ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ថ្លែងពីពិធីប្រគល់សញ្ញាបត្រជូនដល់និស្សិតជ័យលាភី នៃសាកលវិទ្យាល័យភូមិន្ទកសិកម្ម, វិទ្យាស្ថានជាតិកសិកម្មព្រែកលៀប និងវិទ្យាស្ថានជាតិកសិកម្មកំពង់ចាម នាព្រឹកថ្ងៃទី១៥ ខែឧសភា ឆ្នាំ២០២៣ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានប្រកាសថា កម្ពុជានឹងអនុញ្ញាតិឱ្យគ្រូបង្វឹក ក៏ដូចជាកីឡាករកីឡាការិនីដែលមកចូលរួមប្រកួតកីឡាស៊ីហ្គេមលើកទី៣២នៅកម្ពុជា អាចចូលទស្សនាប្រាសាទអង្គវត្តដោយឥតគិតថ្លៃ។
សម្ដេចតេជោមានប្រសាសន៍ថា ប្រសិនជាកីឡាករ កីឡាការិនី ក្រោយបញ្ចប់ការប្រកួតចង់ទៅទស្សនាប្រាសាទអង្គរវត្ត គឺសូមកុំឱ្យមានការលក់សំបុត្រ ត្រូវអនុញ្ញាតិឱ្យពួកគេចូលទស្សនាដោយឥតគិតថ្លៃ ។ សម្ដេចតេជោ ក៏បានស្នើសុំទៅគ្រឹះស្ថានអង្គរដែលដឹកនាំដោយអជ្ញាធរជាតិអប្សារា ក្រសួងវប្បធម៌ និងក្រសួងសេដ្ឋកិច្ចហិរញ្ញវត្ថុ កុំលក់សំបុត្រដល់កីឡាករ កីឡាការិនី ដោយឡែកចំពោះអ្នកគាំទ្រអាចលក់សំបុត្រជូនធម្មតា។
សម្ដេចតេជោ ហ៊ុន សែន បញ្ជាក់បន្ថែមថា កម្ពុជាមិនផ្តោតលើការចាញ់ឈ្នះនោះទេ ប៉ុន្តែអ្វីដែលសំខាន់ធំបំផុត គឺគិតទៅដល់ការធ្វើម្ចាស់ផ្ទះដែលផ្ដល់ឱ្យភ្ញៀវមកកាន់ប្រទេសរបស់យើងទទួលបានសេចក្តីសុខ និងការស្វាគមន៍របស់ប្រជាពលរដ្ឋចំពោះប្រតិភូកីឡា។
គួរជម្រាបជូនថា ក្នុងនាមជាម្ចាស់ផ្ទះស៊ីហ្គេម កម្ពុជាបានផ្តល់អាហារ កន្លែងស្នាក់នៅ ដោយមិនតម្រូវឱ្យប្រតិភូពីបណ្តាប្រទេសចូលរួមទាំងអស់បង់ថ្លៃ ៥០ដុល្លារម្នាក់ក្នុងមួយថ្ងៃ និងការដឹកជញ្ជូនដល់គណៈប្រតិភូកីឡាស៊ីហ្គេម ដែលបានចុះឈ្មោះមកចូលរួមព្រឹត្តិការណ៍កីឡាអាស៊ីអាគ្នេយ៍លើកទី៣២ ឆ្នាំ២០២៣។ នេះជារឿងមិនធ្លាប់មានក្នុងប្រវត្តិសាស្ត្រស៊ីហ្គេម ក្រោយម្ចាស់ផ្ទះកម្ពុជាដែលអាចបញ្ជាក់ថា កម្ពុជាជាប្រទេសតូចតែបេះដូងធំ៕
