានចុះបញ្ជី គឺជាសក្ខីភាពនៃការជឿជាក់របស់អ្នកវិនិយោគលើស្ថិរភាពនយោបាយ និងបរិយាកាសធុរកិច្ចនៅកម្ពុជា។
តាមរយៈការសម្រេចបាននូវលទ្ធផលការងារគួរជាទីមោទនៈនេះ ឯកឧត្តម ហេង សួរ បានកោតសរសើរ និងវាយតម្លៃខ្ពស់ចំពោះការចូលរួមចំណែកយ៉ាងសកម្មពីសំណាក់ក្រសួង ស្ថាប័នពាក់ព័ន្ធ រដ្ឋបាលរាជធានី ខេត្ត កងកម្លាំងមានសត្ថកិច្ច អាជ្ញាធរមូលដ្ឋាន និយោជក សហជីព កម្មករនិយោជិត អង្គការជាតិ អន្តរជាតិ ដៃគូអភិវឌ្ឍន៍ ក្នុងការធ្វើឱ្យវិស័យការងារ សន្តិសុខសង្គម និងបណ្តុះបណ្តាលវិជ្ជាជីវៈកាន់តែមានភាពរីកចម្រើន៕
